Xov xwm tshiab cuam tshuam txog cov tsev SPK Housing 2019.07.21.

Hmoob tej neeg zej zog ntawm Far-North Queensland puas muaj peev xwm yuav thov tau cov tsev public housing ntawm lub koom haum SPK Housing nyob ntxiv lawm?

SPK Housing Office, Cairns, Queensland Source: Mai Cee Vue Chang

Mloog tau tus haus zos Cairns pawg 3 uas yog Cathy Zeiger tawm tswv yim uas lus Askiv (English) tias seb Hmoob tej neeg zejzog ntawm Cairns puas yuv thov tau tej tsev SPK Housing nyob txuas ntxiv ntawm no:

Maiv Ci Vwj Tsab uas yog lub koom haum SPK Housing tus coj tau qhia tias tam sim no nws lub koom haum no muaj peev xwm teev zwm nrog tsoom hwv teb chaws Australia tej cai public housing tshiab uas siv thoob plaws teb chaws Australia lawm, thiab xav thov ua tsaug rau txhua leej txhua tus tsis hais cov pawg tswj dhau los thiab tam sim no uas tau pab kom muaj peev xwm coj lub koom haum no mus teev zwm raug cai tiav lawm.

Qhov nyuaj mas yuav tsum tau los xyuas kom xub xub pub tej vaj tse no rau cov neeg tsis tau vaj tse nyob, cov neeg tsiv teb tsaws chaw nyuam qhuav tuaj tshiab rau teb chaws Australia los yog cov twb tau teev zwm npe tos los tau ntev ua ntej los sis cov cuab yig uas muaj neeg coob nyob puv lub tsev 4 chav ntawd ua ntej tso. Dua li ces yuav tau tos txog yus zeeg tso yus mam li tau cov tsev social housing no nyob.

SPK Housing prevours board members who are currently staying as advisors to support the new board-Mai Cee Vue Chang Source: Mai Cee Vue Chang

Maiv Ci Vwj Tsab qhia tias nws paub tias tseem muaj ib txhia tub koom siab ntawm Hmoob tej zej zog txhawj tias tsam tsis tau tej tsev no nyob ntxiv lawm. Txawm li cas los nws qhia tias lub koom haum no yeej tau nrhiav tsev pab rau tej tub koom siab nyob los tau 27 xyoo dhau los no lawm yuav tsis lam tso kom plam mus yooj yim, thiab yeej yuav ua txhua yam raws li qhov muaj peev xwm ua kom nrhiav tau tsev rau nws tej tub koom siab nyob txuas ntxiv rau yav pem suab.

SPK Housing current board-Mai Cee Vue Chang Source: Mai Cee Vue Chang

Maiv Ci Vwj Tsab qhia tias twb yuav muaj lub rooj sab laj Annual General Meeting (AGM) rau lub 

October-November 2019, no ces yog cov tub koom siab twg muaj kev txhawj xeeb thiab muaj lus nug dab tsi txog tej vaj tse no ces txhob ua siab deb kom hu tau rau lub koom haum SPK Housing tau zauv xov tooj 07-4036 2221 los sis xav moo thiab tham tau nrog lub koom haum no ntawm nws tus SPK Housing Facebook page tau.

Mloog tau ntau yam xov xwm ua lus Hmoob thiab lus Askiv tau raws li hauv qab no:

Mloog tau SBSHmong rau hnub zwj Teeb (Thursday) 6 pm AEST thiab zwj Hnub (Sunday) 11 am AEST los sis mloog tau ntawm SBS Hmong Facebook page thiab download thiab mloog tau cov podcasts (Xov xwm kaw ua suab) ntawm Stitcher, Apple podcasts thiab Google podcasts tau.