Xov xwm luv tshaj tawm hnub zwj Quag (Tuesday news 01.07.2025):
Lub koom haum Australia Education Union zoo siab rau tsoom fwv teb chaws Australia cov kev yuav pib them nyiaj rau tej tub kawm nursing, qhia ntawv thiab social worker uas mus kawm xyaum ua hauj lwm txij tim 1 lub 7 hli ntuj (2025) mus, uas yuav tau ib limtiam twg tshaj $331.
Tej kws tshuaj ntsuam thiab kwv yees huab cua hais tias cuab hlob thiab nag xob nag cua ua rau ntuj los nag hlob noo av ntug thawm av tob tshaj 100 millimitres rau ntau teev ntawm Australia tej ntug hiav txwv sab hnub tuaj, ua ke no los kuj kwv yees tias yuav muaj ntuj los nag hlob dej noo ntub thawm av tog txog li 120 millimitres rau ntawm Greater Sydney rau lub sij hawm 6 teev ntxiv no thiab.
Karoline Leavitt uas yog tsev dawb tus neeg nthuav xov xwm qhia tias Meskas tus president tseem tab tom npaj yuav kos xeem mem tes rau cov executive order yuav tshem cov kev raug txim nyiaj txiaj rau Syria uas tej zaum yuav tswj tau kev ruaj ntseg rau lub teb chaws no thiab tej zaum kuj yuav ua rau tshem tej kev txwv nthuav dav ntxiv.
Tau muaj ib cov kev nqua hu rau tej neeg Australia uas muaj hnoob nyoog 50 txog 70 xyoo thiab tej neeg haus luam yeeb ib xyoo txog 30 pob kom mus siv cov kev txheeb seb lawv puas mob cancer ntsws txij tim 1 lub 7 hli ntuj no mus ntawm tej chaw kho mob uas siv cov Medicare bulk billing.
Tau muaj ib tug txiv neej hnoob nyoog 26 xyoo raug tub ceev xwm txhom thiab raug teem txim ntau tshaj 70 lub txim liam tias tau tsim cov xwm txheej sexual abuse rau 8 tus neeg ntawm Point Cook Childcare Centre txij lub 4 hlis ntuj 2022 txog lub 1 hlis ntuj xyoo 2023. Tej xwm txheej no thiaj ua rau tej neeg tshuaj ntsuam tej xwm txheej no tau qhia rau tej niam txiv uas tau coj lawv tej me nyuam rau lwm tus zov ntawm 20 lub childcare centres txij 1 hlis ntuj xyoo 2017 txog lub 5 hlis ntuj xyoo 2025 no. Thiab hau xeev Jacinta Allan hais tias twb tau nrhiav kev pab cuam pab rau tej cuab yig muaj tej me nyuam coj mus rau tej chaw no zov lawm.
Thawj pwm tsav Anthony Albanese hais tias tseem yuav ua txhua yam kom muaj peev xwm npaj tau ib lub rooj sab laj nrog Meskas tus coj tham tim ntsej tim muag txij li tsis muaj peev xwm tham 1 hlis dhau los ua muaj tej xwm txheej ntau yam ntawm Middle East ces thiaj tsis muaj peev xwm ntsib tau nws, thiab thiaj ua rau Australia tus coj pheej raug nug tias thaum twg nws mam ntsib Meskas tus coj.
Pab nom Greens tus coj hu ua Hannah Thomas hnoob nyoog 35 xyoos ua tau koom sib tw lub rooj nom Gryndler nrog thawj pwm tsav Anthony Albanese kuj raug tub ceev xwm NSW muab txhom lub caij nws mus koom cov kev rwg npoj tawm tsam txhawb nqa tej neeg Palestinians limtiam dhau los uas tau ua raug mob rau nws ntsej muag uas tej zaum auv ua rau nws ib sab qhov muag tsis pom kev.
Txij tim 1 lub 7 hli ntuj (2025) mus ces tau coj ib co cai tshiab los siv tswj tej kev tsheb thoob teb chaws Australia li yuav nruab cov twj txhom tej neeg tsav tsheb seb puas siv xov tooj thaum tseem tsav tsheb thiab yuav siv tej cai txwv tias pub tsav tsheb ceev npaum li cas coj los daws cov xwm txheej neeg tas sim neej ntawm tej kev tsheb ntawm tej xeev.
Jacinta Allan uas yog hau xeev Victoria hais tias lub xeev no cov Voice to Parliament yuav tsis raug teev nrog tej txhooj cai tswj haiv li cov kev hloov kho tej txheej cai tswj haiv thiab teev li tsoom fwv teb chaws cov hauj lwm uas ua tsis tiav ntawd.
Ntiaj teb lub koom haum tswj dej num noj qab haus huv (World Health Organisation -WHO) tau nqua hu kom tej teb chaws lees paub cov xwm txheej nyob tib leeg twm zeej kho siab khuv yog zej tsoom ib cov kev noj qab haus huv thiab tsim cai los tswj tej teeb meem no.
Ua ke no los UN kuj muaj ib lub rooj sab laj 3 hnub ntawm teb chaws Spain nqua hu ntiaj teb tsoom thawj coj kom kub siab los daws tej teeb meem txom nyem, kab mob, thiab daws tej xwm txheej huab cua pauv hloov thoob ntiaj teb.
Nplog kuj tau tsim tau tej ncej hu xov tooj txog li ntawm 20 qhov chaw kom hu tau nrog ntau lub teb chaws nyob ncig nws li Suav, Nyab laj, Phabmab, Thaib thiab Cambodia raws li The Laotian Times tshaj tawm.
Bangkok Post tshaj tawm tias Thaib lub tsev hais plaub Consitutional Court tseem yuav txim siab tias seb puas lees tias Thaib tus thawj pwm tsav Paetongtarn Shinawatra uas ua txhaum rau tej lus paim quav thaum nrog Hun Sen tham rau lub caij muaj neeg Thaib tawm tsam ntawm tus pej thaum tub rog thiab ntawm tsev tsoom fwv hais kom nws tawm nws tus nom, uas tau ua rau muaj ib tug neeg ntawm lub txhab nyiaj Bangkok Bank hais tias tej xwm txheej laj fai kum xeeb ntxhov quav niab no ua rau tsis muaj neeg nqe peev lagluam rau lub caij tseem ntsib Meskas cov se tsub rau Thaib tej khoom xav mus muag rau nws.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
