Hauv paus xov xwm:
- Tsab cai txo nuj nqe kawm ntawv thiab tswj tej chaw zov me nyuam
- Australia thiab Nplog cov kev ua lagluam
Xov xwm luv tshaj tawm hnub zwj Feej (Wednesday news 23.07.2025):
Tsev tsoom fwv thiab cov kev txheeb tej nuj nqe kawm ntawv HECS
David Pocock uas yog ib tug nom ywj pheej ntawm ACT nqua hu kom tsoom fwv Albanese kub siab kho tej kev kawm qib siab kom tau txais kev pab cuam rau tej tub kawm nthuav dav tshaj qhov pab tej tub kawm nursing kom thiaj muaj neeg txaus los ua tej hauj lwm uas nrhiav tsis tau neeg ua hauj lwm tsis yog pheej ua kom muaj xov xwm nthuav txog nws xwb.
Tsev tsoom fwv thiab tej chaw zov me nyuam
Tau coj ib tsab cai Strengthening Regulation of Early Education Bill muaj hom phiaj xav kom kom tswj kev nyab xeeb tshaj qub ntxiv ntawm tej chaw zov me nyuam raug coj los sab laj ntawm tsev tsoom fwv, uas yog tias tej chaw twg tsim tsis tau cov services zoo siv thiab tsis tau txais kev nyab xeeb ces yuav raug muab kaw.
Pab nom Nationals cov lub tswv yim thim tsis siv tsab cai Net Zero
Banaby Joyce uas yog ib tug nom ntawm pab nom Nationals hais tias nws xav tsim ib tsab cai coj los tawm tsam kom tsis txhob siv tsab cai Net Zero rau lub caij pab nom koom tswj tseem yuav txheeb nws tsab cai no thiab hais kom tso kev dav rau cov kev sib teev theev txog tej hom phiaj yuav ua. Raws li phau ntawv xov xwm the Australian hais ces kuj yuav muaj Michael McCormack uas yog tus qub coj dhau los pab thiab.
Meskas cov kev txheeb txog tej xwm txheej cuam tshuam txog Esptein
Meskas lub tsev kis xeev qes tau ncua tsis qhia txog tej xwm txheej txheeb txog Jefrey Esptein thaum ntxov rau lub caij uas Mike Johnson uas yog tus coj lub tsev kis xeev no hais tias tsim nyog tsoom fwv Trump yuav tso cai rau cov kev los qhia tej xwm txheej no raws li qhov nws tsim nyog qhia rau lub caij uas muaj tej nom ntawm pab nom Republican tsub nias kom qhia.
Meskas cov kev tsis ua tub koom siab ntawm UNESCO
Tsoom fwv Trump yuav rho Meskas tawm tsis ua tub koom siab nrog lub koom haum UNESCO rau thaum xaus xyoo tom ntej no vim tias lub koom haum no ''tsim kev sib tawg tswj'' thiab ''tsuas xav txog ntiaj teb xwb'' uas cov nyom nrog Meskas lub tswv yim ''America first''. Tammy Bruce uas yog Meskas lub tuam chav tswj dej num txawv teb chaws tau hais tias lub koom haum no cov kev lees paub Palestine tam li ib lub teb chaws ''yog ib co teeb meem loj'' thiab yuav ua rau muaj tej lus tawm tsam Israel.
International Court of Justice (ICJ) thiab xwm txheej huab cua pauv hloov
ICJ tseem yuav los sab laj txog ntau haiv neeg cov kev tawm tswv yim txog lub lub hauj lwm ntawm tej tsoom fwv uas tsim nyog nrog tiv thaiv kom tsis txhob raug kev puas tsuaj ntawm tej xwm txheej huab cua pauv hloov ntawm Hague hmo no. Txawm li cas los ntau lub teb chaws yeej tsis tas ua raws li tej lus no. Thiaj tau muaj tej xwm txheej no tom qab tau muaj ib co tub kawm cai lij choj ntawm Vanuatu tau hais txog tej xwm txheej no nrog ICJ uas tau txais kev txhawb nqa ntawm cov teb chaws tshaj 130 lub.
Nom tswv Cob tsib txwv tsis pub siv tsheb motorbike
Raws li lub chaw nthuav xov xwm ABC qhia ces nom tswv Cob tsib yuav piv txwv tsis pub siv cov tsheb motorbike ntawm Hanoi txij lub 7 hli ntuj 2026 mus thiab yuav txwv tiss pub siv tej tsheb no los yog qee cov tsheb siv roj gasoline ntawm ib co chaw ntawm lub nroog no txij xyoo tshiab 2028 mus kom tsis txhob muaj tej cua tsis huv ntau rau lub nroog no.
Australia thiab Nplog cov kev lagluam
Australia tus ambassador ntawm Nplog teb thiab Nplog tus lwm thawj pwm tsav Komasith tau sib tham txog cov kev lagluam ntawm ob haiv neeg no uas cuam tshuam txog cov kev txhim kho thiab ceev txuag tau tej ib puag ncig thiab tej kev txhawb nqa lagluam uas muaj cov kev kawm, kev txhim kho, hauv paus txhim kho, kev ruaj ntseg, qoob loo, peev txheej kev kawm thiab kev noj qab haus huv raws li Australia cov tswv yim ua lagluam nrog cheeb tsam Southeast Asia txog xyoo 2024. Twb yeej tau muaj Australia cov tuam txhab lagluam li Linfox tau koom nrog Nplog lub tuam txhab Beer Lao/Calsberg xa beer rau lwm lub xeev, koom teeb txheeb tej qoob loo, pab cog txiv blue berry ntawm Chapasak, cog ntoo kom tau carbon credit, pab tsim hluav taws xob huv siv raws li Vientiane Times tau qhia.
Lub pas dej tauv ntawm Tibet thiab Cambodia cov kev tsis pub ua pej xeem
Tsoom fwv Suav tseem npaj yuav siv nyiaj yuav laug txog li 140 billion dollars los tsim ib lub pas dej tauv loj tshaj plaws hauv ntiaj teb ntawm Tibet uas tej zaum yuav ua rau India thiab Bangladesh tsis tau dej siv. Ua ke no los ib hnub dhau los no tsev tsoom fwv Cambodia kuj pom zoo tsim tau ib tsab cai tsis pub nws tej pej xeem uas muaj feem koom tes nrog neeg txawv teb chaws ua rau nws haiv neeg plam txiaj ntsim thiab raws li RFA qhia.
Thiab thiab cov kev ua hauj lwm ntawm Israel
Thaib tus nom tswj dej num ntiav dag zog tau qhia tias nws tau nrog tej tuam txhab ntiav dag zog tshaj 10 tawm lub tham thiab pom tias teb chaws Israel muaj tej hauj lwm txog li 10,000 txoj rau neeg Thaib ua rau lub caij tej xwm txheej tsov rog ntawm Middle East ib nyuag ntaug zog raws li Bangkok Post tau qhia.
