Lub limtiam Loneliness Awareness Week (4-10 August) no thiaj tau muaj cov kev qhia txog qhov tseem ceeb ntawm cov kev sib cuag tau nrog lwm tus ntawm yus tsev neeg, tej chaw ua hauj lwm, tej teej kawm, hauv online thiab tej zejzog. Thiab tau nqua hu kom tsim tej program hauv tej zejzog kom muaj ib qho chaw twg rau tej neeg tau ua chaw sib ntsib sib cuag, tau koom dawb los yog them nqe me ntsis kom tej hluas tau tsim kev sib raug zoo nrog lwm tus.
ces Associate Professor Michelle Lim uas yog tus Chief Executive thiab Scientific Chair ntawm lub koom haum Ending Loneliness Together hais tias tsab ntawv cej uam tshiab txheeb tau tias ''muaj Australia tej hluas ntau zuj zus tuaj ntxiv pheej mloog tau tias lawv nyob tib leeg twm zeej kho siab khuav thiab pheej poob rau tej xwm txheej li no tas mus li.''
Nws qhias tias tam sim no ces muaj Australia tej hluas hnoob nyoog 15 txog 25 xyoos yog cov tab tom ntsib cov xwm txheej nyob tib leeg kho siab khuav no.
Cathy Kezelman uas yog tus coj ntawm lub koom haum Blue Knot Foundation ces yog lub koom haum pab tej neeg uas ntsib ib yam xwm txheej ua rau lawv tau ntshai rau thaum lawv tseem yau li raug lwm tus tsim kev kub ntxhov rau, raug ua phem rau, tsis raug kub siab, thiab raug yuam siv yam tsis raug cai yog cov uas pheej ntsib cov xwm txheej nyob tib leeg kho siab khuav no tas mus li. Ces thiaj ua rau lawv pheej tsis xav mus poo mus koom lwm tus thiab pheej raug cais ntawm tej zejzog.
''Tsis tas li ntawd los yog yus tseem yog cov neeg muaj mob, ntsib kev nyuaj siab ntxhov plawv, poob hauj lwm, txom nyem nyiaj txiaj siv thiab ces haj yam yuav ua rau yus mloog tau tias yus nyob tib leeg twm zeej kho siab khuav thiab,'' raws li Professor Lim hais.
New South Wales pawg rooj saib xyuas Standing Committee on Social Issues cov kev mus txheeb txog tej teeb meem muaj tau los ntawm cov kev nyob twm zeej kho siab khuv txheeb tau tias muaj tej xwm txheej no ntau tuaj ntxiv thiab thiaj tau muaj 20 cov kev taw qhia.
Lauren Stracey uas yog tus coj lub koom haum Youth Action New South Wales thiaj qhia tias yuav tsum tau ua tib zoo xyuas kom npaj tau ib co chaw rau Australia tej hluas tau mus sib ntsib sib cuag thiab ntau phooj ywg nrog lwm tus hlua rau lub caij uas Australia yuav txwv tsis pub tej hluas hnoob nyoog qes dua 16 xyoo qhib social media account siv txij lub 12 hlis ntuj xyoo 2025 no mus.
Mloog tau xov xwm ntxiv ntawm SBS Hmong lub vas sab, download SBS Adio app thiab caum SBS Hmong Facebook page.
