Raws li lub koom haum Royal Life Saving Soceity ntawm teb chaws Australia cov zauv teev zwm txog cov neeg poob deg, ces muaj txog li 291 leeg tsaib no uas yog cov me nyuam yaus, hos cov laus hnoob nyoog tshiaj 75 xyoos rov sauv los yeej yog cov poob dej ntau tuaj ntxiv lawm thiab.
Raws li John O'Brien uas yog tus coj ntawm lub koom haum Poolwerx tau qhia, nws cov kev teeb txheeb (Research) tshawb fawb tau tias muaj 1 tug ntawm 3 tug (33%) ntawm Australia cov ua niam ua txiv tsis coj lawv tej me nyuam mus kawm xyaum ua luam dej. Qhov uas tseem txaus txhawj xeeb tshaj ntawd mas tseem muaj 1 tug ntawm 4 tug niam txiv yeej tau ntsib tej xwm txheej uas lawv tej me nyuam, ib tug neeg txheeb ze, lawv tej phooj ywg uas yuav laug poob deg thiab.
Cov laj thawj tseem ceeb ces vim cov ua niam ua txiv tseem tsis tau muab cov kev kawm ua luam dej no saib tseem ceeb thiab tseem coj lawv cov me nyuam mus kawm paj nruag (Music), kev sib tw (Sports) thiab mus seev cev (Ballet) xwb. Tab sis John O'Brien tau qhia tias kom yuav tsum muab cov kev kawm ua luam dej no ua cov tseem ceeb thiab yuav tau xub kawm ua ntej tso mam li kawm lwm yam.
Nws hais ntxiv tias xav kom tej neeg sawv daws yuav tau kub siab los tswj kev nyab xeeb rau lawv tus kheej lawv tsev neeg los yog tej neeg txheeb ze thiab lawv coj phooj ywg rau lub caij uas yuav txog caij ntuj sov no. Vim sawv daws yeej xav da dej ua si, ces thiaj tsim nyog yuav tau txib thiab teeb tsa ib tug neeg twg los zov, saib tej neeg los yog tej me nyuam kom tsis txhob poob deg tsis hais ntawm vaj tse, li coj me nyuam da dej hauv cov dab dej, pas dej ntawm tsev, tej pas dej thiab tej dej ntawm yaj sab, thiab cov ntug hiav txwv ntawd kom thiaj li tau txais kev nyab xeeb tib yam li thaum haus cawv es kom lwm tus saib xyuas thiab cov tsis qaug cawv yuav tau tsav tsheb.
Yog tham txog cov kev ua luam dej rau tom tej ntug hiav txwv lawm ces yeej xav taw qhia kom cov neeg yuav tsum tau ua luam dej rau ntu nruab nrab uas txhos 2 tug chij daj thiab muaj cov neeg cawm cov neeg poob deb zov thiab saib xyuas tej neeg da dej ua si tom ntug hiav txwv xwb mas thiaj tau txais kev nyab xeeb. Tsis tas li no tseem yuav tau cam hwm cov lifeguard thiab nyeem tej phiaj (Signs) kom thiaj tsis muaj teeb meem rau koj thiab tsev neeg.
John O'Brien uas yog tus coj lub tuam txhab Poolwerx tau hais tias dua ntawm cov me nyuam yaus hnoob nyoog qes dua 5 xyoos lawm ces tseem muaj cov hluas hnoob nyoog 15 txog 24 xyoos yog cov poob deg ntau heev thiab vim lawv pheej nyiam haus dej haus cawv thiab mus kov dej los yog mus ua luam dej los sis ua luam dej thaum tsaus ntuj, los yog nyiam tso dag ua si rau lub caij qaug cawv ces thiaj ua rau lawv yog cov poob dej coob kawg thiab. Ntxiv ntawd los cov laus hnoob nyoog tshaj 75 xyoos uas tseem noj tshuaj ntawd kuj yog cov yuav poob deg thiab vim tej zaum lawv cov tshuaj yuav ua rau lawv tsaug zog vau thiab poob dej tau. Thiab cov neeg tuaj xyuas Australia tshiab uas tuaj ntawm cov teb chaws European los yog cov teb chaws Asia yog cov poob deg ntau kawg nkaus thiab. Yog li thiaj xav kom lawv kub siab mus nrhiav tej xov xwm cuam tshuam txog kev nyab xeeb rau tej dej thiaj pov puag tau lawv kom txhob raug cov teeb meem poob deg no.
Yog li tsis txhob tos lwm tus los pab tab sis yus yuav tsum tau xub xub kub siab los tswj txoj kev nyab xeeb ua ntej tshaj plaws tso.
John O'Brien tau hais ntxiv tias yog cov niam txiv leej twg xav coj lawv cov me nyuam mus xyaum kawm ua luam dej pub dawb tsis tau them nyiaj rau lub lim piam xyaum kawm ua luam dej ces mus txheeb xyuas tau ntxiv ntawm lub vam sab www.learn2swimweek.com kom paub tej tsev qhia ua luam dej nyob ze koj tau rau lub lim piam (Lub plua) Learn2swimweek pib txij hnub tim 24/09/2017 txog rau tim 02/10/2017 no.
