Cov xwm txheej nyob twm zeej yog ib co xwm txheej loj ntawm teb chaws Australia thiab zoo li yeej muaj ntau zuj zus ntxiv.
Cov kev raug cais raug cais tsis muaj feem koom nrog tej zejzog ua rau Australia tej txiv neej ntsib kev nyuaj siab ntxhov plawv thiab ua rau tsis tau txais kev noj qab nyob zoo, ua ke no los kuj ua rau Australia yuav tau siv nyiaj ib xyoos twg yuav laug txog 3 billion dollars ($AUD 2.7 billion) raws li Associate Professor Michelle Lim ntawm University of Sydney lub tuam chav Publich Health hais.
Nws hais tias "Vim rau qhov tej kev nyob twm zeej no ua rau tej neeg tsis xis nyob ntev dua rau ib lub caij twg, thiab ua rau pheej tau mus ntsib kws kho mob ntau zaus los yog tau kho ntawm tsev kho mob ntev dua, ces thiaj ua rau peb tau them ntau yam nqe. Tab sis peb yeej tseem tsis tau muaj ib txoj xub ke los daws tau tej xwm txheej no."
Raws li lub koom haum Royal Australian College of General Practitioners hasi ces yeej muaj 1 tug ntawm 5 tug neeg Australia hnoob nyoog 15 xyoo rov sauv yeej tau ncua los yog lug tsis mus siv cov kev pab daws kev nyuaj siab vim tej nqe kim.
Thiab raws li tau muaj ib co kev teeb txheeb tshiab yuav muaj epev xwm teb tias tim dab tsi thiaj ua rau tej txiv neej mloog tau tias zoo li lawv yog cov neeg nyob twm zeej kho siab khuav.
Txawm li cas los yog muaj peev xwm hloov tej cwj pwm ua lub neej thiab muaj feem koom thiab sib cuag nrog lwm tus ces kuj yuav pab daws tau tej teeb meem no thiab.
Tau muaj ib cov kev teeb txheeb nrog 2,000 tus txiv neej neeg Australia ces pom tau tias tej programs uas pab kom muaj kev sib cuag sib ntsib sib tham nrog lwm tus pab daws tau txiv neej tej kev nyob twm zeej kho siab khuav thiab kev nyuaj siab.
Muaj 31 feem puas ntawm tej neeg no hais tias cov kev nyuaj siab ua rau lawv ua tsis tau hauj lwm zoo.
1 tug ntawm 3 tug txiv neej ntawm tej zos toj siab hais tias cov kev nyob deb ntawm tej zos toj siab ua rau lawv raug cais tsis tau koom poob nrog lwm tus.
Tej txiv neej feem coob uas tau koom cov program ntawm Mentoring Men yeej tham txog tej teeb meem cuam tshuam txog lawv cov kev sib raug zoo tsis hais kev hlub los yog lawv tsev neeg: nrog lawv tus hlub, tus poj niam los yog me nyuam.
Professor Lim hais tias cov kev nyob twm zeej yog ib cov teeb meem loj tshaj cov kev nyuaj siab ntxhov plawv thiab.
Nws hais tias ''Yog tim tsis tau txais kev vaj huam sib luag. Ua rau tej neeg khwv tau nyiaj tsawg uas txom nyem nyob rau tej zos txim nyem thiab tsis muaj peev txheej ntau yam siv ntawm tej zos.Txawm tej neeg khwv tau nyiaj ntau los yeej mloog tias zoo li tsis tau nyiaj txaus siv ces thiaj ua rau tsis muaj peev xwm ua lub neej thiab mloog tau tias nyob twm zeej ua ntuv zus."
Yog tias koj xav tau kev pab cuam daws kev nyuaj siab hu tau rau BeyondBlue tus xov tooj 1300 22 4636, los yog hu tau rau lub koom haum MensLine Australia tus xov tooj 1300 78 99 78 koj los sis ib tug twg poob rau tej xwm txheej phom sij rau koj txoj sia ces hu rau Triple-Zero (000) thov kev pab cuam.
