Lub caij Nor Shanino loj hlob ntawm Australia tam li ib tug neeg Australia caj cej neeg Australia ces nws yeej raug lwm tus ntxub ntxaug.
Nws tau qhia rau SBS Examines tias txawm li cas los kuj muaj kev pauv hloov rau nws lub zejzog cov kev xav txog cov ker raug lwm tus ntxub ntxaug rau ib tiam neeg lawm thiab.
"Tsuas yog thaum cov hluas tau mus ntsib thiab tau tham qhia tej xwm txheej no rau legal aid xwb ... Ces thiaj pom tej niam tej txiv hais tias, 'Koj ua dab tsi nod! Puas yog koj tab tom yuav foob tub ceev xwm?' Vim rau qhov tej niam txiv txhawj tsam raug tub ceev xwm pauj kua zaub ntsuab, los yog tej zaum yuav ntaus yus lub cev ntaj ntsug, vim yeej yog ib co xwm txheej muaj tseeb tiag ntawm lawv lub qub teb chaws uas lawv tuaj."
Tigist Kebede ces yog tus trauma counsellor uas ua hauj lwm pab tej hluas neeg Australia caj ceg neeg Africa.
Nws tau hais tias ntau phaum hluas yeej ib txwm qhia txog tej xwm txheej uas lwm tus ntxub los yog tej xwm txheej ntau yam uas ua coj los qhia tias ntxub tsis nyiam lawv txhua hnub, hos cov phaum laus ces tej zaum kuj yuav ntsib tej xwm txheej ntxub ntxaug lawv yam tso tshav lug los sis yog muaj ib co system uas ua ntxub ntxaug tsis nyiam lawv.
Tab sis nws tau hais tias tau muaj cov kev xav sib txawv no tsawg zujzus lawm, tom qab uas tau muaj tej kev rwg npoj tawm tsam tsis nyiam tej neeg tsiv teb tsaws chaw, thiab tej chaw nthuav xov xwm tawm tsam tsis nyiam tej neeg Africa thiab zejzog tej kev xav rau tej neeg no rau ntau xyoos dhau los no.
Kuj tau muaj kev sib tuam choj ntawm ntau phaum neeg sib txawv lawm thiab.
Ms Kebede tau qhia rau SBS Examines tias "Tej ntawd thiaj ua rau cov phaum neeg hluas zog tau koom tes ua hauj lwm nrog cov phaum laus zog lawm los tawm tsam nrog tej xwm txheej uas lawv raug lwm tus ntxub ntxaug thiab los nrhiav tswv yim daws tej teeb meem no."
Toom xov xwm —Nkag siab txog cov kev sib ntxub (Understanding Hate) no txheeb tias seb tej xeeb leej xeeb ntxwv neeg Australia caj ceg neeg Africa tab tom los daws tej xwm txheej raug lwm tus ntxub ntxaug li cas ntawm lawv tej zejzog thiab ntawm ntau phaum neeg.
