Cov kev ua niam txiv qhuav pab tu Australia tej me nyuam no yuav tau txais txiaj ntsim zoo rau ib tub me nyuam lub neej thiab kuj yog tej yam tau txais txij ntsim rau tus neeg pab tu thiab saib xyuas cov me nyuam no tib yam.
Tab sis leej twg thiaj muaj cai los ua tau niam txiv qhuav kom muaj cai tu thiab saib xyuas tau Australia cov me nyuam?
Koj yuav tsum yog:
-ib tug pej xeem Australia los yog ib tug neeg nyob ruaj huav tebchaws Australia (Australian citizen or permanent resident), -tau txais kev noj qab nyob zoo tsis muaj mob nkeeg, -tsis yog tus neeg tau ua txhaum plaub ntug dua los, -thiab yuav tsum muaj hnoob nyoog tshaj 25 xyoos rov saud.
Tsis tas li ntawd qhov zoo tshaj plaws mas tseem xav kom koj muaj ib chav seem npaj rau tus me nyuam yuav tos los tu thiab saib xyuas ntawd tau nyob tau pw thiab. Vim yog ib yam tseem ceeb heev, rau qhov tus me nyuam koj yuav tos los tsom kwm saib xyuas ntawd twb ntsib teeb meem txom nyem lawm ces thiaj xav kom nws tau ib qhov chaw nyab xeeb nyob thiab kom nws mloog tau tias yog ib feem ntawm koj tsev neeg thiab yog nws lub tsev.
Yog li koj yuav tsum tau rub siab ntev thiab ua neeg siab loj siab dav pab nws. Tsis muaj teeb meem dab tsi txawm koj tseem hluas tsis tau muaj cuab yig los sis yog muaj txwj nkawm, ntiav tsev nyob los yog yuav tsev los tau.
Source: CC0 Public Domain
Cov kev tu thiab tsom kwm saib xyuas cov me nyuam hom twg thiaj haum koj:
Txawm tias cov kev tus thiab saib xyuas tej me nyuam no yuav siv sij hawm ntev los feem ntau yeej siv sij hawm ib ntus xwb. Uas cov niam qhuav txiv qhuav fem coob yeej coj tej me nyuam no los nrog lawv nyob li ntawm ob peb hnub los yog ntau hli ntawd xwb. Muaj ntau hom cov kev tu thiab saib xyuas cov me nyuam li no:
-Emergency care (12 hours onwards): Yog ib cov kev saib xyuas sai sai li ntawm ntau teev mus rog rau ob peb hlis.
-Respite care (2 days to 3 weeks): Pab tu thiab saib xyuas tej neeg mob, cov laus neeg los yog cov neeg puas cev ib ntus kom cov niam qhuav txiv qhuav uas tu cov neeg no tau so me ntsi.
-Restoration and interim care (up to 12 months): Cov niam qhuav txiv qhuav (Foster carers) yuav coj cov me nyuam mus nrog lawv nyob hauv lawv lub tsev txog rau thaum tus me nyuam tsev neeg uas yug nws muaj peev xwm saib xyuas nws kom nws tau txais kev nyab xeeb.
-Guardianship: Yog tsev hais plaub tso cai rau ib tub me nyuam twg mus nrog nws cov txheeb ze los yog ib tug neeg paub tab nyob kom muaj hnoob nyoog txwm 18 xyoo. Yog ib tug me nyuam twg nrog lawv cov kwv tij los yog txheeb ze nyob ib ntus xwb ces yog cov kev tu hu ua Relative los yog Kinship care.
-Open adoption from care (lifelong): Yog tus niam qhuav txiv qhuav coj tus me nyuam los tu tab sis tus me nyuam tseem muaj kev sib txuas lus tau nrog nws tsev neeg yug nws raws li lub sij hawm tsim nyog.
-Long-term foster care (6 months onwards): Yog cov kev tu tsom kwm cov me nyuam uas tsis muaj peev xwm rov qab mus nrog lawv tsev neeg yug lawv nyob tau thiab tsis tso cai rau lwm tus saib xyuas los yog tsis tso cai rau lwm tus thov tus me nyuam ntawd ua me nyuam saws coj mus tu tsis hais tus me nyuam ntawv yeem los yog vim muaj kev cuam tshuam txog cov kab lis kev cai coj ntseeg ntawd.
Thawj kauj ruam ces yog yuav tau xa daim ntawv thov ua niam qhuav txiv qhuav (Lodge an application):
Yog li koj yuav tsum tau sau ntawv thov ua niam qhuav txiv qhuav nrog cov chaw tu thiab tsom kwv cov me nyuam (fostering agency).
Australia cov xeev yeej muaj ib cov koom haum uas koj xa tau tej ntaub ntawv rau lawv raws li hauv qab kawg ntawm zaj xov xwm no ntawm (Useful links).
Source: CC0 Public Domain
Txheeb xyuas koj seb puas txhaum plaub dab tsi thiab xyaum koj kom paub tu thiab pab tus me nyuam:
Thaum koj xa ntawv thov ua niam qhuav txiv qhuav lawm, ces lawv yuav siv caij nyoog los xyaum koj ib ntus thiab ntsuam xyuas koj li ntawm 6 hli thiab nrog koj lis tej hauj lwm no ua ke seb koj puas muaj peev xwm ua tau niam qhuav txiv qhuav los yog muaj peev xwm tu thiab saib xyuas tus me nyuam ntawd.
Sharon Broady ntawm lub koom haum Fostering NSW hais tias:
“Cov neeg ntawm cov koom haum saib xyuas cov me nyuam no yuav tuaj ntawm koj tsev, tuaj xyuas koj thiab txheeb xyuas txhua yam kom tau txais kev nyab xeeb rau tus me nyuam, yuav txheeb seb koj puas yog cov neeg ua txhaum plaub ntug dab tsi, xyuas koj tej ntaub ntawv thiab qhia tej hauj lwm lawv xav kom koj ua, yuav xyuas seb puas tsim nyog cia koj tu thiab saib xyuas tus me nyuam no thiab cia koj xav seb koj nyiam hom kev tus me nyuam twg uas haum rau koj txoj kev ua lub neej."
Cov chaw tus me nyuam (Fostering agency) cov kev pab cuam rau koj:
Cov chaw no yuav nrhiav ib tug neeg nrog koj tu thiab saib xyuas tus me nyuam no thiab koj muaj peev xwm hu tau rau lawv 24 teev thov kev pab cuam yog koj ntsib teeb meem nyuaj dab tsi. Thiab koj yeej thov kom lawv nrhiav ib tug neeg tuaj pab tu tus me nyuam no ib ntus kom koj ho tau so thiab lawv yuav xyaum thiab qhia koj kom koj paub tu thiab saib xyuas tus me nyuam koj coj los nrog koj nyob ntawd.
Cov chaw no yeej them nyiaj pab rau tej nqe tu tus me nyuam no rau koj, tab sis yuav them ntau tsawg li cas ces nyob ntawm hom kev tu tus me nyuam no, thiab seb nws muaj hnoob nyoog li cas thiab nws xav tau kev pab cuam dab tsi xwb.
Xav tau cov niam qhuav txiv qhuav hais lwm hom lus thiab coj cov kev cai sib txawv (Multicultural foster care) los pab tu cov me nyuam no:
Txawm tias muaj ib txhia chaw tu me nyuam yeej paub lis tej hauj lwm no zoo, tab sis txhua lub chaw tu me nyuam yeej xav tias yog ib qho zoo tshaj plaws uas yuav tau coj tus me nyuam no mus nrog cov cuab yim neeg uas muaj peev xwm pab tau fab kab lis kev cai rau lawv thiab.
Sharon Broady tshab txhais tias:
"Yog ib qho tseem ceeb heev uas yuav tsum tau cia cov me nyuam no nrog tej cuab yig uas muaj peev xwm pab tau lawv tej kab li kev cai, kev coj ntseeg uas lawv ib txwm coj taug kom lawv mloog tau tias lawv yog ib feem ntawm yim neeg lawv nrog nyob, kom tsis txhob ua rau lawv xav tias lawv yog ib tug neeg txawv hauv tsev neeg ntawd. Vim rau qhov tus me nyuam no twb raug ib yam teeb meem dab tsi thiaj ua rau nws raug tshem tawm ntawm lawv tsev neeg lawm ces tsis xav kom nws rov qab ntsib teeb meem dab tsi ntxiv."
Tsis tas li no los yuav yog ib yam yooj yim dua rau tus me nyuam no kom nws muaj peev xwm rov qab mus ua tau lub neej li qub nrog nws tsev neeg yug nws ntawd.
Useful links
To find a foster agency in your state:
Multicultural foster care
Mercy Community Services (Queensland)
