Tom qab tau ntau lub plua (Limpiam) uas tau muaj cov teeb meem kub ntxhov sib ntaus sib tua ntawm cov tub rog Arakan Rohingya Salvation Army nrog rau Phabmab cov tub ceev xwm thiab peeb zeej tswj kev ruaj ntseg lawm ces tau ua rau muaj cov neeg Rohingya Muslims txog li 410,000 tus tau tsiv teb tsaws chaw khiav mus rau tebchaws Bangladesh lawm. Thiaj tau ua rau koom haum ntiaj teb lub tuam chav lis cov dej num pab cuam cov neeg thoj nam tawg tsov tawg rog United Nations High Commissioner for Refugees (UNHCR) tsis muaj peev xwm yuav pab tau tej neeg no yam cuag ncua raws li qhov tsim nyog.
UN cov neeg tseem ceeb tau hais tias cov xwm txheej kub ntxhov ntawm teb chaws Phab mab uas paug raug cov neeg Rohingya Muslims no "yog ib cov kev tua neeg kom tus noob npog nroj ntsuab."
Thaum kawg ces Aung San Suu Kyi thiaj li tau tawm los hais ib cov lus hauv TV rau nws haiv neeg ntawm Naypyidaw plov meej rau nws tej pej xeem thiab cog lus tias yuav los coj cov neeg tsis hais yog tus twg uas tau tsub muj tsim txom thiab ua txhaum Phab mab tej cai los yog pej kum haiv cai los hais plaub kom tau kev ncaj ncees rau tej neeg no.
Ms. Suu Kyi tau qhia tias tsoom hwv Phabmab mam los txheeb xyuas seb tus twg yog neeg thoj nam tiag ces yuav tos rov qab los nyob rau teb chaws Phab mab.
Nws tseem tau hais ntxiv tias nws yeej tsis txhawj tias tsam pej kum haiv yuav mus txheeb thiab tshuaj ntsuam txog tej xwm txheej kub ntxhov tau tswm sim no thiab tau nqua hu kom pej kum haiv yuav tsum tau koom tes los nrog nws tus tsoom hwv Phabmab daws tej teeb meem sib chab sib chaws heev no, tsis yog pheej yuav tham txog tej nyuag teeb meem meme tau tshwm sim ntawd xwb.
