Cov koom txoos Schoolies los yog koom txoos ua kev zoo siab rau lub caij tej tub kawm kawm tiav xyoo 12 ntawd yeej yog Australia ib cov kab lis kev cai. Yeej tau muaj lub koom txoos no rau yav lig lub 11 hlis ntuj mus txog rau thaum ntxov ntawm lub 12 hlis ntuj, uas cov me yes kawm tiav xyoo 12 ua kev zoo siab rau lub sij hawm ib limpiam ntawd.
Cov chaw uas tej hluas nyiam mus ncig tshaj plaws yog Gold Coast, thiab tau muaj kev kwv yees lawm tias yuav muaj tej me yes kawm tiav xyoo 12 txog li 18,000 tus mus koom lub koom txoos no rau lub 11 hlis ntuj no. Hos lwm cov chaw uas tej hluas nyiam mus ua si heev thiab ces yog Arilie Beach, Byron Bay thiab Lorne ntawm teb chaws Australia mus txog rau Bali thiab Fiji txawv teb chaws tib si.
Police officers watch over the Schoolies week celebrations in Surfers Paradise on the Gold Coast. (Sergio Dionisio/Getty Images) Source: Getty Images
Tej kev haus dej haus cawv
Tau muaj ib cov kev teeb txheeb xyoo 2012 survey uas muaj tej hluas tshaj 500 leej uas tau mus koom xeev Victoria tej koom txoos no ntawm Lorne thiab Torquay yeej tau haus dej haus cawv txog li 8,8 khob rau lub caij ua tej koom txoos no.
Laura Bajurny yog ib tug neeg ntawm lub koom haum Alcohol and Drug Foundation thiaj hais tias cov kev haus dej tsis tu ncua rau rau lub caij mus koom lub koob tsheej no yuav pab kom tej hluas tsis txhob tau haus dej caw ntau thiab.
“Dej caw thiaj yog tej yam tej hluas yuav haus ntau dua. Tab sis yog lawv ho siv lwm yam tshuaj thiab ces lawv yeej tsis paub li tias muaj dab tsi sib xyaws hauv tej tshuaj ntawd li. Ces thiaj yog tej yam yuav muaj tau teeb meem phom sij tau rau lawv. Rau qhov lawv tsis paub tias yog yus siv tej tshuaj ntawd lawm ho yuav muaj tau teeb meem dab tsi rau yus lub cev. Thiab tsis tas li ntawd yog tseem muaj tej tshuaj no coj los tov xyaw nrog tej dej caw haus thiab mas kuj yuav muaj tau teeb meem thiab."
Volunteers and high school graduates during Schoolies on Queensland's Gold Coast. (AAP Image/Dean Saffron) Source: AAP Image/Dean Saffron
Lub koom haum pab kom tej hluas koom lub koob tsheej Schoolies tau txais kev nyab xeeb (Safer Schoolies Response)
Xeev Queensland lub tuam chav Department of Child Safety, Youth and Women thiab lub nroog Gold Coast muaj lub hom phiaj xav tsim kom tau ib cov zwj ceeb nyab xeeb rau lub koom txoos schoolies no ces nws thiaj tsim cov program the Safer Schoolies Response, uas Mark Reaburn uas yog ib tug kws lij choj zejzog yog tus tswj.
Lub koom haum no tau npaj ib cov koob tsheej rau tom tej ntug hiav txwv rau tej hluas no tau mus koom kom tau txais kev lom zem thiab tau txais kev nyab xeeb pib txij li 7pm-ib tag hmo txij hnub tim 16-22 lub 11 hlis ntuj ntawm lub koom haum Schoolies Hub.
“Reaburn tshab txhais tias yog ib cov koob tsheej ntawm tej ntug hiav txwv tseem ceeb rau tej me nyuam, thiab muaj lub hom phiaj pab kom lawv tau koom kev lom zem thiab seev cev raws li qhov lawv ua tau tab sis kom tau txais kev nyab xeeb rau lawv rau lub caij lawv ua kev lom zem ntawd thiab."
Lub koom haum the Safer Schoolies Response yeej muaj cov neeg ua hauj lwm yeem thaj (Volunteers) txog li 1000 tus yeej npaj txhij yuav pab tej hluas no yog tias lawv xav tau txais kev pab cuam.
Kevin Wong yog ib tug neeg yug ntawm teb chaws Mauritius tuaj nyob teb chaws Australia no thiab yeej ua hauj lwm yeem thaj pab tej hluas no los tau 17 xyoo lawm.
“Raws li kuv pom ces kuj yog ib cov koob tsheej zoo heev rau lub caij kawm tiav xyoo 12. Kuv yeej tseem nco tau rau lub caij thaum kuv kawm tiav ntawd ces peb yeej tsis muaj cibfim ua tau tej koom txoos li no ntawm peb teb chaws li, tsuas ua tej koob tsheej me me xwb. Yog tias peb muaj tej koob tsheej li no thiab ces peb yeej yuav mus koom xwb. Tsis tas li ntawd, tau ntau xyoo los no los kuj tau kho tej koob tsheej no kom zoo tuaj lawm thiab seb ho muaj dab tsi rau tej hluas koom ua kev lom zem thiab ho ua tib zoo xyuas kom lawv txhua tus ho tau txais kev nyab xeeb."
A group of graduating school leavers walk along the beach towards Surfers Paradise. Source: Sergio Dionisio/Getty Images
Lwm cov koob tsheej txawv (Alternative Schoolies)
Daniel Donati uas yog tus tswj Melbouren lub tuam txhab ntoj ncig hu ua Antipodeans los yeej npaj ib cov kev mus ncig txawv teb chaws hu ua the Schoolies Unearthed program rau tej hluas mus rau cov teb chaws li Nyab Laj, Indonesia thiab Nepal thiab.
"Donati hais tias tsis yog txhua tus hluas xav mus koom tej koob tsheej no thiab mus nrog lawv tej phooj ywg koom haus dej haus cawv. Yog li peb cov program no thiaj yog ib lub chaw rau tej hluas muaj laj lim tswv yim thiab kev xav muaj ntsis zoo sib xws tau sib sau ua ke los ua lwm yam."
Tsis tas li no los cov program no yeej tsis muaj cov kev haus dej haus cawv dawb tsi li thiab yeej muaj tej hluas txog li ntawm 20 leej mus koom thiab muaj ib tug coj lawv kev.
Donati hais tias cov program no yog mus kawm kom paub txog lwm lub teb chaws tej kab lis kev cai rau lub caij lawv mus ua ib yam dab tsi pab rau tej zejzog kom ua tau lub neej ntev ntxiv mus.
Nrog koj tej me nyuam tham txog tej koob tsheej no
Tej ua niam ua txiv yeej muaj kev txhawj xeeb txog tej hluas cov koob tsheej Schoolies no rau lub caij thawj zaug uas yuav tsis muaj tej laus saib xyuas lawv tab sis tej hluas yuav tau pov plob thiab saib xyuas lawv tus kheej ntawd rau ib lub caij twg. Yog li tej niam txiv uas txhawj xeeb txog tej koob tsheej no yuav tsum tau nrog lawv tej me nyuam tham kom thiaj npaj thiab pab tau lawv tej me nyuam ua ntej yuav mus koom cov khoob tsheej no.
“Bajurny hais tias txhob muab cov kev tham txog tej koob tsheej no ua ib cov kev ntshai dab tsi. Yus yeej muaj peev xwm tham txog tej xwm txheej cuam tshum txig tej koob tsheej uas tau tshwm sim thiab raug tshaj tawm ntawm tej ntawv xovxwm, social media thiab tej TV thiab los saib tej xwm txheej no ua ke los yog sib tham txog tej xwm txheej tau tshwm sim no ua ke los sis yog tham txog qhov tseeb cuam tshuam txog cov koob tsheej Schoolies no los tau kom muaj cib fim sib tham thiab nug tau ib cov lus nug tau tib yam. Piv txwv li ho nug tej hluas tias seb lawv ho paub txog tej dej caw thiab yaj yeeb li cas? Lawv xav li cas rau tej kev siv yaj yeeb thiab dej caw thaum mus koom lob koom txoos no? Los yog tias yog lawv raug teeb meem los sis muaj tej yam xwm txheej tshwm sim rau lawv ne ho yuav ua li cas kom thiaj pab tau lawv tus kheej?"
Listening to live bands are a big part of the free organized activities during the Schoolies festival on Queensland's Gold Coast. Source: AAP Image/Dean Saffron
Sib txuas lus thiab nrog koj tej me nyuam kom paub tias lawv ua li cas lawm
Reaburn xav taw qhia kom tej hluas uas kawm tiav xyoo 12 mus koom ib lub koob tsheej ua ke yuav tsum nyob ua ib pawg thiab ho sib pab thiab saib xyuas sawv daws, hos tej niam txiv los yuav tsum tau hu nug thiab nrog lawv tej me nyuam tham seb lawv ho ua dab tsi lawm.
“Qhov tseem ceeb tshaj plaws ces yuav tsum tau npaj ib lub caij nrog tej me nyuam tham tas mus li seb lawv ho ua dab tsi lawm, tsis hais tham thaum 7 pm tsaus ntuj los yog ib lub caij twg rau ib hnub ntawd los tau. Vim yus tsis xav kom zoo li cia li tso plhuav tej me nyuam mus raug teeb meem los yog pov rau tsov tom. Kuv yeej muaj 2 tug me nyuam tau mus koom cov koob tsheej Schoolies dhau los thiab tau mus caij phiaj ua si lom zem tom tej ntug hiav xwv thiab kuv yeej tsis txwv dab tsi vim kuv yeej paub zoo tias tej koom txoos no zoo li cas thiab yeej muaj ntau yam zoo npaj los pab tej hluas kom tau txais kev nyab xeeb, tab sis txawm li cas los thaum kawg ces yeej tseem yog tej hluas yuav tsum tau ua tus pov plob thiab saib xyuas lawv tus kheej thiab coj tej cwjpwm zoo."
Yog koj xav tau tej tswv yim taw qhia kom koj tej me nyuam tau txais kev nyab xeeb thaum mus koom tej khoob tsheej ces mus txheeb xyuas tau ntawm lub koom haum dej caw Alcohol and Drugs Foundation lub vas sab. Los yog mus txheeb xyaus tau ntawm lub koom haum koob tsheej nyab xeeb Safer Schoolies lub vas sab (website) kom koj thiaj paub tias yuav ua li cas thiaj tau txais kev nyab xeeb rau koj tej me nyuam los yog rau koj rau lub caij koj tej me nyuam los yog koj mus koom cov koob tsheej no ntawm Gold Coasts.
