Koom haum Hmong Australian Society Inc ceg xeev Victoria tus lwm coj Jason Lis tau hais tias nws thiab nws pawg tswj xav los ua ntau yam kom pab tau cov tub koom siab thiab kho tau lub koob tsheej xyoo tshiab kom zoo txuas ntxiv rau yav tom ntej.
Nws hais tias yog tham txog cov nyiaj ib siab ob qeg lawm ces xav tsim ib phau account thiab kom tej neeg xa nyiaj rau phau account ces koom haum mam txheeb tias nws them lawm xwb, hos cov tsis paub xa rau phau account los mam li them li qub rau tus neeg sau nyiaj, kom thiaj tsis txhob nqa nyiaj ntsuab ntau li qub lawm thiaj yooj yim me ntsis.
Mr. Lis hais tias nws pawg tswj kuj xav thov nyiaj los tsim kom tau ib lub website rau lub koom haum Hmong Australia Society Inc Victoria branch, kom thiaj yooj yim rau cov kev sib txuas lus, siv form, teev tub koom siab thiab sib xa moo los yog nug moo. Tsis tas li no los pab kom tej tub koom siab tau mus nyeem tau cai ntawm lub koom haum no ntxiv.
Mr. Jason Lee tseem qhia ntxiv tias nws yeej xav tsim ib cov program qhia ntawv Hmoob rau Hmoob tej hluas thiab nrhiav ntau cov kev pab cuam rau tej tub koom siab tau siv thiab.
Tham txog kev txhawb nqa kom los qhia Hmoob tej txuj ci paj nruag li qeej, ncas, xim xo, qwv nplooj, raj, paj huam, lus txhiaj txhais thiab kws txhiaj ntawd yeej yuav tau los txhawb nqa tej hluas thiab, tab sis tseem ceeb lawv yuav tsum paub lus thiab ntawv Hmoob ua ntej.
Vim rau qhov tam sim no ces lawv yeej tsis tau kawm ntawv Hmoob, tsis hais thiab tsis tshua siv lus Hmoob los yog tsis tshua paub lus Hmoob lawm.
Ntxiv ntawd los nws yeej tseem xav txhawb nqa kom muaj cov hluas coob ntxiv tuaj mus kawm Hmoob tej kab lis kev cai nrog cov program uas koom haum tseem niaj hnub qhia tam sim no thiab.
Hmong communities los kuj yog ib feem ntawm Australia tej neeg zejzog uas hais ntau hom lus thiab coj ntseeg kev cai dab qhuas sib txawv thiab, yeej xav kom Hmoob yuav tau mus koom thiab sib txuas lus sib cuag mus los nrog lawv thiab tab sis zoo li Hmoob pheej tseem nyiam nyob nrog Hmoob ntau xwb. Tab sis Jason yeej xav kom Hmoob tau mus koom nrog lwm cov neeg zejzog kom ntau tshaj qub ntxiv.
Yog vim lub sij hawm tsawg li 2 los sis 3 xyoos xwb ces thiaj tsis paub tias xyov puas yuav ua tau tej dej num li hais no tiav li cas. Tab sis Jason qhia tias nws pawg tswj mam npaj li qhov lawv npaj tau thiab tus tshiab los coj los yeej xav kom lis tej dej num no txuas ntxiv rau yav pem suab.
Tham txog tsiab peb caug ntawm nroog Melbourne xyoo no ces yuav muaj rau hnub tim 26-28.12.2018 no.
Thawj nub ces mus noj hmo thiab koom kev lom zem li qub. Tab sis koom haum yeej tseem xav kom sawv daws nyias npaj nyias zaub mov thiab dej mus noj sib koom ua ke li qub thiab sib pab koom tes kom lub koob tsheej xyoo tshiab tiav li txhia niaj txhia xyoo tau ua dhau los.
Hnub 2 ces yuav muaj kev sib tw thiab kev pov pob nrog rau lwm yam txuj lom zem ntawm Progress Hall rau tib thaj chaw kom sawv daws tau koom kev lom zem ua ke.
Cov kev sib tw no ces yuav muaj ntau tuj lub, ntaus pob thiab ncaws pob coj los ua kev lom zem rau cov tub koom siab.#
