Temporary Graduate 485 visa yog dab tsi?
Cov Post-Study Work Stream of the Temporary Graduate (Subclass 485) visa yog ib cov visa tso cai rau tej tub kawm pej kum haiv uas kawm tiav qib siab ntawm teb chaws Australia tej tsev kawm kom tau nyob txuas ntxiv thiab xyaum kom paub ua haum lwm.
Cov ntsiab lus tseem ceeb:
- Tam sim no ces tej tub kawm pej kum haiv uas tseem tab tom kawm thiab tseem nyob ntawm Australia ib cov xeev twg los yog ib cov chaw yaj sab twg ces muaj cai thov tau daim visa 485 ua daim ob siv lawm.
- Cov chaw cheeb tsam ntawm teb chaws Australia ces muaj tag nrho txhua cov chaw tsuas tsis suav nroog Melbourne, Sydney thiab Brisbane nrog xwb.
- Txij lub 2 hlis ntuj xyoo 2020, ces tej tub kawm pej kum haiv uas tseem tsis tau tuaj kawm teb chaws Australia yeej muaj cai thov cov visa kom tau ua hauj lwm tom qab lawv kawm tiav ntawm teb chaws Australia lawm.
Leej twg muaj cai thov tau cov 485 visa siv?
Tej tub kawm pej kum haiv uas tau kawm tiav bachelor, master los yog doctoral degree muaj peev xwm thov tau cov visa 485 nyob rau lub sij hawm 6 lub hlis uas lawv kawm tiav ntawm teb chaws Australia kom muaj cai ua tau hauj lwm tom qab kawm tag lawm.
Tej tub kawm uas kawm tiav bachelor thiab master degree ces thov tau cov visa 2 xyoos, tab sis tej zaum lawv kuj yuav thov tau visa nyob ntev tshaj ntawv los kuj tau, nyob ntawm tias seb lawv ho tuaj kawm cov sob kawm ntev npaum li cas mam kawm tiav xwb.
Alice Wang uas yog ib tug neeg khiav ntaub ntawv pab rau tej neeg tsiv teb tsaws chaw ntawm Sydney hais tias "Yog lawv tuaj kawm teeb txheeb tiav master degree, ces muaj cai thov tau cov visa 485 nyob ntev txog 3 xyoos, thiab yog tias tej tub kawm ntawd kawm tiav PhD ntawm teb chaws Australia no ces yuav xub thov tau thawj daim visa 485 nyob ntev txog li 4 xyoos los kuj tau."
2 tug ntxhais hluas zoo siab rau cov kev taug kev ua si thiab hau kua mis zom-Visualspace-Getty Images Source: Getty Images
Cov tub kawm uas kawm thiab nyob cov zos me lwm cheeb tsam yuav tau nyob ntev zog
Lub tuam chav Department of Home Affairs tau kho tej cai tshiab qee yam kom cov tub kawm pej kum haiv uas nyob rau cov zos cheeb tsam ntawm teb chaws Australia muaj peev xwm thov tau cov visa nyob tau ntev txog li 4 xyoos yog tias lawv kawm tiav bachelor thiab master degree.
Ces thiaj yog tej yam ua rau kom tej tub kawm pej kum haiv kub siab mus nyob thiab mus kawm rau tej zos cheeb tsam ntawm teb chaws Australia.
Nyeem ntxiv
Cov neeg paub ua hauj lwm (Skilled migration) tuaj mus nyob rau teb chaws Australia tej zos cheeb tsam
Ua ntej yuav muaj hloov tej cai no, ces ib tug neeg twg tsuas pub thov tau cov visa 485 tib zaug xwb nyob ntawm seb lawv tuaj kawm dab tsi ntawm teb chaws Australia no.
Tab sis ttam sim no tau kho tej cai Migration Regulations lawm ces thiaj pub thov tau daim Temporary Graduate visa 2 uas yog Post-Study Work stream yog tias tus neeg ntawd tau kawm tiav qib siab ntawm tej tsev kawm ntawv ntawm tej zos cheeb tsam, thiab yeej tau mus nyog kiag ntawm tej zos cheeb tsam lawm ua ntej yuav thov lawv daim visa ob no.
Niraj Shrestha uas yog ib tug neeg khiav ntaub ntawv tsiv teb tsaws chaw ntawm lub tuam txhab Neil Consultancy hais tias tej neeg feem coob tuaj siv nws cov services ces yeej yog cov tuaj ntawm tej teb chaws Nepal, Bangladesh, India, thiab Pakistan xwb, uas yog cov xav mus kawm ntawm tej chaw regional Australia.
Ib cov tub kawm ntawm ntau pawg neeg tsawg zaum ntawm ib cov tog zaum sab nraum zoov rau ib hnub tshav ntuj ntawm Perth-Solstock-Getty Images Source: Getty Images
Txij lub 1 hlis ntuj 2021 mus, ces tej tub kawm pej kum haiv muaj peev xwm thov tau daim visa 485 ob siv yog tias lawv twb tau nyob rau cov chaw regional centre los yog cov chaw regional area ua ntuv zus lawm.
Cov chaw regional Australia yog cov chaw dab tsi?
Yog tag nrho lwm cov chaw ntawm teb chaws Australia, tsuas tsis suav cov nroog loj li nroog Melbourne, Sydney thiab Brisbane xyaw xwb, dua li ntawd ces yeej xam tias tej chaw ntawd yog cov chaw nyob ntawm tej nroog los sis tej zos cheeb tsam ntawm teb chaws Australia lawm (Regional Australia).
Yog li thiaj tau muab cov chawcheeb tsam ntawm teb chaws Australia (Regional Australia) faib uas 2 yam chaw kom tej neeg thov tau cov visa 485 daim 2 siv xws li cov chaw 'regional centres' thiab cov chaw 'regional areas'.
Nyeem ntxiv
Alice Wang hais tias tej neeg uas mus kawm rau cov chaw regional centres li Adelaide, Perth, Canberra los yog lwm cov chaw thiab tau nyob rau ntawm tej chaw no lawm ces muaj peev xwm thov tau nyob ib xyoos ntxiv, hos cov mus nyob rau tej zos me zog ntau qhov ces thov tau cov visa 485 nyob 2 xyoos.
Tej nroog li nroog Perth, Adelaide, Wollongong, Newcastle, Geelong, Hobart, Canberra thiab lwm nroog ces xam tau tias yog cov chaw regional centres.
Cov kev zam rau lub caij tseem muaj kab mob COVID-19
Ua ntej yuav kho tej cai Migration Regulations ces ib tug neeg thov cov visa 485 tsuas muaj cai thov tau cov visa no hauv teb chaws Australia xwb, thiaj ua rau ntau txheeb tus tub kawm pej kum haiv tsis muaj peev xwm yuav rov qab tuaj tau rau teb chaws Australia vim muab ciam teb kaw lawm thiab ua rau lawv tsis muaj peev xwm thov tau cov visa no lawm.
Tab sis tam sim no kho cov txheej txheem thov yooj yim zog lawm ces thiaj tso cai rau tej tub kawm pej kum haiv daig txawv teb chaws thov tau cov visa no rau lub caij lawv tseem nyob txawv teb chaws tau lawm.
Ces thiaj li tau ua yooj yim rau 2 cov visa no rau lub caij tseem muaj kab mob COVID-19 no lawm.
Lwm cov visa 485 ces yog – Graduate Work Stream – thiab muaj cai nyob tau ntev txog 1 xyoos 6 hlis (18 hli). Cov visa no ces tus neeg thov visa yuav tsum xaiv ua ib txoj hauj lwm dab tsi uas raug teev zwm raws cov skilled occupation list, thiab nom tswv yuav txheeb seb nws puas muaj tej txuj ci thiab paub ua txoj hauj lwm ntawd tiag tso mam li pub daim visa ntawd rau nws siv.
Yog xav tau xov xwm ntxiv txog daimTemporary Graduate Visa, ces txheeb tau ntawm Department of Home Affairs lub vas sab (website) los yog sab laj nrog ib tug neeg muaj cai khiav ntaub ntawv pab cov neeg tsiv teb tsaws chaw (Registered Migration Agent) tau. Koj nrhiav tau xov xwm txog cov neeg migration agents ntawm teb chaws Australia tau ntawm no.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, Google podcasts, Spotify, thiab Apple podcasts los yog download SBS Radio App kom koj mloog tau SBS Hmong.
