Xov xwm luv tshaj tawm hnub zwj Teeb (Thursday news 29.05.2025):
Tau muaj tus kws phais neeg mob Joel Le Scouranec ntawm teb chaws Fabkis uas so tsis ua hauj lwm lawm rau teem txim kaw tsev laj cuj 20 xyoo thiab nws tau raug txim ua txhaum vim yuam deev tej neeg mob txog li 299 leeg. Tej neeg mob feem coob ces yog me nyuam yaus thiab muaj ib txhia neeg mob ces yog cov uas raug hno tshuaj loog tsis nco qab lawm thaum nws ua phem rau.
Barnaby Joyce tau cog lus tias nws yuav los tawm tsam tsis pom zoo nrog pab nom koom tswj (Coalition) tsab cai txo tej cua tsis huv txog xyoo 2050 lub caij uas nws raug txo nom zaum thauj hau rooj. Txawm li cas los David Littleproud uas yog tus coj pab nom Nationals yeej tsis tau qhia meej tias seb puas tseem yuav ua tej hauj lwm no li cas.
Tsoom fwv xeev Tasmania kuj tau pom zoo los txhawb nqa cov kev tsim kev pom zoo nrog nws tej neeg txum tim tom qab tau 4 xyoos uas tau muaj kev sab laj ntawm lub xeev no tej neeg txum tim thiab tsoom fwv xeev ces thiaj tau tsim tau tsab nawv cej luam coj los sab laj xyoo 2021 hasi kom tsim kevpom zoo nrog neeg txum tim thiab qhia qhov tseeb txog tej keeb kwm tau tshwm sim rau tej neeg txum tim.
Chris Luxon uas yog New Zealand tus coj hais tias nws yeej pom zoo nrog cov haum lwm Anzac coj mus pab rau Ukraine nrog Anthony Albanese kom thiaj ua tau tej hauj lwm no. Ukraine tus ambassador Vasyl Myroshnychenko thiaj tau caw kom nkawv mus xyuas lub caij ntuj so no thiab mus koom pej kum haiv ntau lub rooj sab laj.
Elon Musk tau qhia rau hauv nws lub tuam txhab social media platform X tias nws yuav tawm tsis ua tus neeg sab laj tseem ceeb rau tsoom fwv Donald Trump ntxiv lawm.
Thawj pwm tsav Anthony Albanese tau los tiv thaiv nws tus tsoom fwv tej nyiaj pab rau cov hauj lwm tug rog tom qab tau muaj lub koom haum Australian Strategy Policy Insititute tau tib tias tsoom fwv tej nyiaj puag xyoo siv ua cov hauj lwm no ua rau plam ntau yam cib fim tseem ceeb los npaj Australia tej tub rog thiab tej lagluam tsim cuab yeej tsov rog tsam muaj teeb meem rau yav pem suab. Txawm li cas los nws kuj tau hais tias yeej yuav siv 2.3 feem pua ntawm Australia cov GDP rau tej hauj lwm no rau 10 xyoo ntxiv no.
Tau muaj UN lub koom haum pab tej neeg txom nyem ntawm Gaza tau qhia tias tau muaj 2 tug neeg tas sim neej thiab muaj ntau tus neeg raug mob tom qab muaj neeg mus tsoo lub tsev khaws tej khoom pab cuam.
Marco Rubio uas yog Meskas tus nom tswj dej num txawv teb chaws hasi tias Meskas yuav pib thim tsis pub tej visa rau Suav tej tub kawm uas mus kawm ntawm teb chaws Meskas lawm, suav tej tub kawm uas tsoom fwv ntseeg tias muaj feem cuam tshuam nrog Suav tuam tshoj pab nom koom tsham thiab tej tub kawm uas kawm tej sob kawm tseem ceeb.
Sussan Ley uas yog tus coj lwm pab nom teb chaws hais tias nws yuav ua tib zoo los xyuas kom siv tau ntau yam tswv yim ntawm cov kev ua tus coj txawv Peter Dutton los coj nws tej nom li yuav mloog lawv hais tsis yog yuav qhia kom lawv ua.
Victoria tus nom MP Moira Deeming ntawm pab nom Liberal
qhia tias tej zaum nws yuav coj tej nom tseem ceeb ntawm pab nom Liberal mus hais plaub yog hais tias tus coj ntawm lwm pab nom uas yog John Pessuto tsis them nws tej nqe hais plaub tom qab uas tsev hais plaub tau hais kom nws them Ms Deeming tej nqe hais plaub txog li $2.3 million.
Cob tsib lub tuam txhab muag chiv hu ua Vinacam ho tau nqua hu kom nws tus thawj pwm tsav Pim Minh Chin nrog txheeb seb vim li cas thiaj muaj cov kuab taug Cadmium ntawm Nyab laj tej txiv durian uas ua rau Suav tuam tshoj tsis kam yuav. Tej taug no ces yog noj tau ces tej zaum yuav ua rau raws plab, ntuav zeev siab, thiab yuav ua rau muaj teeb meem ua tsis taus pa los yog muaj teeb meem rau tej raum los yog tej zaum kuj yuav ua rau mob tau kab mob cancer raws li Tuoitre News tau qhia.
Nplog tej neeg LGBTQI+ kuj tau ua kev zoo siab rau hnub International Day Against Homophobia, Biphobia thiab Transphobia. Txawm tias tsoom fwv Nplog tsis txwv thiab tsis rau txim rau tej neeg no cov kev hlub thiab kev sib daj deev los yeej tseem tsis tau muaj ib tsab cai los pov puag tej neeg no tej cai.
Nom tswv Thaib thiab nom tswv Nplog luj tau muaj lub rooj sab laj tswj kev ruaj ntseg rau tej ciam teb rau ob hnub dhau raws li Nplog phau ntawv xov xwm Vientiane Times tau qhia.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
