Xov xwm luv tshaj tawm hnub zwj Teeb (Thursday news 11.09.2025):
Meskas txo chij hawm Kirk
Teb chaws Meskas yuav txo chij ib nrab coj los hawm Charlie Kirk uas yog ib tug phooj ywg zoo rau Meskas tus coj Donald Trump tom qab nws raug neeg xua phom tua nws caj deb thaum tseem hais lus rau tej tub kawm ntawm tsev kawm qib siab ntawm xeev Utah. Donald Trump tau qhia meej txog tej xwm txheej no ntawm nws phau Truth Social account tias yuav txo chij txog ntua hnub zwj Hnub (Sunday) tsaus ntuj.
Raug txhom vim ua lagluam luam yeeb txhaum cai
Nom tswv nroog Melbourne tau muaj ib tug txiv neej hnoob nyoog 49 xyoos txhom liam tias nws yog tus nqus tej luam yeeb txhaum cai los muag. Tej khoom no muaj tshaj 7 tonnes cov nplooj luam yeeb, 5 million tus luam yeeb, thiab tshaj 5,000 lub twj haus luam yeeb pa uas tsis them se txog $36 million rau tsoom fwv teb chaws.
Vanuatu nqua hu kom Australia xa tej fossil fuel muag txawv teb chaws kom tsawg
Ralph Regenvanu uas yog Vanuatu tus nom tswj tej dej num huab cua pauv hloov tau nqua hu kom Australia xa tej fossil fuel tsawg muag txawv teb chaws vim ntiaj teb lub tsev hais plaub hais tias yog ntau lub teb chaws lub luag hauj lwm yuav tau kub siab txo kom tsis txhob tso tej pa tsis huv paug tsuas rau ntiaj teb kom nthuav dav tshaj qhov txo tej pa no ntawm ib lub teb chaws twg raws li cov kev pom zoo Paris Agreement.
Tus coj pab nom Liberal ntawm xeev Victoria tawm nom
Stuart Smith uas yog tus coj pab nom Liberal ntawm xeev Victoria tawm tsis ua nom tom qab tau muaj ib co xo raug ua paim quav qhia tias nws tau tso dag tso luag los yog qog ib co poj niam ntawm pab nom no. Ces thiaj tau muaj ib co xo (messages) WhatsApp raug coj mus nthuav tawm ntawm phau ntawv xov xwm the Australian Newspaper uas qhia txog tus coj lub chaw ua hauj lwm nrog Mr Smith tham thiab tau hais lus tawm tswv yim tsis zoo rau Liberal Women's Council thiab Bev McArthur uas yog ib tug nom Liberal zaum thawj hau rooj.
Rooj sab laj txog Middle East
Qatar tau qhia txog ib co tswv yim txog ib lub rooj sab laj ntawm Doha tom qab Israel tau tawm tsam Hamas ntau thaj chaw ntawm lub nroog no. Thiaj ua rau Sheik Mohammed bin Abdulrahman al-Thani tau qhia rau CNN tias lub rooj sab laj no yeej yuav koom tej nrog ntau lub teb chaws ntawm cheeb tsam no txuas ntxiv seb yuav ua li cas rau cov kev tawm tsam no uas Qatar tus nom tswj dej num txawv teb chaws tau piv tias ''yog ib co tsis muaj qab hau thiab tsis tsim nyog ua li."
Ley cov kev thov txim
Sussan Ley uas yog tus coj ntawm lwm pab nom teb chaws tau rov qab los thov txim rau neeg Australia caj ceg neeg India tej zejzog los kho senator Jacinta Nampijimpa Price tej lus tawm tswv yim. Ces pab nom no thiaj tau muab nws rho tawm tus nom zaum thawj hau rooj tom qab nws tsis kam tso tseg nws cov ncauj lug pheej hais tias Labor tsab cai tos neeg tsiv teb tsaws chaw India tuaj rau Australia.
Tej cai pab tej neeg qev plab yug me nyuam rau lwm tus
Tau muaj ib co kev teeb txheeb tshiab uas tau coj mus hnuav tawm ntawm phau ntawv xov xwm Journal of Law and Medicine hasi tias muaj tej tsev kho mob tsawg dua ib lub ntawm kaum lub twg ntawm New South Wales thiab Victoria thiaj muaj tej cai guide surrogacy births siv xwb. Thiab qhia tias tsuas muaj 10 lub tsev kho mob nroog ntawm 112 lub thiaj muaj tej surrogacy birth care policies siv xwb.
Tej txim phua rau tej xwm txheej nceb muaj taug
Erin Petterson kuj raug 3 lub txim raug kaw tag ib sim neej thiab tseem raug kaw tsev laj cuj 25 xyoos ntxiv rau nws cov kev tua Don thiab Gail Patterson, Heather Wilkinson thiab cov kev xav khwv tswv yim tua Ian Wilkinson. Tau muaj cov kev teem txim no tom qab ntev tshaj 2 lub xyoo uas nws tau ua cov khoom noj muaj nceb muaj taug lom nws tus txiv 3 tug txheeb ze. Ces nws thiaj yuav raug txim 33 xyoos thiab txog xyoo 2055 thiaj raug tso.
Cov kev rwg npoj tawm tsam ntawm teb chaws Fabkis
Tau muaj kev rwg npoj tawm tsam thoob teb chaws Fabkis rau thawj hnub uas nws tus thawj pwm tsav tshab tau los ua nom. Tub ceev xwm ntawm Paris thiaj tua cov pa kom ntsim qhov muag rau tej neeg rwg npoj uas mus rau ntawm ib lub high school thiab muaj tej neeg tua hluav taws tau tshem tej khoom kub hnyiab uas coj mus thaiv kev.
Txhais Australia zaj nkauj haiv thiab tej kev cog lus lees ua pej xeem Australia ua ntau hom lus
SBS Audio (SBS cov xov xwm kaw ua suab) tau muab Australia zaj nkauj haiv thiab tej lus cog lus lees ua pej xeem Australia coj los txhais ua cov ntawv tshaj 60 hom ntawv tso nrog cov ntawv Askiv uas Dami Im nqua ntawm Melbourne Symphony Orchestra. (Uas Australia tus nom sawv cev rau huab tais Askiv - Sam Mostyn yuav coj los siv limtiam tom ntej no thaum ua koom txoos tos txais pej xeem tshiab ntawm Canberra. Thiab Jane Palfreyman uas yog tus kis tswj SBS cov hauj lwm hais tias yog tej yam pab kom neeg Australia tshiab ntau million tus muaj kev sib cuag, muaj kev txaus siab thiab mloog tias lawv yog ib feem ntawm Australia).
Cob tsib cov cryptocurrency asset
Cob tsib tus lwm thawj pwm tsav tau pom zoo rau hnub tim 9 lub 9 hlis ntuj (2025) dhau los tias yuav tso cai rau ua tau cov lagluam digital asset li cryptocurrency ntawm teb chaws Nyab laj raws li Tuoitre News tau qhia.
Nplog cov kev dim ntawm cov teb chaws txom nyem
Tus neeg pab UN tus coj uas tswj cov hauj lwm UNDP ntawm cheeb tsam Asia Pacific cia siab tias Nplog yuav muaj peev xwm los txhim kho ntau yam kom teb chaws Nplog dim ntawm cov teb chaws tsis muaj kev txhim kho, uas ua rau ib txhia txhawj tias tsam Nplog yuav plam ntau yam txiaj ntsim raws li Vientiane Times tshaj tawm.
Kho Thaib tej txhooj cai tswj haiv
Thaib lub tsev hais plaub txhooj cai tswj haiv (Thai Constitutional Court) tau hais tias yog xav tsim dua ib tsab cai txhooj cai tswj haiv tshiab siv ces yuav tsum tau muaj cov kev tawm suab peb zaug, uas thawj ob zaug ua tau ua ke thiab mam li ua zaum 3 ntxiv. Txawm li cas los nws kuj txwv tsis pub cia li xaiv kiag tej nom los tsim tej txhooj cai tswj haiv ncaj nqa thiab raws li Bangkok Post qhia.
