The Dementia Australia Chief Executive Officer Maree McCabe uas yog tus coj ntawm lub koom haum the Dementia Australia hais tias yog tej yam txaus txhawj xeeb heev uas Royal Commission tseem mus txheeb tau tias Australia cov kev tu tsom kwv saib xyuas tej laus tsis muaj peev xwm tsim tau cov kev tus thiab pab cuam kom tej laus tau txais kev nyab xeeb thiab lawv tseem raug tej neeg tu los yog cov tsev laus tsis kub siab los ua tib zoo tu thiab.
Ms. McCabe qhia tias yeej muaj Australia cov laus tshaj li 52% ntawm tej tsev laus yeej raug ntsuam tau tias muaj cov mob hlwb ua tem toob, thiab yeej muaj tej laus neeg no txog li 30% yeej yog cov neeg hais ntau hom lus ua thawj hom lus uas tsis yog lus Askiv ntawd, yog li thiaj tsim nyog yuav tau los nrog xyuas kom tsim tau cov kev tu tsom kwm zoo quality aged care standard ntawm txhua nrho tej lagluam tu tsom kwv tej laus no los ua tib zoo xyuas kom pab tau tej laus raws li qhov lawv xav tau.
Raws li tsab ntawv cej luam 2017 Report uas tsev lub koom haum Alzheimer's Australia tau koom tes nrog lub tsev kawm qib siab University of Canberra tau teeb txheeb ntawd, ces txog rau xyoo 2056 ntawd, yuav muaj Australia cov laus neeg tshaj li 1 roob tus yuav mob cov mob dementia (Hlwb tsis ua hauj lwm zoo) no thiab yuav ua rau Australia poob nyiaj txog li $1 trillion los pab rau tej hauj lwm no.
Tsis tas li no los Ms McCabe tseem tau qhia ntxiv tias yuav tsum tau tso tseg tsis txhob muab tej laus lub cev zoj los yog tsis txhob muab tshuaj rau lawv noj kom lawv ncaws dab ntub, nyob twj ywm, los yog kom tsaug zog txhob yws ub yws no ntawd ntxiv lawm. Ntxiv ntawd yuav tsum cia tej laus neeg no muaj cai tawm tau tswv yim txiav txim siab tias lawv xav tau txais cov kev pab cuam, tu li cas kom haum raws li lawv tej kab li kev cai, thiab npaj tsim tej tsev laus ze rau ntawm tej neeg zejzog kom lawv tsis txhob raug cai thiab kom muaj feem koom rau lawv txoj kev ua lub neej thiab txhob mloog tau tias lawv nyob twm zeej kho siab khuav.
Txawm li cas los tej lagluam tsev laus uas tu tsom kwv tej laus yeej tau cav tias vim tsoom hwv teb chaws Australia tau txiav nyiaj pab cuam rau lawv, ces lawv thiaj ntiav tsis tau neeg ua hauj lwm txaus los pab tu Australia tej laus neeg raws li qhov tsim nyog.
Tab sis raws li tau muaj xov xwm cej luam tsis ntev los no, ces tseem muaj Australia tej laus txog li ntawm 120,000 tus uas tos kom tau cov kev tus tsom kwm tom tej tsev ntau yam-(The home care packages) siv, tab sis lub caij lawv tseem tos ntawd yeej tau muaj tej laus no txog li 16,000 tus tau tas sim neej lawm thiab yeej tseem tsis tau siv cov kev pab cuam no rau xyoo 2018 dhau los.
Txawm li cas los tsoom hwv Australia lub tuam chav tswj kev noj qab haus huv Greg Hunt cov xov xwm tau coj los qhia tau hnub tim 31 lub 10 hli ntuj xyoo 2019 dhau los no yeej tau qhia tias tsoom hwv Australia yeej tau tshwm nyiaj pab rau Australia cov kev tu tsom kwm tej laus (Aged Care System) txog li ntawm $21.7 billion rau xyoo 2019-20 thiab tseem yuav pab nyiaj ntxiv tuaj txog li $25.4 billion rau xyoo 2022-23. Tsis tas li no tseem yuav pab cuam cov kev mus tu thiab pab tej laus tom tsev raws li tsoom hwv tsab ntawv cej luam txog cov Home care packages kom ntau tuaj ntxiv tshaj li 2 npaug ze txog li ntawm 160,000 tus rau xyoo 2022-23 no ntxiv thiab.
Raws li Maree McCabe uas yog tus coj ntawm lub koom haum Dementia Australia tau qhia ces txhua txhua cov tsev laus thiab tej neeg ua hauj lwm tu saib xyuas tej laus yuav tsum tau xyaum thiab kawm kom paub tu tsom kwm tej laus uas muaj cov teeb meem dementia los yog cim xeeb tsis zoo ntawd tso mam pub tu tej laus. Yog li qhov tseem ceeb tshaj plaws ces xav kom tau txais kev koom tes los ntawm tag nrho sawv daws tsis hais yog tsoom hwv teb chaws, tej zejzog thiab tej tsev laus uas tu thiab saib xyuas tej laus los muab cov kev tu tsom kwm tej laus no saib tias yog ib cov teeb meem tseem ceeb uas yuav tau kub siab los nrog xyuas kiag tam sim no kom sai.
