Twb tau muaj cov teeb meem neeg phem I-S txeeb tebchaws Philippines lub nroog Marawi los tau tshaj li 3 hlis lawm, tom qab uas tau muaj cov neeg mus koom nrog cov I-S sib ntaus sib tua ntawm teb chaws Syria thiab Iraq ntawd tau rov qab los rau cov teb chaws cheeb tsam Southeast Asia. Australia tus thawj pwm tsav Malcolm Turnbull tau hais tias "Nws tsis xav kom lub nroog Marawi ras los ua nroog Raqqa rau ntawm cov teb chaws Southeast Asia no." Tab sis Australia ho muaj cov kev pab cuam dab tsi rau teb chaws Philippines xwb?
Tsis ntev los no Australia kuj tau xa 2 lub dav hlau soj xwm mus pab tsoom hwv Philippines tawm tsam nrog cov neeg phem I-S lawm. Tab sis tam sim no nom tswv Filipino tau hais tias nws xav tau kev pab cuam ntxiv los ntawm tebchaws Australia thiab lwm lub tebchaws los pab nws tawm tsam nrog cov neeg phem no.
Australia tus pwm tsav lis laj fai pej kum Julie Bishop tau qhia cov lus no meej tseeb tias nom tswv Australia tseem yuav mus sab laj sib tham nrog tsoom hwv Philippines txog Australia cov kev pab cuam uas yuav muaj cov kev pab tawm tswv yim thiab pab xyaum nws cov tub rog xwb tab sis Australia yuav tsis xa nws cov tub rog mus koom ua ke nrog Philippines cov tub rog mus tawm tsam nrog cov ISIS ntawm lub nroog Marawi no.
Australia pab nom Labor los yeej tau qhia tias nws pom zoo txhawb nqa tsoom hwv cov dej num tswj kev ruaj ntseg haiv thiab cov kev tawm tsam nrog cov neeg phem (Counter-terrorism). Nws tsuas tos seb tsoomhwv Australia yuav txiav txim siab li cas xwb.
Tab sis Richard Di Natalie uas yog pab nom Greens tus coj hais tias "tsis hais yuav yog cov kev pab cuam dab tsi rau Philippines tus thawj tsav meem (President) Rodrigo Duterte li, tej zaum yuav ua rau Australia cov tug rog muaj feem txhaum rau lub caij muaj tsov rog tau, vim tus coj ntawm lub teb chaws no yeej muaj feem cuam tshuam tua neeg thiab tsis hwm tej cai tswj hwm li."
