- Cov kev tawm tswv yim txog Morrison: Thawm pwm tsav Anthony Albanese hais kom Australia tus kws lij choj teb chaws mus txheeb txog Scott Morrison uas yog Australia tus qub thawj pwm tsav dhau los cov kev lis ntau tus nom tej dej num tseem ceeb seb yog li cas tiag, puas tsim nyog kho cai lij choj kom thiaj tsis txhob pub muaj tej xwm txheej li no txuas ntxiv.
- UN thiab qoob loo: Antonio Guterres uas yog UN tus coj tau qhua hu kom pej kum haiv nrog kub siab xyuas kom txawm tias tseem muaj tsov rog ntawm Ukraine los kom xa tau tej noob qoob loos thiab tej chiv mus muag rau hauv ntiaj teb tej kiab khw.
- Tej koom haum nrhiav hauj lwm rau neeg puas cev ua: Tom qab uas tau muaj Royal Commission tau mus txheeb txog cov hauj lwm pab cuam tej neeg puas cev thiab nrhiav hauj lwm rau tej neeg no ua uas tau coj los cej luam lawm ces tau ua rau tsoom fwv teb chaws (Tsoom fwv Albanese) hais tias tau muaj tej koom haum no tshaj ib nrab ua tsis tau tej hauj lwm no zoo. Thiab muaj ib txhia koom haum ces yuav raug txiav nyiaj pab cuam me ntsis los yog raug txiav nyiaj tag nrho tsis tau coj los pab nws tej programs ntxiv. Nom tswv qhia tias muaj 8 lub koom haum ces yog cov uas yuav tsis tau nyiaj pab cuam ntxiv lawm.
- Nyiaj pab tej koom haum tswj xwm txheej kub: t Carlene York uas yog tus coj lub koom haum New South Wales State Emergency Services tau los pov puag nws tej neeg ua hauj lwm yeem thaj thiab nqua hu kom tau nyiaj ntau tuaj ntxiv los pab nws tej dej num vim tsis muaj peev xwm yuav pab tau raws li tej neeg xav tau rau tej xwm txheej dej nyab tsis ntev los no. Nws thiaj hais tias thaum txheeb xyuas lub koom haum tua hluav taws yaj sab thiab tej xwm txheej hav zoov kub hnyiab xyoo 2019-2020 tsis ntev los no ces yeej xav tau neeg los xyaum qhia tej neeg ua hauj lwm, thiab xav tau tej neeg mus pab cawm lwm tus rau lub caij dej nyab nrog rau xav tau tej chaw ua hauj lwm kom zoo tshaj qub ntxiv.
- Tshuaj Monkeypox vaccine: Simon Ruth uas yog tus coj lub koom haum Thorne Harbour Health tau qhia rau SBS tias nws ntseeg tias Australia yuav tshuaj vaccine tsis txaus coj los siv hno tiv thaiv kab mob Monkeypox, thiab xav kom Australia yuav tsum kub siab ceev nrooj nrog tej tuam txhab tsim tej tshuaj no sib khom kom yuav tau tej tshuaj no txaus siv rau haiv neeg no tib yam li America thiab Canada tau ua. Nws kuj hais ntxiv tias tsim nyog Australia yuav tau kawm tej sob kawm kab mob COVID-19 kis thoob ntuj no rau lub caij uas nom tswv tswj dej num noj qab haus huv ntawm Victoria ceeb toom txog tus kab mob virus no uas twb tau sib kis ntau tuaj ntxiv yuav laug txog ob npaug rau ob limtiam dhau los lawm. Txawm li cas los tej neeg muaj cai hno tej tshuaj no tsuas tau hno ib koob tshuaj xwb tsis tau hno ob koob. Ib tug neeg twg muaj peev xwm kis tau tus kab mob no ntawm ntawv nqaij rau tawv nqaij, los yog kov tau tus kab mob no ntawm tej khoom muaj tus kab mob no, thiab yog kis tau lawm ces yuav muaj cov yam ntxwv mob li xoob pob, ua kiav txhab ua kua yig thiab mob mob heev - hais tsis ntsees rau ntawm thaj chaw ib puag ncig chaw mos - kuj yuav ua rau ua npaws kub taub hau, mob ib ce thiab qog o.
- AFL: Pawg tswj lub club Essendon tseem yuav npaj los txiav txim siab rau hnub Sunday no tias seb puas cia Ben Rutten ua coach li qub txuas ntxiv rau lub caij Essendon tau swb 75-141 rau Richmond thaum sib tw nag hmo. Lawv yeej xav kom Alastair Clarkson los hloov nws limtiam dhau los tab sis nws tseem ua coach rau pab North Melbourne lawm.
- Apple hack: Lub tuam txhab Apple tau tshaj thoob ntiaj teb nag hmo tias kom tej neeg sawv daws uas muaj thiab siv Apple tej twj (Apple devices: iPhone, tablets, thiab Mac yuav tsum tau update cov software tshiab vim nws xav tias muaj neeg phem hack nyiag nkag mus rau hauv cov operation system thiab tej zaum ntshe yeej tau muaj neeg ua li no los tau ntev lawm. Txawm li cas los nws kuj tau kho nws cov software tshiab lawm thiab kuj txhawb nqa kom tej neeg sawv daws yog tseem tsis tau update ces kom mus update vim tsuas siv sij hawm li ob peb ntiag tiv (2-3 minutes) xwb. Cyber security experts hais tias cov teeb meem muaj zaum no mas yog tej yam txaus ntshai vim neeg phem cia li nyiag nkag tau mus tswj yus cov operation system hauv yus lub xov tooj ces yus siv tsis tau li lawm. Lawv yuav muab tau yus tej xov xwm ntiag tug, nyeem tau yus tej message thiab hu nrog lwm tus neeg uas yus ntseeg siab tham thiab ua txoj hais tias lawv yog yus. Yog li ntawd thiaj yog tej yam tseem ceeb yuav tau kub siab update Apple cov software tshiab kom thiaj li tau txais kev nyab xeeb.
- Nqe roj tsheb: Tej kws paub zoo txog hauj lwm roj tsheb hais tias yeej tsis muaj peev xwm yuav twv tau nqe roj tsheb vim nws yeej nce thiab nqes tas mus li. Thiab lub caij uas tsoom fwv cov kev txo se ib nrab rau tej roj tsheb xaus rau tim 28.09.2022 no ces ntshe tej nqe roj tsheb yuav rov qab kim tuaj. Ib txhia kws paub zoo txog tej hauj lwm no hais tias cov kev txo se roj tsheb no ua rau tsoom fwv poob peev nyiaj puag xyoo txog 3 billion Australian dollars ces tsoom fwv yuav tsis txo se dab tsi ntxiv lawm. Thiab kuj yog tej yam zoo tib yam li cov carbon tax uas pab kom tej neeg tsav tsheb tsawg me ntsis. Tab sis txawm tus nqe roj unlead pheej yig lawm los vim nqe roj desiel tseem kim ces ntshe yuav ua rau tej nqe khoom kim. Tab sis tej kws no kuj qhia tias kom zej tsoom Australia siv cov app mus txheeb tej chaw muag roj seb lub twg nqe pheej yig tshaj. Ua ke no Dr Laurian Demello ntawm tsev kawm qib siab Macquirie University's Business School hais tias xav kom Australia yuav tsum yuav roj ntawm ntau qhov chaw thiaj zoo dua tab sis kuj tseem yog tej yam nyuaj vim Australia tsis muaj peev xwm yuav tau tej roj rau lub caij pheej yig thiab tsis muaj peev xwm lim tau ntau coj los siv.
- Teeb meem quav kev twv txiaj yuam pov: Tau muaj ib cov xov xwm uas lub koom haum Australian Institute of Health and Welfare tau txheeb tau rau xyoo 2021 ces pom tau tias muaj neeg Australia yuav laug txog li 1 tug ntawm 3 tug twg yeej siv nyiaj mus twv txiaj thiab yeej muaj neeg Australia tshaj 7% raug tej teeb meem nyiaj txiaj. Tej teeb meem twv txiaj yuam pov no tsis yog muaj rau tej neeg quav cov kev twv txiaj yuam pov xwb tab sis tseem yuav ua rau lawv muaj rau lawv tsev neeg thiab lawv tej phooj ywg, thiab tej neeg muaj feem cuam tshuam thiab. Yuav ua rau muaj teeb meem rau txoj kev sib raug zoo, ua rau tiv nuj nqes thiab ua rau muaj kev nyuaj siab ntxhov plawv. Yog li ntawd tej kws paub daws tej teeb meem no thiaj xav kom tej cuab yig thiab tej phooj ywg ntawm tej neeg quav twv txiaj no yuav tsum tau nrhiav kev pab cuam rau lawv mas thiaj li yuav pab tau tus neeg lawv hlub tshua uas quav cov kev twv txiaj ntawd kom ntxeem dhau cov teeb mem quav kev twv txiaj yuam pov no. Tawm li cas los tej kev ntshai tsam poob ntsej muag thiab raug lwm tus ntaus nqe tsis zoo tau ua rau tej neeg quav cov kev twv txiaj yuam pov no tsis xav mus nrhiav kev pab cuam. Tab sis tej kws paub zoo txog tej teeb meem no txhawb nqa kom sawv daws mus nrhiav kev pab cuam kom thiaj ntxeem dhau tej teeb meem no. Yeej muaj cov kev pab cuam daws cov kev quav cov kev twv txiaj yuam pov no thoob teb chaws thiab muaj xov xwm txhais ua ntau hom ntawv rau koj nyeem, muaj kev pab cuam hauv online, los yog ntawm xov tooj thiab mus ntsib kiag tej chaw pab daws tej teeb meem no. Yog xav tau txais kev pab cuam ces hu rau tej koom haum raws li hauv qab no:· National Gambling Helpline on 1800 858 858· National Debt Helpline on 1800 007 007, or· Lifeline on 13 11 14
Mloog tau SBSHmong, rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Google podcasts, Spotify, thiab Apple podcasts los yog download SBS Radio App thiab SBS Hmong podfollow kom koj mloog tau SBS Hmong.
