Koom haum nraj nrig tim koom haiv lub koom haum tswj kev noj qab haus huv (United Nations' World Health Organisation-(WHO)) ceeb toom tias ntiaj teb tab tom ntsib cov teeb meem ua qoob sib kis loj heev rau xyoo 2019 no lawm txij li nws tau tsim ntiaj teb cov tswv yim los hno tshuaj vaccine (Global Vaccine Action Plan) coj los tiv thaiv cov kab mob ua qoob no rau xyoo 1980 ntawd.
Dr. Alya Dabbagh tau qhia hauv WHO tsab ntawv cej luam ua nws sau tias "UN yeej tau pab txo cov kev ploj tuag ntawm cov neeg coo tshaj 550,000 tus ntawm xyoo 2000 los tshuav ze txog li 90,000 tus tas sim neej rau xyoo 2016 lawm xwb. Uas yog nws pab txo tau cov kab theem ploj qaug no txog li 84% lawm. Tab sis tus siab uas cov neeg tas sim neej no tshaj 90% tseem yog cov nyob ntawm cov teb chaws txom nyem thiab cov teb chaws tsis muaj cov kev tswj kev noj qab haus huv zoo ntawd."
Raws li UN lub koom haum tswj ntiaj teb cov kev noj qab nyob zoo cov zauv teev txog cov kab mob qoob xyoo 2019 UN-WHO New measles surveillance data for 2019 tau qhia, xyoo 2019 xwb twb muaj neeg tas sim neej txog li 110,000 vim cov kab mob ua qoob no lawm. Tej xwm txheej no yeej tau muaj thoob plaws rau ntau nrim av tsis hais America, Africa, Europe, Middle East, South Asia thiab Asia Pacifice. Tab sis cov raug teeb meem loj tshaj plaws txog 700% yog cov ntawm Africa uas muaj teb chaws Madagascar yog lub teb chaws muaj neeg tas sim neej coob tshaj plaws. Hos thoob ntuj nyuam qhuav muaj neeg coob tuaj ntxiv txog 300% tas sim neej xwb.'
Txawm li cas los Ntiaj teb lub koom haum tswj kev noj qab haus huv yeej tau kwv yees lawm tias muaj neeg ntiaj teb tas sim neej los ntawm cov kab mob ua qoob no ib xyoos twg txog li 2.6 roob (million) tus diam thiab txawm feem ntau yog raug rau tej me nyuam yaus xwb los tej mob no yeej tsis xaiv tias yuav laus los hluas li thiab yeej mob tau rau tib si. Nws tau qhia ntxiv tias lub sijhawm 17 lub xyoo dhau los (2000-2017) ces cov kev hno tshuaj tiv thaiv cov kab mob qoob no twb muaj peev xwm cawm tau neeg ntiaj teb tshaj 21 roob (million) tus lawm.
Yog li ne, cov kab mob ua qoob no ho muaj cov yam ntxwv mob li cas, thiab yog thaum mob lawm ne ho yuav muaj lwm yam teeb meem cuam tshuam li cas los yog tim dab tsi ua rau mob thiab peb ho yuav tiv thaiv tau li cas?
Cov kab mob ua qoob no yog ib cov mob uas sib kis tau yooj yim heev, thiab tseem muaj peev xwm ua rau mob tau lwm yam xws li ua rau raws plab hnyav, dej qhuav cev, mob ntsws thiab mob paj hlwb o voos mus txog rau ua rau dig muag tsis pom kev tau thiab.
Cov yam ntxwv mob ntawd ces yuav xub xub pib tau khaub thuas kub taubhau me ntsi, los ntswg, hnoos qhuav, thiab khaus qa thiab ua rau qhov muag liab. Txuas ntxiv ntawd ces txawm pib tawm pob liab liab rau saum taub hau ua ntej, thiab nqe rau caj dab thiab hauv siab ces mam li tshwm thiab xoo pob liab ua tej thaj thoob cev thiab sawv hlwv dej. Tsis tas li no tseem tawm ncauj thiab ua ib cov pob dawb dawb hauv qhov ncauj thiab. Feem ntau yuav siv sij hawm li 2 lub limpiam mam li pom tej yam ntxwv mob li hais no. Yog tham txog tias ho kis li cas ces tej zaum cov neeg nyiam ncig teb chaws los yog mus txawv teb chaws kuj mus kis tau ntawm tej neeg uas tau tus mob qoob no uas lawv tsis paub tias tus neeg ntawd tau tus mob no, los yog tej zaum tus neeg ntawd ho tsis tau cov vitamin A pab rau nws lub cev thiab ho tsis tau hno cov tshuaj vaccine tiv thaiv cov kab mob ua qoob no.
W-H-O vaccination expert, Dr. Katherine O’Brien uas yog WHO tus neeg paub zoo txog cov kev hno tshuaj vaccine thiaj qhia tias tej neeg cov kev totaub yuam kev txog cov kev hno tshuaj vaccine no muaj feem cuam tshuam thiab.
Dr O'Brien hais tias "Thiaj yog tej yam tseem ceeb heev uas tej neeg sawv daws yuav tsum nkag siab txog cov tshuaj vaccine hno tiv thaiv cov kab mob ua qoob no tias yeej zoo tib yam li lwm yam tshuaj vaccines uas ua ntej yauv coj los siv yeej tau raug coj mus sim ntau caum zaus thiab yeej txheeb tau tias siv tau txais kev nyab xeeb, tsis muaj lwm yam cuam tshuam thiab siv tiv thaiv tau tej mob no zoo thiaj coj los siv."
Tsis ntev los no los kuj tau muaj ntau lub teb chaws tau siv ib cov caij nruj coj los tswj kom tej neeg yuav tsum tau mus hno tshuaj tsis li ces tsis pub mus kawm ntawv los yog yuav raug nom tswv nplua li teb cahws Italy tau txwv tej me nyuam yaus hnoob nyoog 6 xyoos tsis pub mus kawm ntawv yog lawv tsis tau hno cov tshuaj tiv thaiv cov kab mob ua qoob, thiab America lub nroog New York tau yuam kiag kom tej neeg nyob ntawm nws lub nroog yuav tsum tau mua hno cov tshuaj no, tsis li ntawd ces yuav raug nom tswv nplua.
Teb chaws Australia los yeej dhia tsis dhau ntawm tej teeb meem no thiab, thawj thawj 4 lub hlis ntawm xyoo 2019 no tsoom hwv Australia lub tuam chav tswj kev noj qab haus huv cov kev soj thiab qhia txog cov kab mob sib kis Australian Government Health Department- National Notifiable Diseases Surveillance System yeej tau qhia lawm tias twb ze txog li 100 tus neeg Australia tau cov kab mob ua qoob no lawm thiab.
Yog li no Australia tej nom tswv tswj kev noj qab haus huv thiaj tau ceeb toom rau Australia tej neeg zejzog kom yuav tsum tau xyuam xim, thiab yuav tau los txheeb xyuas seb lawv tus kheej los yog lawv tsev neeg tus twg ho tsis tau hno tej tshuaj no ces kom mus hno.
Ntxiv ntawd los nom tswv kuj tau ceeb toom rau zej tsoom kom ceev faj rau lub caij lawv mus koom zej tsoom tej koom txoos tsam ho muaj tej neeg tau cov npaws qoob no uas lawv tsis paub ces yuav kis tau rau lawv thiab.
Yog tias koj xav tau xov xwm txog cov kab mob ua qoob no thiab xav mus txheeb xyuas kom ntxaws ntxiv ces txheeb tau ntawm ntiaj teb lub koom haum tswj kev noj qab haus huv cov xov xwm WHO fact-sheet data los yog koj muaj peev xwm nug thiab qhia los yog txheeb xyuas tau cov kab mob ua qoob no nrog Australia lub tuam chav tswj kev noj qab haus huv thiab pab cuam zej tsoom cov hauj lwm tswj thiab tiv thaiv kab mob sib kis Communicable Disease Prevention and Control section at the Department of Health and Human Services tus zauv xov tooj 1300 651 160 tau 24 teev.
