Twb tau 80 xyoo uas Meskas tau coj foob pob nuclear mus tso rau Japan lub nroog Hiroshima thiab txuas ntxiv ntawd ces coj ib lub ntxiv mus tso rau nroog Nagasaki rau lub caij ua tsov rog ntiaj teb zeeg ob.
Hnub tim 6 lub 8 hli ntuj xyoo 1945 ces yog hnub uas Meskas tau coj lub foob pob no thiab yog ntiaj teb thawj lub foob pob nuclear coj mus tua Japan lub nroog Hiroshima uas tau ua rau muaj neeg tas sim neej txog li ntawm 140,000 tus.
Txij ntawd los ces thiaj ua rau muaj tsov rog txias (Cold War) uas muaj ntau lub teb chaws sib tw tsim riam phom nuclear.
Tab sis txij lub caij xyoo 1960s los ces kuj tau pib muaj cov kev txwv tsis pub tsim thiab tau tsim tau tsab cai Non-Prolification Treaty uas txwv tsis pub tsim tej riam phom nuclear xyoo 1970 uas muaj cov teb chaws 191 lub pom zoo.
Thiaj pom tau tias tam sim no muaj 9 lub teb chaws hauv ntiaj teb muaj riam phom nuclear li Meskas, Russia, Suav, Fabkis, Askiv, North Korea, India thiab Pakistan. Thiab yog muab tej tobhau muas txwv nuclear ntawm tej teb chaws tag nrho uas muaj coj los sib sau ua ke ces twb muaj txog li 12,000 lub hauv ntiaj teb no lawm. Txawm li cas los Meskas thiab Russia yog ob lub teb chaws uas muaj cov nuclear warheads no ntau tshaj plaws txog 90 feem pua. Thiab tsuas muaj tib lub teb chaws Israel thiaj tsis kam qhia tias seb nws puas muaj riam phom nuclear xwb.
Tab sis puas muaj peev xwm yuav cheem kom tsis txhob tsim riam phom nuclear lawm?
Tsis ntev los no (2025) ces Israel thiab Meskas tau siv foob pob tua Iran tej chaw tsim cov uranium, vim lawv ntseeg tias Iran yuav muaj peev xwm siv coj los tsim ua riam phom nuclear, tab sis nws yeej tsis lees thiab tsuas hais tias coj los siv rau tej xub ke thaj yeeb xwb.
Tus kws paub zoo txog cov kev teeb txheeb txog tej hauj lwm npaj tseg yuav ua raws ntawm tsev kawm qib siab Tasmania li Dr James Dwyer hais tias 'ntshe Iran yeej yuav tsim riam phom nuclear xwb coj los pov puag nws thiab kom lwm tus tsis txhob tawm tsam nws ntxiv lawm'.
Txawm li cas los raws li tau muaj ib cov kev teeb txheeb raug coj los qhia lub hlis dhau los kuj tau qhia tias teb chaws Suav tuam tshoj kuj yog lub yog ib haiv neeg uas tab tom tsim tej riam phom nuclear ntau tuaj ntxiv, uas tam sim no nws twb muaj cov nuclear warhead txog 600 lub , uas 100 lub ntawd ces yog cov ua tau rau lub caij 2 xyoos dhau los.
Tab sis raws li Associate Professor Tilman Ruff uas yog tus koom teeb tsa lub koom haum International Campaign to Abolish Nuclear Weapons hais tias ''Peb tab tom pom tias tau muaj cov kev nqes peev nyiaj ntau heev los txhim kho tej riam phom nuclear tsis yog yuav txo tsis tsim li tau cog lus ntau caum xyoo dhau los, tab sis tsim tej riam phom nuclear uas tua tau mus deb, tua ncaj dua, siv tau yooj yim dua. Thiab zoo li yeej tsis muaj cim qhia li tias ntshe tej tsoom fwv yuav tso tseg tsis tsim tej riam phom sai sai no li.''
Suav tuam tshoj cov kev ras los ua lub teb chaws tshiab uas muaj peev xwm tsim tej riam phom nuclear no thiaj tau ua rau muaj teeb meem nyuaj rau cov kev yuav sib kho rau ib tsab cai tshiab uas yuav txwv thiab tso tseg tsis txhob tsim riam phom nuclear xyoo tom ntej no.
Dr Dwyer hais tias ''Kuv xav tias yog peb tseem pom tias muaj kev tsis sib haum xeeb rau cheeb tsam Asia Pacific txuas ntxiv ces ntshe yuav ua rau yuav tsim riam phom nuclear ntau tuaj ntxiv. Thiab yog peb tseem pom Meskas coj nws tus cwj pwm li tam sim no txuas ntxiv thiab nws tej teb chaws phooj ywg tag kev cia siab rau nws cov kev pov puag lawv ntawm tej riam phom nuclear no.''
