Xov xwm luv tshaj tawm hnub zwj Quag (Tuesday news 27.05.2025):
Huab tais Charles tau mus ntsib Canada tus thawj pwm tsav Mark Carney ntawm Ottawa thiab yog ib lub cim tias haiv neeg no lees paub thiab Charles yog nws tus coj.
Xanana Gusmao uas yog Timore Leste tus thawj pwm tsav hais tias nws cia siab tias txog thaum xaus xyoo no nws yuav ras los ua ib tug tub koom siab ntawm lub koom haum ASEAN.
Volodymyr Zelenskyy uas yog Ukraine tus president cav tias Russia yeej xav ua kom ua tsov rog ntev xwb, tom qab Russia tau xa drones ntau tshaj plaws mus tawm tsam Ukraine ces thiaj ua rau tsis muaj kev cia siab tias xyov puas yuav tso tseg tau tsov rog.
Ed Husic uas yog ib tug nom kis xeev qes ntawm pab nom Labor hais tias kom tsoom fwv Labor rau txim lagluam rau Israel vim Israel tsis tso tseg nws cov kev pheej siv tub rog mus tawm tsam Gaza txuas ntxiv. Raws li tej neeg ua hauj lwm ntawm tsev kho mob hais ces ib hnub dhau los twb muaj tej neeg Palestinian yam tsawg li 54 tug raug tua tuag, tej neeg no yog cov uas khiav nkaum ntawm ib lub teej kawm.
Tsoom fwv Jacinta Allan ntawm xeev Victoria tau txwv tsis pub muag tej ntaj los yog tej nriam ntev ces thiaj tau ua rau muaj kev txhawj xeeb rau ib txhia neeg zejzog Muslim vim lawv tsis paub tias cov twg yog cov muaj cai yuav tau siv thiab cov twg yog cov yuav raug txwv, rau qhov lawv siv tej ntaj tej riam ntev no los txhoov nqaij lub caij lawv ua tej koom txoos Eid al-Adah.
Aunty Robyn Williams uas yog ib tug laus neeg thiab yog ib tug poj niam neeg caj ceg neeg txum tim Yugambeh tau nqua hu kom txhua tus neeg Australia siv lub limtiam Reconciliation Week (27 May - 03 Jun) los tsim kom muaj kev sib raug zoo tuaj ntxiv ntawm tej neeg Australia txum tim thiab tej neeg Australia uas tsis yog neeg txum tim.
Thawj pwm tsav Anthony Albanese kuj tau mus xyuas tej zejzog raug dej nyab ntawm sab qaum teb nruab nrab teb nyob raws tej ntug hiav txwv ntawm xeev New South Wales (NSW). Lub koom haum State of Emergency Services (SES) tau qhia tias twb muaj tej tsev yuav laug txog li 800 yog cov tsev raug dej nyab thiab tej zaum yuav tsis tau txais kev nyab xeeb nyob lawm. Ua ke no los kuj tau muaj lub koom haum Sikh Volunteers Australia tau mus ua zaub mov rau tej neeg zejzog raug dej nyab noj thiab kuj qhia tias tej neeg zejzog ntawm lub zos Taree los kuj sib pab kawg thiab. Txawm li cas los tub ceev xwm NSW tau ceeb toom rau tej zejzog sawv daws tias kom ceev faj tsam muaj neeg mus tub sab nyiab tej khoom rau lub caij muaj dej nyab no thiab.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
