Dr. Dominic Burg, yog tus Chief Scientist thiab Project Manager ntawm lub tuam txhab Evolis hais tias, peb tau ua ib co kev teeb txheeb nrog neeg Australia li ntawm 1,000 tus seb plaub hau hle ua rau muaj teeb meem dab tsi rau peb. Ces kuj txheeb tau tias:
"Plaub hau hle ua rau muaj teeb meem ntau yam li, tab sis qhov tsem ceeb ces yog ua rau peb tsis tau txais kev noj qab nyob zoo thiab tsis tau txais kev noj qab haus huv.
''Muaj tej neeg Australia tau mus koom cov kev teeb txheeb no yuav laug txog li ib nrab hais tias, yog thaum nrhiav ib tug hluas nkauj hluas nraug (partner) ces plaub hau yog tej yam tseem ceeb heev,
''Kuj muaj 45 feem pua ntawm tej poj niam hais tias ntshe yuav ua rau lawv ceeb loj heev li yog tias lawv tsis muaj lawv tej plaub hau (plaub hau hle tag lawm),
''Tsis tas li ntawd los cov kev teeb txheeb no kuj tau qhia rau peb tias plaub hau kuj pab kom peb ntseeg peb tus kheej thiab kom peb lub cev muaj xam lees. Thiab yeej muaj tej neeg Australia yuav laug txog li ib nrab yeej qhia tias lawv cov plaub hau pab kom lawv ntseeg lawv tus kheej. Thiab qhov uas peb xav paub xav pom tshaj plaws ces yeej muaj 40 feem pua ntawm tej neeg Australia tau qhia tias yog lawv cov plaub hau zoo ces ua rau lawv muaj kev zoo siab heev txawm yuav ntsib teeb meem dab tsi rau lawv lub neej.
Nws hais tias muaj ntau yam teeb meem ua rau peb tej plaub hau hle los yog do pliaj xws li, peb cov hnoob nyoog, tej zaub mov pej noj, kev nyuaj siab ntxhov plawv, kev noj tshuaj thiab kev kho mob mus txog rau cov caj ces do hau los yog do pliaj ntawd.
Dr. Burg hais tias rau qhov tias tej txuam thawj (factors) haus dhau los saum toj no yuav ua rau peb tej plob hau tuaj sib sib thiab tsis tuab los yog nyob tsis ntev pheej hle lawm. Tab sis peb yeej tseem muaj peev xwm pab tau thiab yog tias peb noj zaub mov zoo muaj txiaj ntsim pab rau peb lub cev, mus qoj ib ce kom tawm hw (exercise) los yog nrhiav tshuaj thiab kev kho mob pab cuam ntxiv. Nws hais tias ntxiv ntawd los yeej muaj cov tshuaj teeb txheeb tau tshiab los ntawm tej nroj tshuaj hu ua "evolis" uas twb tau coj los siv kho tau tej neeg zoo thiab plob hau rov qab tuaj coj los siv lawm thiab.
Nws tseem txhab ntxiv tias txawm muaj ib cov tshuaj hu ua Minoxidil thiab Propecia, uas tej neeg yeej muaj peev xwm yuav tau tom tej chaw txiav plob hau coj los siv los sis cia li mus yuav tau tom tej khw muag tshuaj coj los siv xwb, los cov tshuaj Minoxidil yog ib cov tshuaj kho cov neeg mob ntshav siab uas yeej tsis tshua zoo siv rau sawv daws pes tsawg. Thiab cov tshuaj Propecia los yeej yog ib cov coj los kho cov neeg plob hau hle thiab tab sis tsuas yog siv tau rau txiv neej xwb tsis yog siv rau poj niam.
Yog li Dr. Dominic Burg thiaj xav qhia tias cov kev teeb txheeb tshiab no yeej tau qhia meej tseeb rau peb paub lawm tias, plob hau hle tsim teeb meem loj kawg nkaus rau peb txoj kev noj qab nyob zoo (Well-being), peb txoj kev noj qab haus huv (Health) thiab muaj peev xwm ua rau peb raug teeb meem nyuaj siab ntxov plawv los yog tsis ntseeg peb tus kheej tau (Anxiety, Mental health and Self-confident).
Cov xov xwm SBS Hmoob nrog Dr. Dominic Burg no tham tsuas yog ib cov xovxwm coj los qhia rau sawv daws ua kev paub xwb. Tsim nyog koj yuav tau sab laj nrog tej neeg muaj ntaub ntawv tso cai kho thiab txuas plaub hau sab laj thiaj yuav pab tau raws li qhov koj siab ntshaw.
