Raws li tsoom hwv lub tuam chav tswj kev noj qab haus huv cov dej num teev thiab qhia txog tej xov xwm cuam tshuam txog cov kab mob sib kis Australian Government Health Department-National Notifiable Infectious Diseases Surveillance System database, ces thawj 3 lub hlis ntawm xyoo 2019 no xwb twb muaj neeg tau kab mob khaub thuas ze txog li ntawm 32,000 tus lawm. Cov kws paub zoo txog kev noj qab haus huv qhia tias vim yog tej neeg mus txawv teb chaws thiab tau cov kab mob khaub thuas rov qab los kis rau sawv daws rau lub caij ntuj so los txog tam sim no. Txawm li cas los tej zaum kuj yuav tsis muaj ceem li tsaib no lawm thiab.
Australia lub koom haum The Australian Bureau of Statistics uas yog ib lub koom haum ywj pheej uas qhia txog tej xov xwm tseem ceeb tau qhia, xyoo 2017 dhau los twb tau muaj neeg Australia tas sim neej los ntawm cov kab mob khaub thuas no txog li 1,255 tus lawm. Tab sis leej twg yog cov kis tej kab mob no thiab peb yuav tiv thaiv li cas?
Tej kws paub zoo txog kev tswj kev noj qab haus huv yeej qhia tias tej me nyuam yaus thiab cov laus yog cov yuav raug cov teeb meem khaub thuas no ntau tshaj.
Tsis tas li no los twb yuav txog lub caij ntuj no sai sai no lawm thiab.
"Tsuas muaj tej neeg mus koom cov kev tshawb fawb txog cov kab mob khaub thuas tsis ntev los no txog li 10% thiaj xav tias tsim nyog yuav coj tej me nyuam mus hno cov tshuaj tiv thaiv kab mob khaub thuas no xwb, thiab tsuas muaj Australia tej neeg muaj hnoob nyoog lawm txog li ntawm 39% thiaj xav tias npaj yuav mus hno xwb tshuaj tiv thaiv khaub thuas xwb," raws li lub koom haum Immunisation Coalition cov kev tau mus teeb txheeb thoob teb chaws Australia no tau qhia.
"Me nyuam yaus tseem yog cov kis tej khaub thuas no rau lwm tus thiab, tab sis yog peb hno tshuaj rau lawv lawm ces kuj yuav muaj peev xwm tiv thaiv tau kom txhob kis tej khaub thuas no rau lwm tus thiab. Yeej tsis muaj laij thawj dab tsi ua rau tej neeg tsis mus hno cov tshuaj tiv thaiv khaub thuas no li," raws li zeskais Robert Booy ntawm txheej faj lem University of Sydney tau qhia.
“Peb yeej tau tsim cov tshuaj tiv thaiv kab mob los tshaj 50 xyoo no lawm. Peb paub tias yeej siv tau txais kev nyab xeeb thiab tsis muaj teeb meem cuam tshuam dab tsi ntau. Peb paub tias yeej siv tau hauj lwm zoo, thiab yog siv rau me nyuam yaus mas haj yam siv tau zoo tshaj thiab," raws li zeskais Booy tau qhia.
Zoo tshaj ntawd ntxiv, ces tsoom hwv cov kev hno tshuaj National Immunisation Program (NIP) tseem tso cai rau ib txhia neeg muaj cai mus hno tau cov tshuaj tiv thaiv kab mob khaub thuas no dawb tsis tau them nyiaj dab tsi thiab.
'Cov me nyuam mos txij 6 hlis mus txog cov me nyuam hnoob nyoog 5 xyoos, tej poj niam xeeb me nyuam, thiab ib cov neeg tau ntau hom mob ntev li ntshav qab zib, mob plawv nrog rau cov neeg muaj hnoob nyoog tshaj 65 xyoos ntawd tau hno cov tshuaj tiv thaiv kab mob khaub thuas daws xwb,' raws li Dr Jelena Radosavljevic ntawm nroog Melbourne Central Business District -CBD tau qhia.
Koj muaj peev xwm teem caij nrog koj tus kws kho mob, los yog tej clinic los sis cov chaw muag tshuaj kom koj mus hno tau cov tshuaj tiv thaiv kab mob flu vaccine no thiab.
