Xov xwm luv tshaj tawm hnub zwj Quag (Tuesday news 12.08.2025):
Tej lus tawm tswv yim txog Australia cov kev lees paub teb chaws Palestinian
Jerely Leibler uas yog tus coj lub koom haum Zionist Federation of Australia tau koom nrog lwm cov koom haum neeg Jews tsis pom zoo nrog thawj pwm tsav Anthony Albanese cov kev lees paub teb chaws Palestine thiab tau qhia rau SBS Hebrew tias nom tswv Palestinian cov kev kub siab cog lus yuav los tswj hwm nws tej nrim chaw xyov puas yuav ua li nws hais thiab tseem tau hais tias cov kev lees paub no yog ib co khoom plig rau tej neeg phem thaum nws teev txog tej xwm txheej Hamas tua Israel sab qab teb tim 7 lub 10 hli ntuj 2023. Tab sis Samina Yasmeen uas yog ib tug zeskais Political Science thiab International Relations thiab yog tus coj lub chaw teeb txheb Muslim States and Societies ntawm tsev kawm qib siab Unversity of Western Australia tau qhia rau SBS Urdu hais tias cov kev lees paub lub teb chaws no tseem ceeb tshaj ib lub cim lawm, vim yuav pab kom neeg Palestinians muaj peev xwm los siv cai pov puag lawv kom tsis txhob raug tej kev tawm tsam sab nrauv.
Tej vaj tse pheej yig uas ntiav tau nyob
Yuav tsim kom tau 45 lub apartment tshiab ntawm Melbourne no coj los ua cov social housing thiab affordable accommodation tam li yog ib feem ntawm tsoom fwv teb chaws Australia cov hauj lwm Housing Australia Future Fund uas siv nyiaj txog li $43 billion. Limtiam dhau los ces twg tsim tau 74 lub appartments tiav ntawm Sydney thiab muaj ib nrab no ces yog cia rau tej neeg yuav ras los ua cov neeg tsis muaj vaj tse nyob thiab tej neeg uas tsis tau tej tsev nyab xeeb nyob mus nyob, ua ke no los lawv kuj yuav tau them tej nqe ntiav tej apartments no pheej yig.
Txo kab theem paj
Kuj tau muaj tej economists ntawm tej tuam txhab nyiaj loj tau koom kwv yees tias txhab nyiaj faj seeb haiv (Reserve Bank of Australia -RBA) yuav txo kab theem paj hnub no tom qab tav su dua thiab ib txhia hais tias tej zaum yuav yog cov kev txo kab theem paj ua zaum lawg rau lub caij ib ntus. (Txawm li cas los tsis yog tag nrho txhuas tus neeg qev nyiaj yuav tsev yuav muaj cai tau txais cov kev txo kab theem paj, tsuas muaj Westpac uas yog ib lub ntawm 4 lub txhab nyiaj loj thiaj txo tsawg zog rau tej customer them xwb yog tias lawv tsuas them minimum xwb).
Australia cov kev sib raug zoo nrog cheeb tsam Pacific Island
Tau muaj Australia 3 tug nom li lwm thawj pwm tsav Richard Marles, Penny Wong uas yog tus nom tswj dej num txawv teb chaws xyuav mus xyuas qee lub teb chaws ntawm cheeb tsam Pacific li Papuas New Guinea (PNG) thiab Vanuatu kom muaj kev sib raug zoo thiab koom tes rau cov hauj lwm kev ruaj ntseg. Mr Marles yuav mus xyuas PNG hnub no thiab ntsib James Marape thiab lub teb chaws no tus nom tswj dej num tub rog ces nws mam yuav mus koom Penny Wong thiab Pat Conroy uas tswj tej dej num cuam tshuam txog cov teb chaws Pacific yuav mus xyuas teb chaws Vanuatu uas lawv yuav mus ntsib Jotham Napal thiab tham txog cov Nakapal Agreement.
Meskas rub sij hawm rau Suav kom sib khom lagluam
Meskas tus President Donald Trump tau kos xyeem mem tes ncua tsis tsub cov se tshiab rau Suav rau lub caij 3 hlis ntxiv no ces ua rau Suav tsis raug tsub tej se tshiab uas Trump tsub rau ntau lub teb chaws. Ces thiaj tau cheem tsis tsub se sib pauj ntawm Meskas tsub 145 feem pua rau Suav tej khoom, hos Suav tsub 125 feem pua rau Meskas tej khoom xav muag rau Suav.
Trump xa national guard mus tswj Washington DC
Tsoom fwv Trump tau txig 800 tus national guard mus rau Meskas lub tuam ceeb Washington DC thiab pub lawv muaj cai tshaj tej tub ceev xwm ntawm lub nroog no. Lub hom phiaj yog tshem tej neeg tssi muaj vaj tse nyob thiab tej neeg ua txhaum cai ntawm lub nroog no tawm uas tau ua rau muaj kev rwg npoj tawm tsam tsis pom zoo nrog tus tsoom fwv no tej tswv yim no.
Mloog tau xov xwm ntxiv ntawm SBS Hmong lub vas sab, download SBS Adio app thiab caum SBS Hmong Facebook page.
