Teb chaws Sudan cov tsov rog pej xeem uas muaj kev sib tawm tsam ntawm cov tub rog Rapid Support Forces (RSF) uas sib tua nrog tsoom fwv Sudan tej tub rog tau ua rau ras los ua tsov rog pej xeem ntev txog 15 hlis (1 xyoos 3 hlis) lawm.
Lub caij tseem muaj tsov rog pej xeem no ces RSF raug liam tias tau tua tej neeg pawg tsawg tsheej pab, thiab siv cov kev yuam deev los tsim kev kub ntxhov uas nws tsis lees.
Mohamed Dodah uas yog ib tug neeg thoj nam thiab yog tus coj lub zos Zaghawahais ntxiv tias ''Twb tau muaj tej pej xeem txog 1.5 million tus tab tom raug kev tsim txom los ntawm tej muas txwv siv sib tua, tej drones thiab tej txhais foob pob uas sib ntaus sib tua ntawm ntug nroog.''
Cov tub rog RSF tau mus puav lub nroog Al-Fashir ces thiaj ua rau tej neeg ntawm lub nroog no tsis tau kev khiav tawm thiab tam sim no tau muaj xov xwm qhia tias twb ze ze rau qhov yuav muaj ntau puas txheeb tus pejxeem yuav tuag tshaib lawm.
Dodah hais ntxiv tias ''Twb tau muaj tej pej xeem txog 1.5 million tus tab tom raug kev tsim txom los ntawm tej muas txwv siv sib tua, tej drones thiab tej txhais foob pob uas sib ntaus sib tua ntawm ntug nroog.''
UN kuj qhia tias yeej muaj ib nrab ntawm Sudan tej pej xeem 50 million tus tab tom ntsib tej xwm txheej tshaib nqhis loj phem heev txog theem 5 uas yog theem siab tshaj plaws rau lub sij hawm ob tog tau sib tua ntawm teb chaws Sudan, uas UN yeej tau teev tias muaj 11 qho chaw uas muaj tej neeg tshaj 330,000 tus ces twb tab tom ntsib tej xwm txheej tshaib nqhis.
Nathaniel Raymond uas yog ib tug neeg tshuaj ntsuam txog cov kev pov puag leej tib neeg txoj cai ntawm lub chaw teeb txheeb Yale Humanitarian Research Lab, uas yeej tau ua hauj lwm nrog U-N kom nkag siab zoo txog cov xwm txheej tshaib nqhis hais tias:
"Gaza tsuas tsis tau khoom pab cuam 3 hlis xwb, tab sis lub nroog Al-Fashir ces twb yeej tsis tau tej khoom pab cuam txij lub caij nplooj hlav xyoo 2024 dhau los lawm."
Farhan Haq uas yog UN tus kis hais tias tej pej xeem ntawm lub nroog Al-Fashir ces twb tsis pom qab cob cuab lawm.
"Tej neeg zejzog yeej qhia tias lawv tab tom tas sim neej los ntawm cov kev tshaib nqhis, thiab tsis tau zaub mov noj, thiab kuj muaj ib txhia nee ghais tias lawv yuav tau noj tej khoom pub tsiaj lawm xwb.''
"Tam sim no ces tej neeg tsuas coj tej plhaub zom roj txiv laum huab xeeb los ua tej khoom noj tseem ceeb lawm xwb thiab tsuas tau noj ib puag ib hnub xwb. Lawv tab tom raug kev tsim txom tam sim no thiab lawv niaj hnub tas sim neej,'' raws li Dodah hais.
Dodah hais tias cov tub rog RSF tau mus muab nws lub zos, nws tej neeg Zaghwa, tej neeg Masalit thiab Fur tej tsev hlawv thiab tseem muaj tej neeg pej kum haiv mus pab tej neeg txom nyem tua thiab. Cov tub rog no los yeej xav txeeb kom tau lub nroog Al-Fashir.
Raymond thiaj qhia tias tej technology data sensing ntawm NASA thiab European Space Agency pab lawv txheeb thiab pom tias yeej muaj tej neeg tas sim neej ntau tuaj ntxiv.
Mohamed Dodah tus txiv ntxawm Algaly Adelrasoul uas daig ntawm lub nroog no thiaj hais tias:
''Lub nroog no raug RSF puav, tsis muaj peev xwm khiav tawm lawm. Yog khiav ces tej poj niam me nyuam yuav raug kev phom sij li yuav raug tua, tej zaum lawv kuj yuav raug yuam deev. Yog tias lawv tso yus thiab yus muaj hmoo ces tej zej kuj yuav khiav mus tau rau tej zos ib cheeb tsam ze. Thiaj yog tej xwm txheej phom sij heev. Tab sis yog yus tsi khiav ces yog yus tsis raug RSF tua ces yus yuav tuag tshaib tuag nqhis, tuag vim tsi tau kho mob.''
Thiab kuj pom tias zoo li tsoom fwv Sudan twb tsis tshua muaj peev xwm tawm tsam nrog tej tub rog RSF lawm, thiab RSF tseem txeeb tau lub nroog Al-Fashir thiab ces Dodah hais tias:
"Lawv yeej yuav muab tej neeg tua, muab yuam deev, thiab muab tej neeg nyiag txhom. Thawj co ces yog muab tej coj tua. Ces lawv yuav muab kuv ntes, muab kuv kaw tsev laj cuj thiab yog tsis muab kuv tua ces lawv xav kom kuv muab nyiaj xiab mas thiaj muab kuv tso.''
Tom qab tau muaj cov kev sib tham ntawm Washington kom tsim tau kev thaj yeeb limtiam dhau los, ces tej pej xeem ntawm lub nroog Al-Fashir tau nqua hu kom ntiaj teb nrog raus tes thiab pab xaus cov tsov rog muaj los tau 15 hlis no.
Tau muaj ib tug poj niam ntawm lub nroog no hais tias:
"Yog nej tsis pab cawm peb, ces ntshe peb yuav tsis tau kev kho mob siv, peb yuav tsis tau tsev kho mob siv, tsuas tshuav txoj kev tuag lawm xwb. Peb tsis muaj dab tsi lawm tab sis tsuas yog txoj kev tuag lawm xwb."
Mloog tau xov xwm ntxiv ntawm SBS Hmong lub vas sab, download SBS Adio app thiab caum SBS Hmong Facebook page.
