Txuas ntxiv no yog Pauline Hanson tej lus uas nws tau hais ntawm National Press Club uas tau ua rau Australia tej nom tswv muaj kev txhawj xeeb tias tsam yuav ua rau ib txhia neeg yuav txiav txim tias yuav ua li cas rau nws pab nom rau lub caij lawv xav tig mus txheeb pab nom One Nation Party tej cai seb pab nom no yuav ua dab tsi tiag. Thiab Australia tus nom tswj dej num multicultural affairs hais tias tej lus no qhia tias Ms Hanson tsis muaj policy siv.
Lub caij Pauline Hanson uas yog tus coj pab nom One Nation Party tau hais lus ntawm lub koom haum National Press Club ces nws tau hais tias tsim lub tswv yim multiculturalism siv tsis tau hauj lwm, thiab xav kom Australia yog lub teb chaws uas siv tib yam kab lis kev cai xwb. Nws hais tias vim 1 tug neeg ntawm 4 tug neeg Australia pheej tseem hais lwm hom lus ntawm tsev. Nws xav kom tej neeg paub hais lus Askiv thiab yoog tau cov kev ua lub neej ntawm Australia.
Hanson hais tias nws yuav txiav nyiaj tsis pab rau lub chaw nthuav xov xwm SBS (Special Broadcasting Services), vim muaj tej xov xwm hauv internet lawm. Ua ke no los nws kuj hais tias yuav kom tej neeg subscribe thiaj tau saib thiab mloog ABC (Australian Broadcasting Corporation) xwb.
Nws tsis pom zoo nce nyiaj hauj lwm rau Australia tej neeg ua hauj lwm vim nws hais tias 'tej neeg tub nkeeg, tsuas kov xov tooj, tsis xav ua hauj lwm thiab tej tswv lagluam tsis muaj peev xwm rho tau lawv tawm hauj lwm'. Ces nws thiaj yuav tau kho dua cov cai industrial relations tshiab.
Ua ke no los nws kuj yuav tsis them nyiaj paid parental leave rau tej niam txiv so yug me nyuam tshiab, tab sis nws yuav nce nyiaj pension kom ntau ntxiv thiab yuav xyuas kom tej neeg yuav tau tsev thiab ntiav tau tsev pheej yig zog nyob.
Nws tawm tsam yuav tsis pub ib co neeg nthuav xov xwm mus koom nws, vim nws hais tias 'tsuas yog cov kev tsim teeb meem rau nws thiab nws pab nom xwb'.
Nws qhia tias yuav siv nuclear energy, thiab roj zeb ntsuam los tsim hluav taws xob siv thiab yuav tso tseg tsis siv tsoom fwv Labor tsab cai net zero policy vim yog ib co kev dag. Ces thiaj yuav tso tseg tsis siv tej khaub lig cua uas pheej coj mus nruab rau ntawm tej liaj teb ntxiv.
Tej lus no thiaj ua rau Anne Aly uas yog Australia tus nom tswj dej num multicultural affairs hais tias Pauline Hanson tej lus no qhia tau tias nws pab nom One Nation Party tsis muaj policy siv.
Tib lub caij no los lub koom haum sawv cev rau tej neeg zejzog pawg tsawg ntawm Australia (Federation of Ethnic's Communities Council of Australia - FECCA) tau tsis pom zoo nrog Ms Hanson tej lus, thiab hais tias tsuas yog ib lub tswv yim xav rov qab siv tsab cai White Ausralia Policy thiab tsim kom muaj kev sib tawg tswj xwb.
Thiaj ua rau ib txhia neeg uas txhawb nqa Pauline Hanson tshaj plaws lees tias yog ib co kev phom sij rau pab nom One Nation, vim yog tej yam tseem ceeb heev uas yuav qhia tias seb puas yuav muaj tej neeg xaiv nom pab nws los sis tsis pab nws pab nom, vim ib txhia neeg xaiv nom nyuam qhuav paub txog pab nom no tej policies xwb.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
