Hauv paus xov xwm:
- New South Wales cov kev tso cai sai rau cov qauv tsim tsev,
- Trump hais kom Zelenskyy tsis txhob tua Moscow.
- Australia thiab Suav tuam tshoj cov kev sib raug zoo rau cov kev ua luam.
Xov xwm luv tshaj tawm hnub zwj Feej (Wednesday news 16.07.2025):
New South Wales (NSW) tej ntawv tso cai tsim tsev
Tsoom fwv xeev NSW tau tso cai pom zoo rau cov kev thov tsim tej qauv tsim tsev kom tau sai rau lub sij hawm 10 hnub uas tus nqe ib txwm yog $1,000 tab sis tsuas tsub $1 rau lub caij 6 hli kom ua tau tej vaj tse no sai. Chris Minns uas yog NSW tus hau xeev hais tias yog txhawb nqa kom tsim vaj tse sai kom tej cuab yig hluas thiaj yuav tau tsev nyob thiab pab kom tau txais kev ncaj ncees rau sawv daws.
Meskas hais kom Ukraine tsis txhob tawm tsam Russia lub tuam ceeb
Meskas tus president Donald Trump hais kom Volodymyr Zelenskyy tsis txhob tua Russia lub tuam ceeb Moscow tom qab Financial Times tau tshaj tawm tias Trump tau nrog Zelenskyy tham thiab yuav pab tej foob pob tua tau deb rau Ukraine tus Moscow yog tias Russia tsis lub siab xaus tsov rog ntawm Ukraine. Ua ke no los nws yuav rau txim lagluam 100 feem pua rau Russia thiab tej teb chaws nrog nws ua luam ua ke, tab sis Sergie Lavrov uas yog Russia tus nom txawv teb chaws hais tias Russia yeej yuav muaj peev xwm ntxeem dhau tej kev rau txim rau nws.
Siv cai lij choj thiab kev nom tswv xaus tsov rog ntawm Gaza
Kuj tau muaj 32 lub teb chaws suav teb chaws South Africa, Brazil, Ireland, Spain thiab Columbia nrog tau muaj ib lub rooj sab laj sai heev ntawm Bogota muaj lub hom phiaj yuav siv cai lij choj coj Israel coj mus hais plaub cuam tshuam txog nws cov kev ua tsov rog ntawm Gaza cuam tshuam txog cov kev yuam zejzog pej kum haiv cai thiab cov kev txeeb Palestinian tej nrim chaw ntawm Gaza thiab hais kom siv kev nom tswv los daws tej teeb meem no.
Tej teeb meem cuam tshuam txog tej chaw zov me nyuam ntawm xeev Victoria
Tub ceev xwm kuj qhia tias muaj tej chaw zov me nyuam ntawm xeev Victoria ntau tuaj ntxiv cuam tshuam nrog Joshua Dale Brown tom qab txheeb tau 4 lub childcare centre ntxiv. Ces thiaj tau hais kom coj tej me nyuam ntau tshaj 800 tus mus txheeb seb puas kis kab mob dab tsi tom qab tus neeg no raug tsub tej txim tshaj 70 lub cuam tshuam cov sex offence nrog tej me nyuam hnoob nyoog qes dua ob xyoos.
Cov kev sib khom lagluam ntawm Meskas thiab Indonesia
Meskas tus President Donald Trump tau qhia tias tau sib khom lagluam nrog Indonesia ua lub teb chaws tshiab uas yuav ua rau Meskas tej khoom xa muag rau Indonesia tsis tau them se tab sis Indonesia tej xa muag rau Meskas yuav tau them 19 feem pua.
Kho Australia tsab cai tswj tej ib puag ncig
Dr Ken Henry uas yog tus nom tswj nyiaj txiaj dhau los, yog tus coj txhab nyiaj NAB thiab yog tus neeg sab laj tawm tswv yim rau Australia ib tug thawj pwm tsav dhau los hais tias yuav tau kho Australia tsab cai Environment Protection and Biodiversity Conservation Act mas thiaj yuav ua tau raws haiv neeg no tej hom phiaj pov puag tej ib puag ncig, vim zoo li Labor tsuas kub siab txog lagluam xwb.
European Union lub rooj sab laj
27 lub teb chaws tub koom siab ntawm lub koom haum European Union (EU) tau sib ntsib ntawm Brussels los tsim cov kev rau txim tshiab rau Russia cov kev ua rog ntawm Ukraine. Uas teev 18 cov kev raug txim lub hli dhau los li txwv Russia lub tuam txhab Nord Stream tsis pub siv niaj thiab yuav raug txim rau tej txhab nyiaj uas tsis ua raws cov kev txwv tsis pub siv nyiaj.
Tej lus tseem ceeb tham tau rau lub caij Australia tus coj mus xyuas Suav tuam tshoj
Xi Jinping uas yog Suav tus coj hais tias nws lub teb chaws npaj txhij yuav los ua hauj lwm nrog Australia xyuas kom muaj kev sib raug zoo tuaj ntxiv rau ob tog li yuav xyuas kom rov qab ua tau cov kev pom zoo lagluam ywj pheej kaum xyoo dhau los. Thiab Xi hais tias txij Labor Mr Albanese tau ua nom ces pab kom Australia hwm Suav lawm kom ob tog tau txais vaj huam sib luag thiab tau txais txiaj ntsim ua ke.
Thawj pwm tsav los kuj tau ntsib Suav tus thawj pwm tsav Li Qiang thiab kos xyeem mem tes rau ntau cov kev pom zoo thiab qhia meej tias ob tog yuav rov qab ua luam ua ke. Ces Suav thiaj yuav xa cov txiv jujubes tuaj muag rau Australia hos Australia yuav xa txiv apples muag rau Suav.
Txawm li cas los Australia tus coj kuj qhia txog Australia cov kev txhawj xeeb txog Suav cov kev xyaum tub rog ntawm zejzog pej kum haiv tej ciam dej ze ntawm Australia uas tau muaj tej fij dav hlau ncua ya rau lwm thaj chaw thiab kuj tau tham txog Australia tus neeg Yang Henjun uas raug Suav muab kaw tab sis kuj tseem tsis tau paub tias xyov puas tau raws li siab xav.
