Israel thiab Hamas tau pom zoo rau thawj theem ntawm cov kev sib khom los tsim kev thaj yeeb rau Gaza - cov kev pom zoo no yuav kom xaus tsov rog, thim Israel tej tub rog tawm thiab tso tej neeg uas ob tog tau muab txhom rov qab raws li Turkey tus nom tswj dej num txawv teb chaws hu ua Hakan Fidan hais. Txawm li cas los Stephen Dujaric uas yog UN tus kis hais tias Israel tej tub rog tseem tawm tsam ob lub zos Rimal thiab Zetoun ntawm Gaza txuas ntxiv ces thiaj muaj teeb meem rau cov kev xa khoom pab rau tej neeg Palestinian.
Meskas tus thawj tsav meem (President) Donald Trump hasi tias "Tej zaum yuav tsim tau kev thaj yeeb thiab tsim tau kev thaj yeeb ruaj rau cheeb tsam Middle East ntev ntxiv tuaj."
Wael Radwan uas yog ib tug neeg Palestinian ntawm Khan Younis hais tias "Peb zoo siab heev uas tau xaus tsov rog lawm. Thov ua tsaug rau tej neeg uas tau pab kom xaus tsov rog thiab tej xwm txheej nqaij ntuag ntshav nrog."
Australia tus thawj pwm tsav tau hais tias "ob xyoos dhau los ces tsuas muaj teeb meem rau cheeb tsam Middle East tas li xwb, tab sis tam sim no ces kuj muaj kev cia siab lawm. Peb yeej muaj peev xwm los daws tau tej voj vooj tsim kev kub ntxhov tau ntau caum xyoo no thiab tsim dua tej yam tshiab kom zoo tshaj qub ntxiv."
Txawm tias tau muaj cov kev sib pom zoo nrog Trump lub tswv yim no thawj theem lawm, los kuj tsis tau qhia ntxaws tias yog li cas tiag ces thiaj tseem ua rau muaj lug nug ntau yam rau lub caij uas Israel tseem yuav txiav txim tias seb yuav muaj tau tej xwm txheej no tshwm sim thaum twg.
Trump xav kom teeb tsa zej zog pej kum haiv ib pab neeg uas cia nws thiab Askiv tus qub thawj pwm tsav dhau los uas yog Tony Blair uas tus tswj Gaza tom qab xaus tsov rog.
Tsis tas li ntawd los Israel tus coj, Mr Trump thiab cov teb chaws vam meej yeej tsis pub Hamas muaj feem los tswj hwm Gaza. Thiab Bejamin Netanyahu uas yog Israel tus coj yeej hais tias yuav tsis cia Gaza tswj hwm nws tus kheej ywj pheej.
Turkey tus coj uas yog Recep Tyyip Erdogan hais tias tsis yog pheej yuav tos Hamas thiab neeg Palestinian nkaus xwb thiaj yuav tsim tau kev thaj yeeb.
Nws hais tias "Tsis yog tib leeg yuav tsim tau kev thaj yeeb. Cov kev pheej tos Hamas thiab neeg Palestinian kom thiaj tsim tau kev thaj yeeb yog tej yam tsis ncaj, yuam kev thiab lub tswv yim siv tsis tau. Israel cov kev pheej tseem tawm tsam yog ib co teeb emem loj tshaj plaws rau cov kev tsim kev thaj yeeb. Yog nws xav tau kev thaj yeeb tiag ces yuav tau tsum kiag tam sim no."
Txij thaum Hamas tau tua Israel tim 7 lub 10 hli ntuj los no ces tau ua rau muaj kev sib ntaus sib tua ris toj kis pes thoob rau cheeb tsam Middle East uas Israel tau tawm tsam nrog ntau lub teb chaws li Iran, Yemen, Lebanon thiab Qatar nrog.
Tej xwm txheej sib ntaus sib tua no thiaj ua rau zejzog pej kum hais tau txhawb nqa thiab pom zoo lees paub teb chaws Palestine tsis ntev los no thiab tau ua rau zoo li Israel raug zej zog pej kum haiv cais dua ntawm zejzog pej kum haiv lub chaw hais plaub tau liam Israel tej coj tseem ceeb thiab Hamas tias tau ua txhaum cai rau lub caij muaj tsov rog.
Thiaj ua rau Meskas tus coj qhia tias tej zaum nws kuj yuav mus rau cheeb tsam Middle East rau ob hnub so no kom thiaj xau tau tej lus pom zoo no meej kiag.
