Raws li Ms. Lab Vaj Hawj cov lus tawm tswv yim, nws tau hais tias kev yuav muaj peev xwm los thov tau nyiaj ntau roob dollars coj los pab tej koom haum zejzog tsis yog ib yam hauj lwm yooj yim, vim yuav tsum muaj txuj ci thiab paub tej dej num no zoo thiaj yuav thov tau nyiaj ntawm tej lagluam thiab nom tswv los pab tej neeg zejzog.
Ms. Lab hais tias yus yuav tsum yog tus neeg muaj peev xwm txawj hais lus, kheev tham tsis txaj muag, tsis tas li yuav tau paub sau tej ntaub ntawv thov nyiaj, paub npaj yus cov programs los sis tej hom phiaj qhia tej zeem muaj kom meej tseeb tias yuav ua dab tsi, yuav ua li cas, yuav tau txais txiaj ntsim dab tsi los rau tej neeg zejzog, rau tej lagluam los yog rau nom tswv ua ib co kev pauj rov qab rau lawv mas lawv thiaj li yuav kam pab, pub los yog qev nyiaj rau tej koom haum neeg zejzog coj los siv lis tej dej num coj mus pab rau tej neeg zejzog.
