Cov Orphan Relative Visa (Subclass 117) yog cov visa uas ib tug txheeb ze ntawm teb chaws Australia siv to cov me nyuam txawv teb chaws tuaj nyob teb chaws Australia vim tej zaum lawv niam thiab lawv txiv tsis muaj peev xwm tu saib xyuas lawm, rau qhov lawv raug txim, tas sim neej los yog ploj nrhiav tsis tau lawm los sis yog muaj mob uas ua rau lawv saib xyuas tsis tau tej me nyuam lawm. Ces tej txheeb ze ntawm Australia uas yog cov pej xeem, cov neeg nyob ruaj los yog cov pej xeem neeg New Zealand uas muaj cai tos ntawd yog cov tos tej me nyuam txawv teb chaws tuaj nrog lawv nyob ntawm teb chaws Australia no.
Yog tham txog cov txheeb ze lawm ces kuj yuav yog cov nus muag, pog thiab yawg, pog yawg nram ntej ub, nkawm niam txiv, niam txiv nram ntej ub, nus muag nraum ntej ub, niam ntxawm txiv ntxawm niam hlob txiv hlob, thiab plauj uas nyob ntawm Australia no yog cov tos tau tej me nyuam txawv teb chaws tuaj. Tab sis nom tswv Australia yeej xav kom tej neeg no yuav tsum muaj ntaub ntawv qhia tau tias lawv tsis yog neeg ua txhaum cai, tsis raug txim kaw tsev laj cuj los sis tsis muaj teeb meem dab tsi cuam tshuam nrog me nyuam yaus mas thiaj muaj cai tos tau tej me nyuam ntawd tuaj.
Daim Orphan Relative Visa (Subclass 117) no ces yog cov permanent visa uas tus me nyuam ntawd muaj cai thov siv tau tej kev kho mob li Medicare, muaj cai kawm ntawv, muaj cai ua tau hauj lwm, muaj cai tos tau lwm tus neeg tuaj nrog lawv nyob ntawm Australia thiab yog thaum muaj hnoob nyoog 18 xyoo lawm ces muaj peev xwm thov xeem ua tau pej xeem Australia thiab.
Yog koj xav tau xov xwm txog cov Orphan Relative Visa (Subclass 117) no ces mus txheeb tau ntawm lub tuam chav Department of Home Affairs lub vas sab tau.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm SBS Hmong Facebook thiab subscribe los sis yog download thiab mloog tau ntau cov podcasts (xov xwm ua suab) ntawm Google podcasts, Spotify, thiab Apple podcasts los yog download SBS Radio App kom koj mloog tau SBS Hmong.
