Lub koom haum Reconciliation Australia thiab tsev kawm qib siab University of New South Wales (UNSW) tau tsim dua ib tsab ntawv cej luam tshiab tis npe hu ua 'Coming to Terms with the Past' uas los txheeb txog tej teeb meem uas yuav cuam tshuam txog tej txheej txheem los qhia qhov tseeb txog neeg txum tim tej me nyuam uas nom tswv muab cais tawm ntawm lawv tsev neeg thiab nom tswv tej cai ntau yam.
Yog li Anne Maree Payne uas yog tus coj cov kev teeb txheeb tseem ceeb ntawm tsev kawm qib siab UNSW thiaj hais tias tsis yog tej neeg zejzog neeg txum tim tsuas tham txhob kis tsis zoo nkaus xwb, 'tab sis lawv kuj qhia txog qhov tseeb ntawm cov kev ua kev zoo siab rau lawv tej peev xwm uas tau ntxeem dhau kev txom nyem ntau yam thiab tej kev tawm tsam ntau yam dhau los.'
Txawm li cas los kuj muaj tej neeg txum tim uas koom cov kev teeb txheeb no tshaj ib nrab txhawj tias tsam cov kev qhia qhov tseeb txog tej keeb kwm tau tshwm sim rau lawv yuav ua rau muaj kev sib tawg tswj, kev sib cais thiab qhov sib txawv ntawm Australia tej neeg txum tim thiab tej neeg Australia uas tsis yog neeg txum tim xwb.
Thiab yeej muaj ib nrab ntawm Australia tej neeg txum tim uas tau koom cov kev teeb txheeb tau qhia tias 'ib yam teeb meem tseem ceeb ntawm ntau yam ces yog tseem ua rau lawv ntshai thiab txhawj tias tsam rov qab ua rau lawv nyuaj siab thiab ntshai tej xwm txheej uas tau tshwm sim rau lawv dhau los dua.'
Txawm li cas los Uncle Garry Matthews uas yog ib tug neeg txum tim uas raug nom tswv cais nws tawm ntawm nws niam thiab txiv thaum tseem yog ib tug me nyuam mob liab tau hais tias 'nws yeej tseem ua lub neej nyob ntshai rwg tsam rov qab raug nom tswv tuaj coj mus'. Thiab nws hais tias yog tej yam tseem ceeb peb sawv daws yuav tau los kawm kom paub txog tej kev txhaum tau ua dhau los.
80 xyoo dhau los peb tej neeg Aboriginal thiab Torres Strait Islander yeej raug teeb meem loj tshaj plaws los ntawm tej tsoom fwv dhau los tej cai. Thiab peb tseem mloog tau tias tej cai no tseem ua rau muaj teeb meem rau peb. Yog tias peb tsis qhia qhov tseeb thiab nrog kiag tej neeg txiav txim siab tsim tej cai no siv, ces yeej tsis muaj peev xwm yuav hloov tau ib yam dab tsi tshiab li.Uncle Garry Matthews
Karen Mundine yog tus coj lub koom haum Reconciliation Australia ntawm tsav neeg Bundjalong.
Peb paub tias yog thaum kawg peb xav tsim kom tau ib cov kev pom zoo, los yog peb xav los kho kom muaj kev sib raug zoo ntawm peb cov neeg txum tim thiab lwm cov neeg Australia, ces peb yuav tsum tau mus tshuaj ntsuam thiab txheeb kom tau qhov tseeb tau tshwm sim dhau los, txheeb txog peb tej kev sib raug zoo dhau los thiab tej kev sib raug zoo uas tseem muaj tam sim no. Vim rau qhov tias yog peb tsis los txheeb ces yeej tseem yuav muaj cov kev ua yuam kev li qub txuas ntxiv. Thiab yeej tseem yuav pom muaj tej system lub qub uas siv tsis tau r au peb tej neeg txum tim, thiab muaj qee zaus tseem cais tsis pub peb koom, uas peb yeej tseem pom tas mus li.Chief executive office at Reconciliation Australia, Karen Mundine.
Yog li ntawd tej neeg txum tim uas tau mus koom cov kev teeb txheeb no thiaj ntseeg tias cov kev qhia qhov tseeb yog ib co kauj ruam tseem ceeb yuav pab rov qab tsim kom muaj txoj kev sib raug zoo nrog tej neeg Australia uas tsis yog neeg txum tim thiab nom tswv tej tuam chav.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
