Xov xwm lub tshaj tawm hnub zwj Teeb (Thursday news 05.06.2025):
Ted O'Brien uas yog tus nom tswj nyiaj txiaj rau lwm pab nom teb chaws hais tias Labor cov kev npaj yuav tsub se ob npaub rau tej neeg muaj nyiaj superannuation tshaj $3 million yog ''ib cov kev puas tsuaj''. Nws tau qhia rau lub chaw nthuav xov xwm ABC tias ''yog ib lub tswv yim phem''. Nws hais tias ''Peb txhawb nqa cov kev sau se tsawg. Peb ntseeg cov kev siv cov kev sau se yooj yim. Peb xav kom muaj kev ncaj ncees rau cov kev sau se. Tej neeg khwv tau nyiaj yeej yuav tau them se. Yog li tej kev sau se no thiaj dhau nrom nrim tshaj Australia tej cai sau se lawm. Thiaj yog ib co kev puas tsuaj.'' Labor tsab cai no muaj hom phiaj los sau se 30 feem pua rau tej neeg muaj nyiaj nyiaj super ntau tshaj 3 million dollars vim txhob txwm xav siv cov kev txo se kom khwv tau nyiaj xwb tsis yog yuav khaws nyiaj cia siv rau lub caij so tsis ua hauj lwm. Treasurer Chalmers qhia tias tsoom fwv yeej xav ua tej hauj lwm no tab sis zoo li tau suab txhawb nqa tsis txaus ntawm tev kis xeev siab. Ces thiaj pom tias neeg Australia hnoob nyoog 60-64 xyoos muaj nyiaj superannuation xam raws tus zauv theem nrab rau tej txiv neej txog $200,000 hos tej poj niam ces muaj $150,000.
Thawj pwm tsav Anthony Albanese thiab Sussan Ley uas yog tus coj ntawm lwm pab nom teb chaws kuj tau tawm tsam nrog ib tug coj tseem ceeb ntawm pab nom Liberal uas tau muaj xov xwm qhia tias nws cav tias ''tej poj niam ncauj liab hais taus'' thiab xav kom pab nom no xub kub siab txog tej txiv neej ua ntej. Txawm li cas los Mr Alan Stockdale kuj tau rov qab qhia rau Telegraph tias ''tsis tsim nyog nws hais tej lus tawm tswv yim tsis zoo no.''Hos thawj pwm tsav ces hais tias ''xav kom pab nom Liberals no txheeb lawv tus kheej thiab lawv cov kev teeb tsa.'' Ua ke no los Ms Ley kuj au hais tias nws yeej xav kom muaj tej poj niam ''hais taus'' los koom nws pab nom.''
Tej teb chaws tub koom siab ntawm UN lub tuam chav tswj kev ruaj ntseg tau tib tsis pom zoo nrog Meskas cov kev tawm suab tsis pom zoo xaus tsov rog thiab tshem cov kev txwv xa tej khoom pab tej neeg txom nyem ntawm Gaza.
Meskas tus President Donald Trump kos xyeem mem tes rau ib tsab cai txwv tsis pub ntau caum lub teb chaws mus rau teb chaws Meskas suav teb chaws Nplog thiab teb chaws Phabmab nrog. Nws hais tias tsuas yog ''ib co kev pov puag kom nws tej kev ruaj ntseg haiv thiab pov puag nws haiv neeg, teb chaws Meskas thiab nws tej pej xeem tej txiaj ntsim xwb.''
Volodymyr Zelenskyy uas yog Ukraine tus President tau hais tias kom nws cov teb chaws phooj ywg tsis txhob ua tej neeg tsis muaj peev xwm rau Vladimir Putin tom qab Russia tus coj tau hawv tias yuav ua pauj thaum uas Ukraine tau tawm tsam nws tsis ntev los no thiab nws tau hu xov tooj nrog Meskas tus President Trump tham.
Lub caij Australia tus thawj pwm tsav tseem npaj yuav nrog Meskas tus President Donald Trump tham tim ntsej tim muag nws cia siab tias Meskas yuav zam tsis tsub tej se uas tau nce ntawm 25 mus ua 50 feem pua rau tej nqe txhuas thiab hlau uas tau zam rau teb chaws Askiv tab sis tsub rau lwm lub teb chaws.
Tsoom fwv Albanese tau qhiat ias tsab cai Aged Care tshiab uas coj los siv lawm no uas yuav hais kom tej laus pab tshwm nyiaj them coj mus pab ua tej nqe tu tsom kwv lawv yuav tseem tsis tau siv rau lub 7 hli ntuj no tab sis yuav pib siv rau lub 11 hlis ntuj kom tej laus neeg Australia npaj txij rau cov kev pauv hloov tshiab.
Nplog tau tsim tau lub koom haum AIDS Healthcare Wellness Clinic uas tsim coj los rau tej neeg Nplog siv dawb hauv tuam ceeb Vientiane kuj tau muaj tej neeg ntau puas tus tau mus siv kom tau siv cov kev pab rau tej kab mob AIDS, kab mob kas cees thiab tej mob cuam tshuam txog kev sib daj dee rau neeg Nplog, tej tub kawm thiab tej neeg yuav kis tau tej mob no yooj yim raws li Vientiane Times qhia.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
