Nyeem tau zaj xovxwm no ua lus Askiv tau ntawm no.
Cov kab mob Myobacterium Ulcerans los yog cov kab mob hu ua Buruli ulcer yog ib cov kab mob nyaum heev uas Australia cov kws tshawb fawb ntseeg tias yog muaj ntawm mab cov quav thiab tej zaum yog yoov tshaj cum tom ces kis rau tib neeg. Txawm li cas los tej kws kho mob tseem tsis tau paub txog tus mob no zoo thiab tsis paub tias yuav tiv thaiv li cas kom tus mob no txhob mob rau tej neeg ntxiv.
Lub sij hawm ntau xyoo dhau los no ces yeej muaj neeg raug ntsuam tau coob tus ntawm xeev Victoria feem ntau mas yog cov neeg nyob ntawm Bellerine thiab Mornington Pennisulas. Xub xub txheeb tau tus mob no rau xyoo 2015 ntawm xeev Victoria, thiab paub tias muaj neeg txog li 107 tus. Xyoo 2016 muaj txog 182 tus, xyoo 2017 muaj txog li 275 tus, xyoo 2018 muaj txog li 340 tus hos xyoo 2019 muaj txog 240 neeg tau tus mob no.
Raws li tau muaj kev koom tes los ntawm ntau lub chaw teeb txheeb li Department of Health and Human Services, Doherty Institute, Barwon Health, Austin Health, CSIRO, Agriculture Victoria, University of Melbourne thiab nom tswv zos Mornington Peninsula Shire tau koom los teeb txheeb 2 lub xyoos uas tseem ua tsis tau tiav ntawd lawv yeej txheeb tau tias muaj ib cov mab (possums) cov quav muaj cov kab mob bacteria Myobacterium Ulcerans no.
Cov chaw twg muaj neeg tau tus mob Buruli Ulcer los yog kab mob bacteria noj nqaij no:
Raws li VIC Health tau qhia ces tej chaw uas kis tau tus mob no coob tshaj plaws yog nyob rau ntawm cov zos Rye, Sorrento, Blairgowrie thiab Tootgarook ntawm Mornington Peninsula. Hos cov kis hauj sim me ntsi yog nyob rau ntawm suam av Bellarine Peninsula (Ocean Grove, Barwon Heads, Point Lonsdale, Queenscliff), Frankston thiab Seaford areas. Hos cov kis tau tsawg ces kuj yog nyob rau lwm thaj chaw ntawm suam av Bellarine thiab Mornington Peninsula, mus rau tej zos ntawm South Eastern Bayside thiab East Gippsland. Yog li ntawd tej chaw hais los no thiaj yog cov chaws uas muaj neeg tau tus mob Buruli ulcer ntawm xeev Victoria lawm. Xyoo 2019 dhau los no los kuj nyuam qhuav tau muaj 2 tug neeg tau tus mob no ntawm Aireys Inlet ntawm Surf Coast thiab muaj 2 tug tau tus mob no ntawm Geelong lub zos Belmont lawm thiab. Tab sis 2 lub zos no yeej tsis yog thaj chaw pom sij tsawg tsawg xwb.
Image
Feem ntau mas yeej pom muaj tus mob no rau ntau thaj chaw sov ntawm cov teb chaws Africa rau tej dej teev tsis ntws hauv tej pas dej. Tab sis yog leej twg tau tus mob no lawm ces yuav ua rau raug tsim txom thiab ntshe yuav puas cev los yog caws pliav tsis tau lub cev zoo du dai li qub lawm.
Txawm li cas los yeej txheeb tau ntau tus mob ntawm lub zos Daintree tab sis yeej tsis tshua pom muaj rau tej xeev Northern Territory, New South Wales thiab Western Australia pes tsawg.
Mob rau lub caij twg:
Feen ntau mas yeej muaj tej neeg tau tus mob no rau lub caij ntuj so pib txij lub 6 hli ntuj txog lub 11 hlis ntuj xwb thaum uas pheej muaj tej kab tej ntsaum tom los yog to qhov txhob rau tej tawv nqaij ntawd. Thiab siv sij hawm li ntawm 6 lub hli mas thiaj mam paub cov yam ntxwv mob uas xub pib liab liab rau thaj chaw ntawd ces mam loj o thiab su tuaj.
Cov yam ntxwv mob zoo li cas:
Raws li lub tuam chav tswj kev noj qab haus huv ntawm xeev Victoria qhia ces yeej zoo li kab tej ntsaum tom los yog yoov los sis kab laug sab tom ua ib lub pob liab liab xwb, ntxiv ntawd los ntev li 4 hlis ces txawm pib muaj cov yam ntxwv lub pob ntawv loj thiab su liab liab tuaj ces txawm pib nti tawv thiab pib lwj hauv qab ntawm daim tawv rau qhov chaw o ntawd lawm.
Dr Daniel O'Brien ntawm lub chaw teeb txheeb Barwon Health uas tau teeb txheeb thiab nrhiav tswv yim los kho cov mob no tias, " Cia li pib ua paug voos thiab tej nqaij ntawm thaj chaw ua mob liab liag ntawd txawm pib lwj ntawm daim tawv mus rau tej nqaij. Thiab qee tus yog mob loj lawm ces tej nqaij ntawm tag nrho ib sab caj npab los yog ib feem ntawm tus neeg ntawd txhais ceg cia li lwj lawm thiab. Vim tej mob no mob sai heev ces peb thiaj xav tau tej xov xwm kom zoo txog tej mob no uas peb tseem tsis tau paub txog thiab xav tau nyiaj kom sai coj los siv teeb txheeb thiab nrhiav cov hauv kev los kho tus mob no."
Gus Charles los kuj tseem tau ib lub caws pliav los ntawm cov mob Buruli ulcer no tom qab nws lub pob hauv caug raug txiav pov tseg rau ib lub xyoos dhau los no lawm. Nws hais tias:
"Ua ntej li ob peb limtiam uas kws phais yuav muab kuv lob pob hauv caug phais ntawd, ces cov nqaij cia li poob ib thooj me me tawm los, thiab muaj ntshav ntws nrog tawm los thiab tom qab uas raug phais tas lawm kuv thiaj mam paub tias yog ib cov mob nyaum heev."
Gus Charles and his mother Sally, Channel 9.
Professor Paul Johnson ntawm Austin Health uas yog lub tsev kho mob thiab yog lub chaw teeb txheeb thiab kho ntau yam mob tau hais tias tej zaum yog yoov tshaj cum yog cov coj cov kab mob bacteria ntawm cov mab tej quav los kis rau tib neeg thaum nws tom neeg nqus ntshav ntawd.
"Peb tseem tsis tau muaj peev xwm tej tau los lus nug no tias nws ho kis tau cov mob no li cas, ho muaj cov mob no nyob nrog cov mab tau li cas, thiab nws ho yuav mus nyob tau qhov twg ntxiv los yog kis tau li cas ntxiv."
Yog li ntawd tsoom hwv teb chaws Australia tus pwm tsav tswj kev noj qab haus huv Greg Hunt tau qhia tias tsoom hwv teb chaws twb tau pab nyiaj $2.4 million los xyuas cov mob no lawm thiab Dr. Brett Sutton uas yog tus coj tswj kev noj qab haus hauv ntawm xeev Victoria no mam li koom tes nrog nom tswv xeev Victoria los npaj cov tswv yim tshiab los teeb txheeb txog cov kab mob no lawm.
Hos xeev Victoria los kuj tau tshwm nyiaj $1 million los tswj kev noj qab haus huv rau 10 lub xyoos dhau los thiab kuj tau muab $150,000 coj mus pab tej kev tshawb fawb txog cov hauj lwm cua tshuam txog tus kab mob no uas yuav mus ua tib zoo txheeb xyuas cov mab (possums) tej quav thiab mus sim tej yoov tshaj cum nrog uas lawv yeej txheeb tau tias muaj ib txhia mab cov quav yeej muaj tus kab mob Myobacterium Ulcerans no nyob rau hauv thiab.
Tsis tas li no los xeev Victoria lub tuam chav tswj kev noj qab haus huv thiab tej kws tshawb fawb txog tus kab mob no los kuj tau sau ntawv mus thov nyiaj ntawm lub chaw tswj kev noj qab haus huv haiv thiab lub chaw teeb txheeb thiab kho mob (National Health and Medical Research Council) lawm. Yog tias nws cov kev teeb txheeb mus tau zoo ces yuav thov tau nyiaj $250,000 coj los pab cov hauj lwm no thiab.
NYEEM TAU ZAJ XOV XWM ZOO TIB YAM LI NO HAUV QAB NO:
Yuav tiv thaiv li cas?
Raws li VIC Health tau qhia, xav kom tej neeg yuav tsum hnav khaub ncaws ris tsho tes ntev thiab npab ntev kom tej kab tej ntsaum thiab yoov tshaj cum txhob tom yus. Looj hnab looj tes thaum cog zaub los yog txiav nyom txiv ntoo ntawm tej tog vaj tog tsev. Thaum muaj qhov txhab tos lawm yuav tsum siv cov tshuaj los ntxuav huv si tua kab mob thiab muab ntaub nplaum los qhov txhab lo rau. Yog tias lub qhov txhab tsis zoo thiab voos loj tuaj ces yuav tsum tau mus ntsib kws kho mob. Thiab yog tej kws kho mob ho txheeb tau tias muaj ib tug neeg tau tus mob no yuav tsum qhia rau xeev Victoria lub tuam chav tswj kev noj qab haus huv (VIC Health) paub li ntawm 5 hnub.
Tam sim no nom tswv yeej muaj cov kev sim seb puas tau tus mob no pub dawb rau zejtsoom sawv daws lawm tab sis yog koj mus siv cov tsev kho mob ntiav ces tej zaum kom yuav tau them. Tab sis yog tham txog cov tshuaj tua kab mob (antibiotics) ces vim tseem tsis tau raug teev zwm nrog Pharmaceutical Benefits Scheme (PBS) ces tej neeg mob ib tug twg thiaj yuav tau them kheej txog li $14,000 thiab yeej muaj tej neeg mob tau tus mob no ntau tus yuav tsum tau mus siv cov plastic surgery kho kom lawv tej cev zoo tuaj ntxiv.
