Hmoob pub zaub qhwv rau tej neeg zejzog Chiangmai tau noj rau lub caij kab mob COVID-19 sib kis

Hmong tej neeg zejzog nyob ntawm xeev Chiangmai tau sib pab nyiaj mus yuav Hmoob tej zaub los pub rau tej neeg zejzog ntawd xeev Chiangmai tau noj rau lub caij muaj kab mob COVID0-19 sib kis thoob ntuj thiab tej neeg poob hauj lwm tsis muaj khoom noj. Phooj Yaj nrog rau nws tus phooj ywg Ntxum Xyooj yog 2 tug tau pib cov hauj lwm no thiab tau txais kev koom tes thiab txhawb nqa thiab pab cuam los ntawm Hmoob tej zejzog, thiab tej koom haum lagluam kom los ua tau cov hauj lwm faib zaub 12 tonnes rau tej neeg ntawm Chiangmai 3 hnub pib txij li hnub tim 16-18 April 2020 (2563).

Hmong in Chiangmai give away free vegetable for Chiangmai locals during COVID-19 outbreak Source: Courtesy of Phong Yang

Phooj Yaaj thiab nws tus phooj ywg Ntxum Xyooj yog 2 tug tau tawm tswv yim los npaj nrhiav nyiaj coj los yuav zaub pab tej neeg zejzog ntawm xeev Chiangmai rau lub caij kab mob COVID-19 sib kis thoob ntuj kom tej neeg tau zaub mov me ntsi los noj rau lub caij nyuaj heev no.

Phooj qhia tias tos nws thiab nws tus phooj ywg ho ua tej hauj lwm no los vim lub caij ntuj no thiab yav dhau los uas Hmoob tej neeg zejzog toj siab raug kev txom nyem vim no, dej nyab ces tej neeg nroog yeej pab ris tsho rau lawv hnav tiv no thiab pab cuam ntau yam, ces nkawv thiaj xav tias npaj seb puas tau ib cov zaub (12 tonnes) coj los faib pub dawb rau tej neeg ntawm Chaingmai tau noj pluas puav rau lub caij nyuaj heev no.

Hmong in Chiangmai is loading 12 tonnes of cabbage to give away for free to Chiangmai locals during COVID-19 outbreak to say thank you for helping Hmong in need during difficult time-Phong Yang Source: Courtesy of Phong Yang

Phooj yeej tau qhia ntxiv tias txawm nws thiab nws tus phooj ywg nkawv yog 2 tug xub pib thiab tis npe tias yog Hmoob Chiangmai, tab sis yeej yog ib tsoom Hmoob ntawm ntau lub xeev uas nyob thiab ua luam ntawm Chiangmai nrog rau ntau lub koom haum Hmoob suav 18 xeem nrog yog cov los sib pab sib txhawb thiaj ua tau tej hauj lwm no.

Thawj hnub uas yog hnub tim 16 no xwb 12 tonnes zaub twb tsis txaus faib rau tej neeg li ntawm 2 teev, yog li tseem yuav faib li 10 tonnes ntxiv rau hnub 2 thiab mam xyuas seb puas yuav npaj tau lis cas coj los faib rau tej neeg ntxiv rau hnub 3 ntxiv li cas.

Hmong community in Chiangmai give away free vegetable for Chiangmai local during COVID-19 outbreak - Phong Yang Source: Phong Yang

Phooj kuj qhia ntxiv tias yeej yog ua sawv cev rau Hmoob tej neeg zejzog sawv daws coj los pab kom sawv daws ho muaj kev zoo siab thiab nyiaj ntxeem dhau ntawm tej xwm txheej kab mob coronavirus cov kev tsim kev phom sij no kom rov qab muaj kev cia siab los pib dua neej tshiab.

Qhov tseem ceeb ces nws hais tias tsuas yog nco txog lub caij Hmoob raug kev txom nyem es tau txais kev pab cuam ces thaum sawv daws raug kev txom nyem ces Hmoob tsuas pab me me kom sawv daws muaj kev zoo siab xwb.

Hmong community give free vegetable for Chiangmai locals - Phong Yang Source: Phong Yang

Txhua tus neeg ntawm teb chaws Australia yuav tsum nyob kom nrug ntawm lwm tus neeg deb li 1.5 metres, thiab nom tswv tsuas pub 2 tug neeg ua ke xwb tsuas yog tias ntshe tej neeg ntawd ho yog koj tsev neeg los yog koj yim neeg uas yog tib lub tsev ua ke xwb.

Yog koj ntseeg tias tej zaum koj kis tau tus kab mob virus no lawm, txhob mus ntsib koj tus kws kho mob tab sis hu mus nrog koj tus kw kho mob tham los yog hu mus rau lub koom haum National Coronavirus Health Information Hotline tus xov tooj 1800 020 080. Thiab yog koj txog txog siav ua tsis tau pa thiab mob hnyav heev ces hu rau tus xov tooj 000 thov kev pab cuam tau.

SBS yeej kub siab los qhia tej xov xwm tshiab txog cov kab mob coronavirus (COVID-19) ua 63 hom lus rau Australia tej neeg zej zog. Yog koj xav paub txog ntau yam xov xwm ua ntau hom lus ces koj mus txheeb xyuas tau ntawm sbs.com.au/coronavirus thiab txheeb xyuas tau cov xov xwm no ua ntawv Hmoob thiab lus Hmoob ces mus saib tau ntawm SBS Hmong.

Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm SBS Hmong Facebook thiab subscribe los sis yog download thiab mloog tau ntau cov podcasts (xov xwm ua suab) ntawm google podcasts, spotify, thiab apple podcasts los yog download SBS Radio App kom koj mloog tau SBS Hmong.