Australia yog lub teb chaws muaj tej neeg raug txheeb tau tias mob cancer tawv nqaij ntau tshaj plaws hauv ntiaj teb, thiab yog tus mob cancer muaj ntau tshaj plaws ua hom 3 ntawm teb chaws no. Thiab Australia yeej tau siv sob lus ''Slip (hnav ris tshob ceg ntev, npab ntev), Slop (pleev sunscreen), Slap (ntoo koos mom), seek (nrhiav chaw ntxoov ntxoo nkaum duab tshav ntuj), slide (ntoo tsom iav duab pov puag yus qhov muag)'' coj los qhia zej tsoom kom pov puag tus kheej kom tsis txhob raug tshav ntuj kub ziab.
Thiab Professor David Whiteman ntawm lub chaw teeb txheeb QIMR Berghoger Medical Research Institute hais tias yuav tsum siv ntau txoj xub ke pab tsis yog pheej yuav siv suncreens nkaus xwb.
Tau muaj ib co kev teeb txheeb tshiab ntawm lub koom haum CHOICE txheeb tau tias
''tej sunscreen ib txhia siv tsis tau hauj lwm zoo npaum li tej tuam txhab tsim hais' ces thiaj li tau ua rau muaj kev txhawj xeeb rau tej neeg yuav sunscreens siv.
Tab sis tej kws thiab tej koom haum txhawb nqa kom neeg Australia pov puag yus tus kheej kom tsis txhob raug UV thiab tshav ntuj kuj hais tias yeej tseem xav kom neeg Australia siv tej Sunscreen no li qub thiab siv lwm yam xub ke pab kom tsis txhob raug tshav ntuj kub.
Tsis yog yus mus rau tom tej ntug hiav txwv es thiaj yuav tau pleev xwb, tab sis cov kev tawm mus rau ib qho chaw twg nraum zoov rau lub caij muaj tej ultraviolet ray (UV ray) tshaj 3 rov sauv ces yeej tsim nyog yus yuav tau siv tej sunscreens los yog ris tsho npab ntev ceg ntev, ntoo koos mom thiab nrhiav duab ntxoov ntxoo nkaum kom tsis txhob raug tshav ntuj kub, kom thiaj zam dhau tus mob cancer tawv nqaij melanoma.
Jay Allan uas yog tus neeg uas raug ntsuam tias tau mob cancer tawv nqaij melanoma loj txog theem 3 xyoo 2008 tau teeb tsa lub koom haum Australian Skin Cancer Foundation tom qab 10 xyoo uas nws zoo ntawm tus mob no hais tias cia siab tias yuav pab tau tej neeg mob muaj ntsib tej xwm txheej muaj ntsis zoo li nws thiab txhawb nqa kom tej neeg kub siab txog tsab xo qhia kom pov puag tsis txhob raug tshav ntuj kub ziab.
Allan tau hais tias ''Tej neeg yeej ib txwm tsis pleev sunscreen rau lub caij ntuj no. Tab sis ntau thaj chaw ntawm Australia no yeej muaj tej UV txog 3 los yog siab tshaj ntawd, ces thiaj yog tej yam tseem ceeb uas peb yuav tau pleev tej sunscreen pov puag peb txawm tias ntxoov huab.''
Tamara Dawson uas yog tus teeb tsa lub koom haum Melanoma thiab Skin Cancer Advocacy Network thiaj taw qhia kom neeg Australia txheeb cov ultraviolet radiation (UV) ua ntej yuav mus rau nraum zoov ib qho twg.
Dawson hais tias ''Yog tej yam tseem ceeb uas tag nrho txhua tus neeg Australia yuav tau totaub zoo txog tias muaj tej UV ntawm tej chaw yus nyob npaum li cas. Vim lub caij ntuj sov ntawm Australia no ces yeej muaj tej UV siab txij li 12 txog 14 diam.''
Jay Allan thiaj hais tias ''kuv tus kheej, kuv poj niam thiab kuv tej me nyuam peb yeej pleev tej sunscreen txhua hnub twg, thiab rov qab pleev ntxiv rau, kom peb tsis txhob raug tshav ntuj kub - tab sis yeej xav kom peb siv 5 txoj xub ke los pab peb thiab.''
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
