Vim li cas tus ntxhais Hmoob ntawm Minnesota hu ua Pajdib Yaj thiaj mus koom cov kev sib tw ntxhais nkauj ntsuab The Miss United States of America 2020? Ho tau txiaj ntsim dab tsi rau nws thiab vim li cas nws thiaj muab cov kev nyuaj siab ntxov plawv thiab teeb meem mob hlwb los cuam tshuam rau cov kev sib tw ntxhais nkauj ntsuab no?
Pajdib Yaj hais tias yog tham txog txoj kev zoo nkauj lawm ces tsis yog cev ntaj ntsug xwb tab sis yuav tsum yog muaj txoj kev zoo nkauj tawm hauv yus nruab siab tuaj los yog yus txoj kev xav nrog thiab uas yog tej yam tseem ceeb heev.
"Cov kev sib tw no yog coj los txhawb siab thiab txhawb nqa kom tej poj niam ua kom tau tej yam dab tsi raws li lawv txoj kev npau suav, tib lub tsam thawj no los kuj pab kom lawv ntseeg lawv tus kheej thiab kom pom txog txoj kev zoo nkauj ntawm yus lub siab lub ntsws nrog thiab."
Nws hais tias nws yeej tau ua cov meditation los tau 4 xyoos no lawm thiab tseem npaj yuav rov qab mus kawm los ua ib tug neeg pab lwm tus daws kev nyuaj siab thiab.
Muaj ntau yam laj thawj ua rau nws xav rov qab mus kawm los ua txoj hauj lwm no vim nws pom tias Hmoob tej hluas coob heev tau txov txo lawv tus kheej txoj sia thiab raug cov teeb meem nyuaj siab ntxhov plawv coob heev, ces nws thiaj xav los ua ib yam dab tsi kom siv tau nws cov kev meditation los pab tej neeg lim siab lim ntsws kom kaj siab.
Nws kuj tau koom cov retreat, workshop thiab tsim cov personal meditation session thiab tso me ntsi rau tej social media lawm tab sis yeej tseem xav tsim ib tshooj YouTube los qhia txog nws cov meditation no ntxiv thiab.Miss Yang qhia tias nws tau siv cov kev sib tw ntxhais nkauj ntsuab USOA' Miss 2020 no los qhia kom tej neeg paub zoo txog cov teeb meem mob hlwb thiab nyuaj siab ntxhov plawv no ntawm Hmoob tej neeg zejzog los yog tej neeg zejzog hauv ntiaj teb no kom zoo tuaj ntxiv, vim nws xav tias cov meditation no yuav muaj peev xwm los pab daws tau cov teeb meem mob hlwb no thiab.
"Txoj kev sib tw no pab qhib kuv txoj kev xav kev npau suav ua rau kuv pom tau tias kuv caum cuag kuv txoj kev npau suav tiag yog yus tsis muaj txoj kev xav thiab kev ntseeg tias yus ua tau ces tej zaum yuav ua tsis tau, tab sis kuj yuav pab kom yus dhia kom dhau ntawm txoj kev ntshai los ua ib yam dab tsi thiab yog yus tsis sim ces yus tsis paub tias yus puas yuav ua tau dab tsi tab sis yog yus tsis sim ces yus yeej tsis paub thiab."
