Nom Vaj Thoj tau qhia rau xov tooj cua SBS Hmoob program tias nws tau tus mob raum hu ua ''IgA nephropathy''. Thiab raws li lub koom haum Mayo Clinic hais ces yog ib yam mob uas cov protien hu ua immunoglobulin A ua rau lub raum o thiab lim tsis tau tej dej tsis huv los yog tej taug tawm hauv lub cev.
Nws tau hais tias yog thaum yus mob raum lawm ces yuav tau mus ntsib kws kho mob rau lub sij hawm sib txawv li ib xyoos ib zaug, ib xyoos ob zaug, ib xyoos peb zaug los ua peb hlis ib zaug los yog ib hlis ib zaug, thiab tej kws kho mob yeej ntsuam yus tej ntshav txhuas zaus yus mus ntsib lawv tias seb yus lub raum tseem ua tau hauj lwm zoo li cas xwb. Thiab nws kuj hais ntxiv tias ''qhov uas yuav lim thiab tsis lim no mas nyob ntawm seb yus mloog tau yus lub cev zoo li cas lawm xwb.'' Ces tej kws kho mob yeej qhia rau yus tias lawv yuav coj yus mus npaj kom nkag siab thiab paub txog tej txheej txheem ntawd tias yus yuav mus lim li cas.
Tab sis Nom Vaj Thoj tau tham txog tej xwm txheej mob raum uas tau tshwm sim rau nws tus kheej rau SBS Radio Hmong program tias yog thaum muaj teeb meem mob yus lub raum lawm ces tej kws kho mob tsuas muaj 3 txoj xub ke rau yus xaiv xwb:
1. ''Txoj ib ces peb tsis ua dab tsi li. Txoj no ces peb tsuas pub 5 xoos rau koj nyob. Yog koj xaiv txoj no ces peb mam muab tshuaj rau koj noj, peb mam pab kom kom comfortable npaum li peb pab tau."
2. ''Txoj ob ces koj mus lim dej'' (Peritoneal dialysis). Uas yog ib co txheej txheem uas tej kws kho mob tho yus lub plab thiab tso ib txoj xov roj hmab kom tso tau dej mus pab rau kim nruab nrab ntawm yus daim phiaj ziam rau tej plab hnyuv kom pab lim tej dej tsis huv, ces mam nqus tej dej tsis huv no tawm. Nqe no ces raws li Mr Thoj hais ces yus kuj muaj peev xwm xaiv tias seb yus xav lim ntawm tsev los yog lim ntawm tsev kho mob thiab seb yuav lim lub caij nruab hnub los tsaus ntuj kom haum raws li yus txoj kev ua lub neej thiab.
3. ''Txoj peb ces yog yus mus lim ntshav'' (Hemodialysis). Cov kev lim ntshav no los kuj yuav tau hno koob rau yus txoj leeg ntshav thiab nqus yus tej ntshav coj mus lim ntawm lub tshuab kom huv ces mam rov qab xa yus tej ntshav nkag rau yus lub cev.
Ib qho uas Mr Thoj tau qhia ces yog thaum yus lub raum tsis ua hauj lwm zoo lawm ces yuav ua rau yus qhov ncauj tej pa los yog lub cev tsw phem.
Tab sis Nom Vaj Thoj kuj hais tias kws kho mob qhia rau nws tias cov kev lim dej no siv tsis tau hauj lwm zoo rau nws ces nws thiaj yuav tau hloov mus siv txoj xub ke peb uas yog cov kev lim ntshav (Hemodialysis) ntawd lawm.
Txawm li cas los nws kuj hais tias nyob ntawm seb tej kws kho mob tshem dej tawm hauv yus lub cev ntau los tsawg raws yus lub cev xwb, tab sis yeej ua rau yus ua mem mus qus ces yus yuav tau noj los yog haus ib yam dab tsi thiab zaum los yog so ntawm ib lub rooj twg txog li 30 ntiag tiv kom yus lub cev rov qab muaj zog tuaj. Mr Thoj kuj tau qhia tias nws muaj hmoo uas nws poj niam yog tau pab tau nws ntau yam piv txwv li pab coj nws mus zaum rau hauv tsheb tom qab lim tag, los yog pab tsav tsheb vim nws tsis muaj zog tsav tsheb, kom lub sij hawm caij tsheb kom thiaj tau pw kom tsis txhob sab sab.
Nws tau qhia ntxiv tias yeej muaj ob txoj xub ke rau yus xaiv lim ntshav thiab, xws li, txoj ib ces yus mus lim ntawm tsev kho mob. Mr Thoj qhia tias yeej muaj tej tub koom siab Hmoob coob tus tau mus lim thiab. Tab sis yog tham txog nws ntiag tug lawm ces nws mus lim 3 zaug rau ib limtiam twg lim ib zaug twg ntev txog li 5 teev.
Txoj ob ces yus mus kawm thiab tau ib lub tshuab ntawm tsev kho mob coj los siv lim yus ntawm tsev. Thiab tsev kho mob yeej tuaj nrog xyuas kom muaj dej siv thiab npaj yus lub tsev kom siv tau lub tshuab lim ntshav ces lawv mam li thauj lub tshuab ntawd tuaj rau yus siv ntawm tsev. Mr Thoj qhia tias nws lim hmo ntuj ua ntej yuav mus pw kom nruab hnub nws thiaj muaj caij mus ua tau kam. Tab sis nws qhia tias nws yuav tau lim ntshav txhua txhua hmo.
Yog tham txog txoj kev siv lub sij hawm nrog yus tsev neeg nyob, tham txog yus txoj kev ua lub neej thiab cov kev ua kam rau lub caij yus yuav tau lim ntshav ntawd ces Nom Vaj Thoj tau qhia rau SBS Radio Hmoob program tias ''Txoj kev lim ntshav no yog ib txoj kev txom nyem heev, tsuas yog ua rau yus muaj txoj sia nyob xwb. Ces ua rau yus tsis muaj sij hawm mus rau ib qho qhov twg li. Thaum yus lim tag los ces yus nkees nkees, ua tsis tau dab tsi, los txog tsev ces los pw xwb. Tab sis tag kis hnub tshiab ces yus lub cev rov qab ua tau hauj lwm zoo li qub lawm. Ces yus nrog yus tsev neeg nyob tau thiab ua dab tsi los ua tau lawm. Tab tsaus ntuj zus ces yus mloog tau tias zoo li muaj tej dej tsis huv los yog tej taug ntxeem rau yus lub cev lawm ces ua rau yus xav rov qab mus lim dua lawm."
Mr Thoj qhia ntxiv tias muaj ib qho zoo ntawm cov kev lim ntshav ntawm cov teb chaws vam meej no thiab xws li txawm yus mus txawv xeeb los yog mus txawv teb chaws ces yog yus npaj thiab teem caij rau ntawm tej tsev kho mob uas yus yuav mus holiday li mus txawv xeev los yog txawv teb chaws ntawm qhov chaw yus mus ntawd ces, thaum mus txog ces yus yeej tseem lim tau ntshav li yus ib txwm lim tau thiab.
Lus ceeb toom:
Zaj lus tham no tsuas yog tham raws li Nom Vaj Thoj cov personal experience xwb, tsuas yog tej yam qhia ua kev paub rau sawv daws rau seem dav dav xwb, tsis yog ib cov kev taw qhia kom ib tug twg ua los yog qog qab raws. Yog li ntawd yog tias koj ho yog ib tug neeg mob raum thiab ces xav kom koj yuav tau mus ntsib koj tus kws kho mob uas paub kho tej mob raum no tsi ntsees, thiab nrog lawv tham los yog sab laj kom thiaj pab kho tau koj. Yog tias koj tsis sab laj nrog koj tej kws kho mob los yog tsev kho mob thiab tej neeg kho mob thiab thov kev pab cuam los pab kho koj es koj ho cia li lam tau lam qog qab thiab ua raws li tej lus uas Nom Vaj Thoj piav txog nws tej personal experience uas faib qhia nrog SBS Radio Hmong program no, ces tsis muaj teeb meem dab tsi los tseg, yog muaj teeb meem ces koj yuav yog tus uas yuav tsum tau ris tej teeb meem uas tau tshwm sim no kheej xwb SBS Radio Hmong program yus tsis nrog koj lees paub dab tsi.
Mloog tau SBSHmong, rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Googlepodcasts, Spotify thiab Apple podcasts los yog download SBS Audio App thiab SBSHmongpodfollow
kom koj mloog tau SBS Hmong.
