TEJ LUS THEEJ LOS NTAWM ZAJ XOV XWM NO:
Kwv yees tias tej zaum ntshe yuav muaj neeg Australia yuav laug txog peb lab tus yuav txiav txim tias seb puas xav tso tseg tsis ua lawv tej hauj lwm xyoo tom ntej no lawm.
Txawm tias yeej muaj tej neeg paub txog tej teeb meem nyuaj siab ntxhov plawv ntau tuaj ntxiv, los tsoom fwv tej cai tshiab uas tej neeg ua hauj lwm tsis tas teb tej tswv lagluam tej xov tooj thiab email uas tau coj los siv tsis ntev los no, thiab cov kev muaj tej neeg coob tuaj ntxiv ua hauj lwm ntawm tsev, los yeej tseem muaj xwm txheej sab thiab nkees rau yus lub cev ntaj ntsug thiab siab ntsws ntawm tej chaw ntau zuj zus tuaj ntxiv.
Yog tim dab tsi thiaj ua rau muaj tej teeb meem no?
Associate Professor Ross Iles yog tus tuam thawj saib xyuas cov kev tshawb fawb ntawm lub koom haum Superfriend uas yog ib lub koom haum tsis nrhiav nyiaj uas pab cob qhia thiab txhawb nqa tej koom haum kom tau txais kev kaj siab.
Nws hais tias kaum xyoo dhau los tej xwm txheej ua hauj lwm sab uas ua rau tej neeg ua hauj lwm sab lawv lub cev ntaj ntsug thiab nkees siab ntsws tseem yog ib cov teeb meem uas muaj ntau heev thiab.
"Yog thaum peb txheeb txog ib co lagluam twg tsi ntsee piv txwv li tej lagluam muag khoom, lagluam kho noj qab haus huv, thiab kev kawm lawm ces cov xwm txheej nkees thiab sab rau tej neeg mob lub cev ntaj ntsug thiab siab ntsws yog tej tseem ceeb zuj zus tuaj ntxiv lawm. Qhov tseeb tiag ces yeej yog ib co xwm txheej uas phem zuj zus ntxiv lawm. Thiab raws li peb tau txheeb tej xov xwm 10 xyoo, ces peb kuj tau pom tias yeej muaj tej neeg ua hauj lwm thiab tej tswv lagluam nkag siab txog cov kev nyuaj siab ntxhov plawv ntau tuaj ntxiv ntawm tej chaw ua hauj lwm lawm, thiab tej neeg yeej xav tias lawv tej chaw ua hauj lwm yog ib co chaw uas pab kom lawv tau txais kev noj qab nyob zoo thiab kaj siab. Tab sis txawm tias tau muaj neeg paub txog tej no ntau ntxiv tuaj los zoo li peb yeej tseem tsis tau pom muaj cov kev pauv hloov dab tsi ntau rau tej kev sab thiab nkees rau lub cev ntaj ntsug thiab siab ntsws rau lub caij ntawd li. Thiaj pom tias yeej tseem tsis tau muaj tej kev pauv hloov no sai txaus tib yam li tej kev ua hauj lwm uas pheej ua rau tej neeg ua hauj lwm sab thiab nkees rau lawv lub cev ntaj ntsug thiab siab ntsws."
Kev sab thiab nkees rau cev ntaj ntsug thiab siab ntsws zoo li cas?
Yeej muaj ntau yam sib txawv qhia txog cov kev sab thiab nkees rau lub cev ntaj ntsug thiab siab ntsws no, tab sis tej kws hais itas yeej muaj ob peb yam cim uas pom muaj tas mus li uas tsim nyog peb kub siab txog.
Uas yog cov kev mloog tau tias yus raug cais nyob tib leeg twm zeej kho siab khuav, kev xeeb txob meem txom thiab pheej ua rau yus qaug dag zog.
Tej no ua rau tej neeg ua hauj lwm tsis muaj kev txaus siab rau tej hauj lwm lawv ua, los yog ua rau lawv tsis tshua xav ua tej hauj lwm uas lawv xav tias yog ib co tseem ceeb li lawv ib txwm xav lawm.
Tej xwm txheej no yuav ua rau cuam tshuam txog lub cev ntaj ntsug thiab, xws li tej zaum kuj ua rau mob taub hau ntau tuaj ntxiv thiab mob ib ce los yog pheej ua rau lawv pw tsis tsaug zog zoo.
Ross Iles hais tias yeej muaj cov kev nyuaj siab ntxhov plawv no yog ib co ntawm ntau cov uas tau ua rau muaj teeb meem ntau tshaj plaws rau tej lagluam kho mob, kev kawm thiab muag khoom.
“Ntawm tej lagluam ua hauj lwm kho mob, ces peb yeej muaj peev xwm txheeb tau ntau yam uas yuav ua rau tej neeg ua hauj lwm ntau dhau heev lawm uas yuav muaj tej yam ntxwv muaj teeb meem rau lawv lub cev ntaj ntsug thiab muaj kev nyuaj siab ntxhov plawv. Thiab cov kev nyuaj siab ntxov plawv yog ib co uas muaj ntau tshaj plaws. Vim pheej ua rau tej neeg txhawj thiab ntxhov siab txog txhua yam ntawm lawv lub neej. Yog thaum tej neeg ntsib tej xwm txheej li no rau ib lub caij ntev heev ces yeej yuav ua rau lawv muaj teeb meem rau lawv lub cev ntaj ntsug thiab ua rau lawv nyuaj siab ntxov plawv ntau tuaj ntxiv thiab zoo li lawv yeej yuav qhia tej xwm txheej no rau lwm tus paub ntau tuaj ntxiv."
Lub koom haum Allianz Australia cov kev tshawb fawb tshiab qhia tias yeej muaj plaub tug neeg ua hauj lwm ntawm tsib tug twg uas tau koom cov kev tshawb fawb hais tias lawv tej chaw ua hauj lwm tsis nrog xyuas kom coj tej cwj pwm yuav pab kom lawv tau txais kev noj qab nyob zoo thiab yuav tau teev kom meej tias tsuas tsim nyog ua hauj lwm li cas xwb.
Tej neeg uas tau koom cov kev tshawb fawb hais tias muaj hauj lwm ua ntau heev, yuav tau koom tej rooj sab laj ntau heev, thiab pheej kom lawv ua tej hauj lwm kom tiav rau ib lub caij twg uas tej zaum tsis muaj peev xwm ua kom tiav uas tau ua rau tej neeg no ntsib teeb meem nyuaj siab ntxhov plawv.
Mark Pittman yog tus thawj coj uas tswj cov hauj lwm saib xyuas tej neeg cov kev raug mob ntawm lub koom haum Allainz Australia hais tias cov kev tsis tau so kom txaus kom tsis txhob nyuaj siab heev yuav ua rau haj yam nyuaj siab ntau tuaj ntxiv.
"Cov kev tshawb fawb no qhia tias tej neeg ua hauj lwm uas pheej tsis tshua muaj peev xwm npaj caij nyoog rau lawv tus kheej, thiab pheej tsis muaj peev xwm cais tias tej hauj lwm hauv lub cuab yig sib npaug nrog lwm tus, thiab tsis muaj tej neeg yuav pab lawv ua tej hauj lwm ntau yam yuav tau ua rau ib hnub twg li xa thiab tos me nyuam kawm ntawv ntawd. Ces peb thiaj txhawb nqa kom neeg Australia no ua tib zoo xyuas kom tau so raws li qhov tsim nyog, teev kom tseeb tias tsuas ua dab tsi xwb, thiab xub ua tej ua ntau yam yuav pab kom yus ntxeem dhau ntawm tej kev nyuaj siab rau cov kev ua hauj lwm uas yuav pab kom yus tsaug zog los kom tau ua exercise, thiab xyuas kom muaj cov kev pauv hloov me ntau yam kom thiaj pab tiv thaiv kom tsis txhob ntsib tej teeb meem no."
Yeej muaj tej neeg ua hauj lwm yuav laug txog li ntawm 6 tus ntawm 10 tus twg uas tau mus koom cov kev tshawb fawb no yeej qhia tias tej ntsib kev nyuaj siab ntxov plawv ntawm tej chaw ua hauj lwm, ces thiaj tsis yog tej yam ua rau peb ceeb dab tsi uas pheej muaj tej neeg tau mus thov cov psychological compensation claims ntau tuaj ntxiv yuav laug txog 30 feem pua.
Raws li cov kev tshawb fawb no qhia ces cov kev nyuaj siab ntxhov plawv thiab tej teeb meem ntawm tej chaw ua hauj lwm yog ob co uas pheej ua rau tej neeg mus thov cov psychological compensation claims ntau tshaj plaws ua zum ob.
Mark Pittman hais tias muaj peb yam tseem ceeb uas tej chaw ua haujlwm muaj peev xwm ua coj los pab tiv thaiv kom tsis txhob ntsib cov xwm txheej ua hauj lwm ntau dhau thiab sab dhau uas pheej ua rau tej neeg qaug zog thiab nyuaj siab ntxhov plawv:
"Peb cov kev teeb txheeb no tshawg tau tias peb yam uas cov neeg ua haujlwm xav tau tshaj yog — thawj yam ces yog cov kev cob qhia tej coj ntawm tej chaw ua hauj lwm kom paub pab kom tej neeg ua hauj lwm tau txais kev noj qab nyob zoo, ob tuaj ces xyuas kom tej neeg ua hauj lwm tau ua tej hauj lwm tsis tshua tseem ceeb pes tsawg kom tsawg zog thiab yam kawg ces yuav tsum tau xyuas kom tsim cov hnub los txhawb nqa kom tej neeg tsis txhob nyuaj siab ntxhov plawv."
Txawm tias yus tus kheej cov kev tswj kom tsis txhob tau ua tej hauj lwm ntau uas yuav ua rau yus qaug zog thiab nyuaj siab ntxhov plawv thiab cais kom meej tias yus tsuas ua tej hauj lwm dab tsi nrog yus tej tswv lagluam xwb lo yog tej yam tseem ceeb uas zeskais (Professor) Ross Iles hais tias tej thawj choj ntawm tej chaw ua hauj lwm yeej muaj lub luag hauj lwm yuav tau nrog xyuas kom tsim kom tau tej chaw ua hauj lwm uas tau txais kev noj qab nyob zoo thiab.
Nws hais tias dua ntawm cov kev so tsis tu ncua, kev muaj peev xwm ua tej tej hauj lwm, thiab cov hnub pab kom tau txais kev kaj siab, thiab cov kev txhawb nqa kom muaj kev sib raug zoo ntawm tej chaw ua hauj lwm yog ib co tseem ceeb uas yuav pab kom tej neeg tsis txhob nyuaj siab.
"Txawm tias peb yeej tau tswj tau tej xwm txheej no zoo tuaj ntxiv lawm los, peb kuj yeej tseem pom tias muaj neeg tej neeg Australia ua hauj lwm tsawg dua ib nrab thiaj tuaj yeem nrog lawv tej coj ntawm tej chaw ua hauj lwm tham txog cov kev nyuaj siab ntxhov plawv xwb, thiab peb yeej tseem pom tias yeej tsis tau muaj cov kev pauv hloov dab tsi ntau. Ces thiaj yog tej yam tseem ceeb uas peb yuav tau xyuas kom tsis txhob muaj neeg ntau nqe yuam kev rau tej xwm txheej no mas thiaj yuav pab tiv thaiv kom tsis txhob ntsib tej xwm txheej no ua hauj lwm ntau ua rau tej neeg qaug zog thiab nyuaj siab ntxhov plawv no. Thiab kuv xav tias qhov tseem ceeb tshaj plaws ces peb yuav tau xyuas kom tej neeg muaj kev sib cuag tau nrog lwm tus thiab seb ho yuav ua li cas los txhawb nqa kom muaj kev sib raug zoo nrog lwm tus thiab xyuas kom tej chaw ua hauj lwm yog ib co chaw zoo ua hauj lwm. Tsis txhob xav tias lam cia li ua tau tej no xwb tab sis yog yuav tsum txhawb nqa kom muaj cib fim rau tej neeg ua hauj lwm tau sib cuag sib txuas lus tau nrog lwm tus thiab."
