Zej zog pej kum hais tau tim tsum tsoom hwv Phabmab cov kev sib tub rog los tawm tsam nrog cov neeg Rohingya Muslim phem kawg nkaus, thiab lawv tau nqua hu kom nom tswv Phabmab cia li xaus cov kev tawm tsam no thiab tso cai rau pej kum hais cov koom haum pab cuam thiab UN cov neeg tshuaj ntsuam txog tib neeg cov kev ncaj ncees mus txheeb xyuas cov xwm txheej no seb puas ua txhaum los yog yuam tej cai no.
Tej xwm txheej kub ntxhov tau muaj los tau ntau hli no tau ua rau twb muaj cov neeg Phabmab Rohingya Muslim ze txog li 400,000 tus tau khiav ntawm lawv tej vaj tse thiab zejzog mus rau teb chaws Bangladesh uas UN thiab cov koom haum pab cuam pej kum haiv tau nrhiav tsev ntaub kaus thiab nrhiav koom pab cuam rau tej neeg no ntawm Cox's Bazar ze ciam teb Phabmab ntawd. Tab sis yeej tseem tsis muaj peev xwm yuav pab tau tej neeg no raws li qhov tsim nyog txwm nws yuav thov tau pej kum haiv nyiaj ze txog li $ 5 roob dollars coj los pab cov neeg no.
Kim Antonio Guetterres uas yog UN tus coj los kuj tau hais tias yeej yog ib cov piv txwv qhia txog cov kev tua cov pab pawg neeg me kom tu noob npog nroj ntsuab.
Thiaj tau ua rau Aung Sun Soo Kyi uas yog Phabmab tus coj thiab yog tus neeg tau cov khoom plig thaj yeeb rau fab kev tswj hwm tso cai rau pej xeem xaiv lawv tus coj (Nobel Peace Prize in Democracy) dhau los los kuj tsis tawm los hais dab tsi pov puag cov neeg no tab sis tseem hais tias tsoom hwv Phabmab muaj cai tawm tsam nrog cov neeg phem (terrorists) uas yog cov peeb zeej Arakan Rohingya Salvation Army uas tau sib ntaus sib tua nrog tsoom hwv Phabmab cov neeg tswj kev ruaj ntseg thiab tub ceev xwm los tau ntau hli no. Tsis tas li no los tsoom hwv phab mab tseem tau liam tias yog cov neeg phem no ua tus hlawv, thiab tsim kev ploj tuag rau tej neeg no xwb nws tsis muaj feem dab tsi.
Vim tej xwm txheej tau tshwm sim no lawm ces thiaj ua rau Aung Sun Soo Kyi tau qhia meej tias nws yuav tsis mus koom UN Assembly lub rooj sab laj uas yuav muaj rau thaum yav lig rau lub 9 hlis ntuj no lawm.
Tab sis ib nqe uas txaus txhawj xeeb heev mas dua ntawm nom tswv cov kev tsis tawm los hais dab tsi pov puag tej neeg no thiab tsis tas li ntawd los tej pej xeem Phabmab feem coob yeej tseem xav tias cov neeg Rohingya Muslim no tsuas yog ib cov neeg tsiv teb tsaws chaw uas tsiv mus nyob rau lub teb chaws Phabmab no yam tsis raug kev raug cai los yog cov neeg Bangali xwb, txawm tias tej neeg no yeej tau nyob ntawm lub tebchaws Phab mab no los tau ntau tiam neeg lawm.
