Xov xwm luv tshaj tawm hnub zwj Feej (Wednesday news 21.05.2025):
Jim Chalmers uas yog tus nom tswj nyiaj txiaj rau tsoom fwv Albanese tau hasi rau hnub zwj Feej (Wednesday) no tias cov kev txo tej kab theem paj yog xov xwm zoo rau Australia tej lagluam thiab kuj yog tej yam zoo pab rau ntau millions tus neeg Australia qev nyiaj yuav tsev rau lub caij tsis paub tias xyov yuav muaj dab tsi tshwm sim hauv ntiaj teb ntxiv.
David Littleproud uas yog tus coj pab nom Nationals hasi tias yog pab nom Liberals pom zoo nrog nws ib co cai ces nws yuav zoo siab los zaum tsawg nrog lawv sib tham seb puas tsim tau pab nom koom tswj.
Tsoom fwv Askiv tau ncua tsis tham lagluam ywj pheej nrog Israel thiab tau tsub txim lagluam tshiab rau tej neeg mus nyob ntawm West Bank rau lub caij Israel mus tawm tsam Gaza tsis ntev los no tom qab Israel raug zejzog pej kum haiv tsub nias vim nws tau txwv txiav tsis xa khoom pab cuam mus pab Gaza thiab ua rau tej neeg twb ze rau qhov yuav tuag tshaib lawm. Ua ke no los Qatar uas yog tus txwj laug tswj cov kev sib khom rau Israel thiab Hamas seb puas xau tau tsov rog los kuj tau qhia tias yeej tham tsis tau lus tseem ceeb dab tsi.
Ayatollah Ali Khamenei uas yog Iran tus coj tsis ntseeg tias cov kev sib khom nuclear nrog Meskas yuav tsim tau ib co kev pom zoo dab tsi.
Australia tseem yuav tso tseg tsis sau tej se rau tej tsheb luxury kom thiaj muaj cib fim xa tau nws tej nqaij mus muag rau EU tej kiab khw rau lub caij uas Australia tus nom tswj dej num lagluam Don Farell tseem npaj yuav mus ntsib EU tus nom tswj lagluam Maros Sefcovic seb puas tsim tau lagluam ywj pheej nrog EU thiab puas tsim tau cov kev pom zoo rau tej hauj lwm tub rog/tiv thaiv teb chaws.
Meskas tus president Donald Trump tau qhia tias nws tau xaiv ib co qauv yuav tsim Meskas tej foob pob txais/tiv thaiv foob pob uas raug nyiaj tshaj USD$270 billion kom tsis txhob raug kev phom sij ntawm Suav thiab Russia cov kev hawv.
Lub koom haum National Native Title Tribunal tau tso cai rau lub tuam txhab khawb peev txheej Santos ntiav tau ib thaj chaw ntawm tsoom fwv NSW coj los ua cov lagluam khawb gas ntawm Narrabri uas yuav tau them nyiaj txog li
AUD$ 3.6 billion.
Pawg rooj saib xyuas uas tswj cov kev sib tw Olympic tseem yuav txheeb tias seb puas yuav siv tus dej Fitzroy River ntawm Rockhampton uas muaj kheb dej tsuag ua ib qho chaw sib tw caij nkoj canoe.
Nom tswv Nplog qhia tias sai sai no ces twb ua tus choj hla ntawm Beuangkan rau Borikhamxay tiav lawm.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum SBS Hmong Pod follow los yog lwm cov podcasts platforms (iHeart, Amazon Music & Podcasts).
