Tom qab uas tau hais rooj plaub nceb muaj taug ua rau 3 tug neeg tas sim neej thiab ib tug raug mob sab ntawm xeev Victoria tau 9 limtiam, ces pawg neeg koom hais plaub tau txiav txim tias Erin Patterson txhaum 4 lub txim tua neeg ntawm lub tsev hais plaub ntawm lub zos Morwell ntawm Gippsland xeev Victoria.
Cov neeg tas sim neej no ces yog Ian Wilkinson uas yog Ms Patterson tus txiv nram ntej ub uas tsis tuag, tab sis nws txiv, nws niam thiab nws tus muam tau tas sim neej los ntawm cov kev noj nceb muaj taug xyaw ncuav qhwv nqaij nyuj thaum lawv mus koom nrog nws tus poj niam nram ntej ub uas yog Ms Patterson noj sus.
Justin Quill uas yog ib tug neeg ntawm lub tuam txhab hais plaub Thomson Geer Lawyer los kuj soj qab taug rooj plaub no ua ntuv zus thiab nws tau qhia rau lub chaw nthuav xov xwm tshooj 9 tias muaj qee yam dab tsi txawv txav txog rooj plaub no.
Nws hais tias ''Ib qho sawv daws paub ces yog qhov tias zoo li nws cov kev ua cov ncuav qhwv nqaij nyuj muaj nceb muaj taug xyaw uas tua peb tug neeg tuag thiab ua rau tus neeg plaub yuav laug tuag ntawd zoo li yeej tsis yog ib co teeb meem li. Qhov no thiaj yog tej yam uas tsis tau pom dua. Ntxiv ntawd los nws tseem hais tias raws li ib txwm pom mas tej neeg raug coj mus hais plaub ntawd yeej teb tias tsis yog kuv tua tej neeg no. Tab sis Ms Patterson ho teb tias yog kuv tua tej neeg no, tab sis tsis yog kuv txhob txwm ua thiab.''
Tam sim no ces Ms Erin Patterson raug coj mus kaw ntawm lub tsev laj cuj Dame Phyllis Frost Centre uas tswj tej neeg raug txim nruj heev lawm.
Ces thiaj yuav ua rau Ms Patterson raug kaw tsev laj cuj tag ib sim neej thiab nws tseem yuav raug coj mus hais plaub ua zaum kawg yav lig xyoo no.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
