Xov xwm luv tshaj tawm hnub zwj Feej (Wednesday news 04.06.2025):
Tom qab lub koom haum Australian Communication and Media Authority tau tshuaj ntsuam ces pom tau tias tau muaj tej neeg tsis hnov lus zoo thiab hais tsis tshua tau lus zoo tsis muaj peev xwm siv tau cov emergency call rau hnub tim 5 thiab 6 lub 7 hli ntuj 2024 ces thiaj ua rau lub tuam txhab Testra raug nplua.
Lwm pab nom teb chaws (Federal coalition) tseem tab tom npaj yuav tsis pom zoo nrog tsoom fwv Albanese cov kev npaj yuav tsub seb 30 feem pua rau tej neeg muaj nyiaj super tshaj $3 million vim Treasury hais tias muaj ib co neeg tau siv super system los khwv nyiaj xwb tsis yog khaws nyiaj cia kom tau siv rau lub caij so tsis ua hauj lwm.
Lee Jae-Myung uas yog South Korea pab nom liberal Democratic Party raug xaiv los ua tus coj tshiab rau lub teb chaws no tom qab nws tau yeej cov suab xaiv tsa tshaj 48 feem pua.
Neeg txum tim tej chaw kho mob tau mus sib ntsib ntawm Meanjin ntawm Brisbane mus koom lub rooj sab laj Queensland Aboriginal and Islander Community Health, uas muaj neeg txum tim tej coj, tej neeg kho mob thiab tej nom tswv mus koom kom tej zejzog muaj peev xwm tswj tau lawv cov kev noj qab nyob zoo thiab thiaj ua tau cov hauj lwm Closing the Gap.
WangWentao uas yog Suav tus nom tswj lagluam tau txhawb nqa kom muaj kev koom tes lagluam zoo tuaj ntxiv nrog Australia thaum nws tau ntsib Don Farrell uas yog Australia tus nom tswj lagluam ntawm Paris ntawm teb chaws Fabkis .
Lub koom haum Theraputic Goods Administration tau coj lub tuam txhab Philips mus hais plaub tom qab nws tau liam tias lub tuam txhab no tau muaj ib co twj ventilators uas muaj ib co foam me me ntawm lub twj pab tej neeg ua pa kom pw tsaug zog uas tej zaum lawv nqus tau los yog nqos tau.
Nom tswv Nyab Laj ntawm lub xeev Quang Tri kuj tau pom zoo yuav siv nyiaj tshaj li $48 milllion coj los tsim cov ncej uas yuav xa hluav taws xov ntawm teb chaws Nplog rau Cob tsib siv raws li Touitre News qhia.
Thaib tus lwm thawj pwm tsav uas yog Phumtham Wechayachai thiab yog Thaib tus nom tswj hauj lwm tiv thaiv teb chaws tau hais tias ''yuav tsuas siv tub rog ua lub tswv yim kawg xwb, vim tsis muaj leej twg xav ua tsov rog, thiab yuav siv pawg rooj saib xyuas uas muaj Thaib thiab Cambodia tej neeg tswj ciam teb los sib kho kom muaj kev sib haum xeeb rau cov kev tsis sib haum xeeb ciam teb ntawm ob lub teb chaws no raws li Bangkok Post tau qhia.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
