Txim lub 4 hlis ntuj xyoo 2025 uas Meskas tus President Donald Trump tau pib tsub se rau ntiaj teb tej teb chaws xa khoom uag rau Meskas kim tuaj ntxiv ces tsuas muaj qee lub teb chaws thiaj sib khom tau nrog Meskas xwb li Askiv, Suav tuam tshoj thiab tsis ntev los no yog Nyab laj (Cob tsib).
EU los kuj cia siab tias yuav sib khom tau nrog Meskas thiab.
Ua ke no los Mr Trump kuj tau tsub se 40 feem pua rau Brazil thiab kuj tau txo se ntawm 48 feem pua los ua 40 fem pua rau qee lub teb chaws Suav Nplog nrog.
Ces Australia tej lagluam thiaj yuav raug tsub se 10 feem pua rau txhua yam suav cov kev tsub se 25 feem pua rau tej hlau thiab txhuas.
Txawm li cas los phau ntawv xov xwm Nine Newspapers kuj tau qhia tias ntshe tej zaum Australia yuav tau siv nyiaj ua cov hauj lwm AUKUS agreement ntau tshaj qhov tau xub pom zoo ntawm $368 billion kom yuav tau ib co nkoj nuclear powered submarine siv thiab Mr Trump los kuj tau hawv tias tseem yuav tsub se 200 feem pua rau tej tuam txhab muag tshuaj txawv teb chaws thiab uas tej zaum yuav ua rau Australia tuam txhab tsim tshuaj ua lagluam raug teeb meem thiab.
Txawm tias Australia tus coj tsis muaj peev xwm tham tim ntsej tim muag nrog Trump thaum koom rooj sab laj G7 summit los nws cia siab tias yuav muaj peev xwm ntsib tau Mr Trump rau yav lig xyoo no. Ces thiaj ua rau lwm pab nom teb chaws ib tug nom yws tias ''lwm lub teb chaws tej nom tswv yeej kub siab nrog Meskas sib tham tab sis zoo li tsoom fwv Albanese tsis tshua kub siab txog tej hauj lwm sib khom seb ho puas zam kom tsis txhob tau them tej se kim no rau Meskas li.''
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
