Hauv paus xov xwm:
- Tsoom fwv Albanese tsab cai penalty rate.
- Australia them nyiaj $800 million ntxiv rau cov hauj lwm AUKUS deal.
- Japan tus thawj pwm tsav yuav tawm tsis ua nws tus nom lub hlis tom ntej no.
Xov xwm luv tshaj tawm hnub zwj Teeb (Thursday news 24.07.2025):
Russia thiab Ukraine cov kev sib khom
Teb chaws Turkey yuav ua tus tswv cuab tswj cov kev sib tham ntawm Russia thiab Ukraine ua zaum peb ntawm Istanbul tom qab tau ntau limtiam los no uas tsis muaj peev xwm sib khom tau lus tseem ceeb dab tsi, thiab tau ua rau Meskas tus President Trump tau tsub nias tias yog Russia tsis kub siab sib khom kom tsim tau kev thaj yeeb rau Ukraine ces nws yuav raug txim lagluam tshiab rau Russia.
Japan tus thawj pwm tsav yuav tawm tsis ua nws tus nom
Shigeru Ishiba uas yog Japan tus thawj pwm tsav uas nyuam qhuav ua nom tsawg dua ib xyoo no tau qhia tias thaum xaus lub hli ntxiv tom ntej no ces nws yuav tawm tsis ua nws tus nom ntxiv lawm, tom qab nws tus tsoom fwv tau swb cov rooj nom feem coob hauv tsev kis xeev siab. Tau muaj tej chaw nthuav xov xwm qhia tias muaj tej xwm txheej no tom qab Mr Ishiba tau thiab Mr Trump tau sib tham thiab qhia txog nkawv ib cov kev sib khom kom tsub se tsawg rau Japan tej tsheb thiab yuav zam tej se kim rau Japan lwm cov khoom uas yua xa muag rau Meskas. Txawm li cas los ntshe kuj yuav muaj cov pab nom tshiab tsim teeb meem nyuaj rau pab nom Liberal Democratic Party no rau nws cov kev yuav nrhiav tus coj tshiab thiab.
Penalty rate
Amanda Rishworth uas yog tus nom tswj dej num ntiav dag zog yuav coj ib tsab cai los sab laj hnub no ntawm tsev tsoom fwv kom tej neeg ua hauj lwm casual rau cov hnub so tau nyiaj hauj lwm ntau tuaj ntxiv. Tab cai uas tseem xav thov tsim coj los ua cai siv no yuav teev cov penalty rate thiab overtime rate kom siv tau raug cai, txhais tau tias tej neeg ua hauj lwm tos txais qhua yuav khwv tau nyiaj ib teev twg txog li $40 rau cov sij hawm ua hauj lwm rau ob hnub so. Lub hom phiaj yog coj los daws tej xwm txheej uas tej neeg ua hauj lwm tseem tau cov nyiaj industry awards ntau yam sib txawv, tab sis tej zaum kuj yuav tsis coj tsab cai no coj mus siv rau tag nrho tej neeg ua hauj lwm thiab tej tswv lagluam uas twb sib khom raws li ib co kev pom zoo twg lawm. Cov kev pov puag tej penalty rate yog tsoom fwv Albanese ib co kev cog lus tseem ceeb rau lub caij sib tw nom ua ntej yuav xaiv tsa tsoom fwv teb chaws lub 5 hlis ntuj 2025 dhau los.
Pab nom Greens tej lus tawm tswv yim txog Senator Faruqi
Larisa Waters uas yog tus coj pab nom Greens tau tsis pom zoo nrog tsev kis xeev siab ib co kev tawm suab rau txim rau senator Mehreen Faruqi cov kev tsa ib daim phiaj sau lus tawm tsam tias ''Gaza tab tom tshaib nqhis. Tej lus dawb lus do yeej nrhiav tsis tau zaub mov rau lawv noj. Rau txim rau Israel.'' Txawm tau muaj cov kev txwv no thiab Senator Penny Wong uas yog Australia tus nom tswj dej num txawv teb chaws tau hais tias ''tej no yog tej cwj pwm tsis tsim nyog ua hauv tsev kis xeev siab'' yog ib co kev tsis hwm tsev kis xeev thiab tsuas ua kom lwm tus kub siab txog nws xwb, los nws yeej tseem muaj peev xwm ua tau hauj lwm li qub. Waters tau qhia tias ''yog tej yam txaus txaj muag uas tseem hais li ntawd thiab tsis kub siab txog tej poj niam, me nyuam thiab tej txiv neej uas tab tom tshaib nqhis ntawm Palestine.''
Pej kum haiv lub tsev hais plaub International Court of Justice (ICJ) cov kev txiav txim rau tej xwm txheej huab cua pauv hloov
UN tus coj tau zoo siab rau pej kum haiv lub tsev hais plaub International Court of Justice (ICJ) cov kev txiav txim siab hais kom ntau haiv neeg yuav tau kub siab los tiv thaiv thiab daws tej teeb meem huab cua pauv hloov li tej cai tau teev tseg. Thiaj tau muaj tej kev txiav txim no tom qab uas zoo li ntau lub teb chaws tsis kub siab los ua tej tsim nyog ua coj los pov puag tej ib puag ncig kom tsis txhob raug kev puas tsuaj ntawm tej huab cua pauv hloov. Txawm ltias cov kev txiav txim no tsis yog ib co uas tej teb chaws yuav tsum tau ua raws los, kuj yog ib txoj xub ke yuav ua rau ib lub teb chaws twg muaj peev xwm coj lwm lub teb chaws coj mus hais plaub yog tias nws tsis kub siab daws tej teeb meem no.
AUKUS Morrison thiab AUKUS payment
Scott Morrison uas yog Australia tus qub thawj pwm tsav dhau los kuj tau mus hais lus ntawm Meskas lub tsev tsoom fwv thiab hais kom haiv neeg no kho kom muaj kev sib raug zoo nrog nws ntau lub teb chaws phooj ywg uas yuav ua rau raug teeb meem lagluam thiab tsis tau txais kev ruaj ntseg ntawm Suav tuam tshoj. Tab sis Mr Morrison yeej tsis teev txog cov kev pom zoo AUKUS uas nws tau kos xyeem mem tes nrog tsoom fwv Trump rau lub caij uas Meskas tseem txheeb cov kev pom zoo no. Ua ke no los phau ntawv xov xwm Sydney Morning Herald (SMH) kuj tau qhia tias Australia tau them nyiaj $800 million ntsiag to rau Meskas rau cov hauj lwm AUKUS deal no rau 3 lub hlis txog rau lub 6 hli ntuj xyoo 2025 no ces thiaj ua rau Australia tau them tag nrho cov nyiaj no txog li $1.6 billion rau Meskas lawm. Tab sis kuj muaj tsoom fwv ib tug kis tau qhia rau SMH tisa yuav them tshaj $3 billion rau thaum xaus xyoo no coj mus pab Meskas tsim cov nkoj nuclear submarine. Uas Australia tus thawj pwm tsav tam sim no thiaj tau qhia rau ABC cov Afternoon Briefing tias "Peb yeej tau npaj lawm tias yuav them rau Meskas, thiab yeej tau muaj cov kev pom zoo nrog Meskas thiab Askiv lawm. Cov nyiaj coj mus pab tsim cov nkoj no yog pab kom peb tej neeg tau kawm kom paub ua cov nkoj SSN AUKUS uas yuav tsim ntawm Australia no thiab kom peb thiaj paub ua.''
Ntau txheeb tus yuav poob hauj lwm ntawm cov lagluam khawb peev txheej
Tau muaj ib lub tuam txhab khawb peev txheej zejzog pej kum haiv xav tau nyiaj pab cuam rau nws cov kev ua luam kom sai kiag tam sim no thiab xav tau txais kev pab nom tsoom fwv kom nws thiaj ua tau lagluam txuas ntxiv tsis li ntawd ces ntshe yuav ua rau ntau txheeb tus neeg poob hauj lwm. Glencore hasi tias nws cov kev nchuav tooj ntawm North Queensland yuav poob nyiaj txog li $2.2 billion rau lub caij 7 xyoo ntxiv no.
Cov kev yuav tsis tau hauj lwm ua ntawm Transport New South Wales
Raws li lub chaw nthuav xov xwm ABC thiab Guardian Australia tau qhia ces ntshe yuav muaj neeg poob hauj lwm txog li 950 txoj uas yog cov corporate thiab support roles ntawm lub tuam chav Transport New South Wales rau lub caij nws kho lub tuam chav hauj lwm no kom thiaj tau nyiaj los tsim cov kev pab cuam tsim nyog yuav tau xub ua ua ntej.
Txheeb seb tej me nyuam yaus puas kis kas cees
Ben Carroll uas yog tus lwm hau xeev Victoria hais tias kuj tsis pom tias tej me nyuam yaus txog li ntawm 2,000 tus ntawm tej childcare centres uas muaj feem cuam tshuam nrog Joshua Dale Brown uas tau ua phem rau 8 tus me nyuam yaus uas raug teem cov txim tshaj 70 lub txim rau raug txheeb tau tias kis tau kab mob kas cees dab tsi.
Khaub zeeg cua Wipha ua rau dej nyab thiab ntuj los nag hlob
Nom tswv Nplog lub tuam chav kwv yees huab cua tau qhia tias lub khaub zeeb cua Wipha uas pib ntawm Philippines los hla rau sab qaum teb Cob tsib tau ua rau muaj nag hlob thiab dej puv tej dej thiab muaj dej nyab rau ntau cov xeev sab qaum teb los txog rau xeev Khammuane nruab nrab teb raws li Vientiane Times tau tshaj tawm.
