Yeej muaj ntau tus neeg tsiv teb tsaws chaw txiav txim siab nrog lwm tus neeg tsiv teb tsaws chaw zoo tib yam li lawv uas tuaj ntawm lawv lub teb chaws nyob ua ke ntawm tib lub zos.Kuj yog tej yam zoo thiab vim rau qhov, lawv muaj peev xwm hais thiab siv tau lawv cov lus, tau txais kev pab cuam ntawm lawv lub zejzog los pab rau tib cov teeb meem zoo tib yam uas lawv muaj thiab kuj coj tej kab lis kev cai zoo tib yam li lawv thiab.
Mahir Momand uas yog tus coj lub koom haum Regional Opportunities Australia hais tias yeej muaj tej yam yooj yooj yim li mus yuav tau tej khoom noj li yus ib txwm noj dhau los ntawm tej khw ntawd kuj yuav muaj peev xwm kom yus ua tau lub neeg tshiab ntawm teb chaws Australia no thiab.
Tej zos uas yus muaj peev xwm yuav tau tej khoom noj khoom haus zoo tib yam li tej yus ib txwm noj ntawm yus lub qub teb chaws kuj pab kom yus muaj peev xwm nyiaj ntxeem kom dhau ntawm tej kab lis kev cai, txoj kev xav thiab txoj kev ua lub neej uas txawv tej yus tau ua dhau los thiab.
Tab sis feem ntau mas tej neeg tsiv teb tsaws chaw pheej nyiam mus nyob rau tej nroog loj ntau xwb, vim rau qhov yog tej nroog muaj ntau yam peev txheej, li tej chaw pab cuam cov neeg tsiv teb tsaws chaw ntawd pab rau lawv.
Berivana Mohamed los kuj yog ib tug neeg ua hauj lwm yeem thaj (Volunteer) nrog lub koom haum Australian Migrant Resource Centre ntawm nroog Adelaide. Thiab nws tau tsiv ua neeg thoj nam ntawm Bosnia Herzegovina tuaj nyob rau Australia no xyoo 1995.
Nws los kuj tau koom ntau pawg neeg sib txawv thiab tab sis yeej tseem muaj feem cib cuag mus los nrog nws cov neeg zejzog Bosnian. Nws hais tias nws niam yeej yog ib tug neeg ua hauj lwm pab cuam zejtsoom pab rau nws cov neeg zejzog ntawm lub teb chaws Yugoslavia dhau los, thiab nws yeej txaus siab pab txhua leej txhua tus uas tsiv ntawm lub teb chaws no tuaj nyob rau teb chaws Australia no.
Thiab thaum Berivana tseem nto nkauj ntawd, ces nws yeej tau txiav txim siab mua xyaum hauj lwm nrog lub koom haum no.
Nws kuj qhia thiab tias cov kev tau nyob ze nrog nws cov neeg zejzog Bosnian ntawm nroog Adelaide kuj yog tej yam zoo thiab, tab sis kuj ua rau nws niam tsis muaj peev xwm kawm tau ntawv Askiv (English) zoo thiab.
Getty Images/SDI
Fatima Salihi kuj yog ze ntawm lub nroog lives Adelaide thiab. Nws yeej tau tsiv ntawm teb chaws Afghanistan tuaj nyob rau teb chaws Australia no rau xyoo 2018. Thiab nws kuj tau mus koom nrog ntau lub clubs uas yog tej yam tseem ceeb heev pab kom nws muaj feem sib cuag mus los nrog Australia lwm cov neeg zejzog thiab kuj tau pab kom nws kawm tau ntawv Askiv sai heev. Tib lub tsam thawj no los nws kuj yeej tseem xav sib cuag mus los nrog nws cov neeg zejzog Afghan thiab.
Tab sis yog tham txog nws niam nws txiv lawm, ces cov kev tau nyob ze nrog nkawv cov neeg zejzog Afghan kuj yog tej yam tseem ceeb heev rau nkawv cov kev kawm ntawv Askiv thiab raws li Fatima tau qhia. Yog tias nkawv tsis muaj feem koom nrog nkawv tej neeg zejzog ces ntshe nkawv yuav nyob twj ywm tom tsev xwb thiab ntshe yuav ua rau nkawv raug cai nyob kho siab khuav xwb.
Vim pab hais tib hom lus thiab peb muaj txoj kev npau suav kev xav thiab txoj kev zoo siab thaum peb pom peb tej neeg zoo tib yam. Thiab thaum peb tham los yeej totaub zoo tias lwm tus hais dab tsi, ces thiaj pab kom peb mloog tau tias peb muaj feem koom thiab yog ib feem ntawm peb tej zejzog thiab.
Momand hais tias txawm cov kev pab cuam rau yus uas tau txais los ntawm tej neeg zejzog yog ib cov tseem ceeb heev, los nws yeej tsis xav kom cov neeg tsiv teb tsaws chaw tuaj nyob tshiab ntawm teb chaws Australia no pheej nrog lawv tej neeg zejzog nyob nkaus xwb thiab.
Vim rau qhov tej neeg zejzog no pheej hais lawv tej lus xwb, thiab pheej ua kom lawv tsis tau mus koom thiab sib cuag mus los nrog lwm cov neeg zejzog sib txawv hauv teb chaws Australia no, ces yuav ua rau lawv kawm tsis tau ntawv thiab lus Askiv zoo, yuav ua rau lawv tsis nkag siab txog tej kab lis kev cai ntawm lub teb chaws Australia uas lawv muab coj los ua lawv lub teb chaws tshiab no zoo.
Txawm tias yuav muaj tau tej xwm txheej li hais no thiab, los Mohamed yeej hais tias cov kev tau nyob nrog tej neeg tsiv teb tsaws chaw tej neeg zejzog koj yog tej yam zoo rau lawv thiab, yog tham txog cov nyuam qhuav tuaj pib dua lub neej tshiab ntawm teb chaws Australia no, tab sis yeej tsis yog tej yam dab tsi uas yuav thaiv lawv txoj xub ke kom txhob muaj peev xwm los pab txhim kho lub teb chaws no li cas.
Nws ntseeg tias yeej tsis yog tej yam yooj yim thaum yus mus pib dua lub neej rau ib lub teb chaws tshiab uas yus tsis paub luag lus, thiab txhua tsav yam yeej txawv tag nrho li lawm.
Yog vim li no thiaj yog tej yam tseem ceeb heev rau thaum tseem ntxiv uas tej neeg no tau txais kev pab cuam los ntawm lwv tej neeg zejzog zoo tib yam li lawv.
Thiab thaum lawv nyob ntev tuaj lawm ces lawv mam yoog tau raws li tej neeg zejzog hauv teb chaws Australia thiab pab txhim teb kho chaw raws li lawv tej tsab peev xwm sib txawv thiab tig los sib pab.
Getty Images/Thomas Barwick
Tab sis cov kev nyob ze nrog yus tej neeg zejzog tsis yog tib cov kev nyob rau hauv tej nroog loj nkaus xwb thiab. Vim yeej tau muaj tej neeg tsiv teb tsaws chaw tej neeg zejzog ntau zuj zus tau mus nyob rau ntau cheeb tsam hauv teb chaws Australia no lawm thiab.
Piv txwv li tau muaj cov neeg Indian uas coj ntseeg kev cai Sikh ua tuaj ntawm teb chaws India tuaj nyob rau teb chaws Australia no yeej muaj peev xwm mua ua tau lub neej nyob rau ntawm ob lub zos Coffs Harbour thiab Byron Bay lawm thiab.
Tej neeg tsiv teb tsaws chaw feem coob yeej tau txais kev pab cuam los ntawm lawv tej neeg zejzog rau lub caij lawv tau mus nyob rau ib lub tebchaws tshiab. Tab sis cov kev muaj peev xwm sib cuag mus los thiab muaj feem koom los yog tsim kev sib raug zoo nrog lwm cov neeg zejzog ntawm lub tebchaws lawv mus nyob tshiab ntawd los kuj yog tej yam tseem ceeb heev kawg nkaus li thiab.
