America tus thawj tsav meem Donald Trump yeej qhia tias nws yuav tsis maj los sib khom nrog Suav kom daws tau cov teeb meem tsov rog lagluam ntawm 2 lub teb chaws no uas ua lagluam loj tshaj plaws ua zum ib thiab ob hauv ntiaj teb no. Ces tej teeb meem no thiaj cuam tshuam txog Suav lub tuam txhab muag xov tooj Huawei lawm thiab.
Tsis tas li no los Steve Bannon uas yog America tus neeg tawm tswv yim pab tsev dawb tej dej num npaj tseg yuav ua raws tseem tau tawm ib cov tswv yim rau Suav phau ntawv xov xwm South China Morning Post thiab tias, cov kev txwv tsis pub Suav lub tuam txhab telecommunication Huawei ua luam ntawm America thiab Europe ntawd tseem "tseem ceeb tshaj cov kev sib khom lagluam nrog Suav tuam tshoj tshaj 10 npaug lawm thiab."
Huawei yog ntiaj teb ib lub tuam txhab telecommunication technology tseem ceeb li Samsung thiab Apple ntawd, uas yeej xav txhim kho nws tus kheej kom ras los ua ntiaj teb lub tuam txhab muag xov tooj zoo tshaj plaws, tom qab uas Suav tau tsim nws cov 5G network technology coj los siv lawm.
Txawm li cas los, yeej muaj ib txhia teb chaws vam meej (US, UK etc.,) uas muaj Australia nrog thiab yeej txhawj xeeb tias tsam Suav cov xov tooj no yuav ras los ua ib co twj nyiag soj xwm rau tsoom hwv Suav ces yuav tsim tau teeb meem pheej hmoo rau tej teb chaws no cov kev ruaj ntseg haiv.
Mloog tau cov xov xwm txog yuav npaj koj tus kheej li cas thiaj pab kom kom txhob poob hauj lwm vim tej lagluam yuav coj tej tshuab tooj tshuab hlau los siv ntawm no: https://www.sbs.com.au/yourlanguage/services/embeds/audioplayer/cf9c24d4-8708-47b0-b021-e520f8ebdc9a
Yog li ntawd Australia thiaj tau txwv tsis pub Suav tuaj tsim cov 5G network rau Australia siv. Thiab tsis ntev los no los Askiv tus pwm tsav tiv thaiv teb chaws kuj tau ua ib cov xov xwm paim quav cuam tshuam txog lub rooj sab laj uas seb puas cia Suav mus tsim cov 5G network rau Askiv siv ntawd. Ces nws thiaj poob nws txoj hauj lwm no lawm.
Tom qab America tus thawj tsav meem tau qhia txog cov kev txwv no ces Google thiaj yog America thawj lub tuam txhab tau qhia tias nws tsis ua lagluam nrog Huawei lawm.
Tab sis America tseem pub sij hawm 3 hlis rau tej neeg yuav thiab siv Huawei cov xov tooj no updates qee cov Android apps tab sis sawv daws yeej tsis paub tias tom qab dhau lub caij zam no lawm ne ho yuav muaj teeb meem dab tsi ntxiv.
Qhov no txhais tau tias Huawei cov xov tooj yuav tsis muaj peev xwm update tau cov Android Operating System tshiab rau ntau cov apps li Google Play Store, Google Maps, Gmail thiab YouTube ntxiv lawm.
Yog li thiaj muaj ib txhia kws paub zoo txog cov technology thiaj xav kom tej neeg yuav tsum tau ua tib zoo xav kom zoo seb puas yuav tej xov tooj no los siv los yog yuav ua li cas. Tab sis kuj muaj ib txhia cav tias tej zaum Huawei yuav tsim dua ib cov xov tooj tshiab uas txawv tej siv tam sim no coj los siv tib yam li cov siv hauv Suav teb xwb.
Yog tias nws ho ua li ntawd tiag ces tej zaum yuav tau siv nyiaj ntau heev los ua lagluam, thiab tseem muaj ib txhia ntseeg tias xyov tej xov tooj ntawd puas yuav siv tau rau lwm lub teb chaws li tej siv tam sim no lawm. Thiab ntshe Suav yuav tau tsim Suav ib cov network kheej coj los siv lawm xwb.
Askiv lub tuam txhab ARM uas tsim cov mobile device processors los kuj yog lub tuam txhab zum 2 uas tau ua raws li America cov kev txwv tsis ua lagluam nrog Suav lub tuam txhab Huawei lawm thiab. Raws li Askiv lub chaw nthuav xov xwm BBC tau qhia, ces 2 lub tuam txhab no yeej tau tawm los qhia meej tias nkawv tau xaus tsis ua lagluam ua ke lawm.
Qhov no txhais tau tais haj yam ua rau muaj teeb meem loj ntxiv rau Suav lub tuam txhab Huawei cov kev tsim cov xov tooj ntawm tes (Smartphone). Vim yuav cuam tshuam txog cov kev tso cai los siv cov mobile device processor uas siv coj los ua cov xov tooj no. Ces thiaj tsis paub meej tias xyov yuav zoo li cas ntxiv.
Txawm li cas los, Suav tus thawj tsav meem Xi Jin Ping kuj tau mus xyuas Suav lub tuam txhab uas tsim cov rare earth uas Suav tsim tau ntau tshaj plaws hauv ntiaj teb txog 90% thiab America yuav mus siv txog 80% ntawd.
Nqe no tej zaum kuj yuav yog ib lub cim qhia tau tias yog America tseem rau txim ntxiv rau Suav thiab ces tej zaum Suav yuav txwv tsis pub muag rau America kom nws txhob tau siv coj mus tsim nws tej technology lawm thiab los kuj tau.
Mloog tau lwm yam xov xwm ua lus Hmoob tau raws li cov links hauv qab no:
READ MORE
Significance of Hmong flower clothes
