Tsoom fwv Albanese tau hais tias Meskas lub tuam chav tswj dej num tiv thaiv teb chaws (Pentagon) cov kev los txheeb cov kev pom zoo rau tej kev tswj kev ruaj ntseg (AUKUS security pact) tsis tshua tseem ceeb. Peb haiv neeg li Australia, Askiv thiab Meskas tau kos xyeem mem tes pom zoo rau tej hauj lwm no rau xyoo 2021 thaum uas Australia tus qub thawj pwm tsav Scott Morrison ntawm pab nom Liberals thiab Meskas tus tsoom fwv Joe Biden tseem ua nom. Cov kev pom zoo no thiaj yuav ua rau Australia yuav tau siv nyiaj txog li $368 billion kom Australia yuav tau 3 lub nkoj ploj qab thu dej Virgina-class submarines ntawm teb chaws Meskas rau thaum ntxov lub caij xyoo 2030s ua ntej yuav yuav ib co nkoj tshiab uas tsim xa rau Australia txij xyoo 2040s. Pentagon tau qhia tias tseem yuav txheeb seb cov kev pom zoo no puas haum raws li Meskas tus President Donald Trump tsab cai 'America First policy'. Richard Marles tau qhia meej tias Meskas tau qhia rau Australia thiab Askiv paub txog cov kev txheeb no. Ces nws thiaj tau hais ib co ncauj lub tias Australia yeej tseem xav ua raws li cov kev pom zoo no thiab yeej tau koom tes nrog Meskas cov kev txheeb no.
Kuj tau qhia meej tias hnub tim 19 lub 7 hli ntuj yog hnub yuav rov qab xaiv tsa tsoom fwv xeev Tasmania dua ua lwm 2 rau lub caij 2 xyoos no. Jeremy Rockliff ntawm pab nom Liberal uas yog tus hau xeev no tsis kam tawm nws tus nom tom qab pab nom Labor tau muaj cov kev tawm suab ntawm tej nom hauv tsev tsoom fwv xeev tsis tso siab rau nws txoj kev ua tus coj, ces nws tsis kam tawm thiab tau sab laj nrog tus nom sawv cev rau huab tais ntawm nws lub xeev kom muaj cov kev xaiv tsa tsoom fwv tshiab.
Australia tau koom nrog teb chaws Askiv, Canada, New Zealand thiab Norway txwv tsis pub siv nyiaj txiaj thiab tsis pub ntoj ncig rau Israel ob tug nom tseem ceeb li Itamar Ben-Gvir uas yog tus nom tswj kev ruaj ntseg haiv thiab Bezalel Smotrich uas tswj tej dej num nyiaj txiaj vim cav tias nkawv tau txhawb nqa tej tswv yim tsim kev kub ntxhov uas tau yuam neeg Palestinians tej cai. Thiaj ua rau Gideon Saar uas yog Israel tus nom tswj dej num txawv teb chaws hais tias yog tej yam tsis tsim nyog ua thiab tseem yuav npaj ib lub rooj sab laj limtiam tom ntej no seb yuav ua li cas. Meskas los kuj tsis pom zoo nrog cov kev txwv no thiab. Ua ke no los Izzat Abdulhadi tau qhia rau SBS Arabic tias nws zoo siab rau tsoom fwv Albanese cov kev qhia no thiab xav kom haj yam txwv tseem ceeb tshaj no thiab. Nws hais tias ''Kuv nqua hu kom tsoom fwv Australia txwv tsoom fwv Israel thiab tsis yog yuav txwv ob tug nom no xwb. Thiab xav kom Australia lees paub lub teb chaws Palestine kiag tam sim no rau lub rooj sab laj tham txog kev thaj yeeb ntawm New York txij tim 17 txog 20 lub 6 hli ntuj no'' tham txog cov kev tsim teb chaws Palestine.
Australia tej neeg zejzog Fillipino kuj tau ua kev zoo siab rau hnub uas Philippines tau txais kev ywj pheej (Philippines Independence Day) uas muaj tej koom txos ua kev zoo siab rau lawv tej puav pheej kab lis kev cai thiab sab ntsuj plig. Thiaj tau ua kev zoo siab rau hnub tim 12 lub 6 hli ntuj no tom qab lub teb chaws no tau txais kev ywj pheej thiab tsis nyob qab tswj hwm ntawm teb chaws Spain xoo 1898 thiab tau muaj hnub no los ua hnub haiv txij xyoo 1978 los.
Tau muaj ntau pua tus neeg ntawm sab qaum teb New South Wales tau ua kev nco txog 25 xyoos uas tau muaj neeg txum tim raug tua tuag coob heev ntawm Myall Creek. Ces lawv thiaj tau ua koom txoos nco txog ib pawg neeg txum tim Aboriginal 28 leej uas tsis muaj riam phom dab tsi tab sis raug ib pab neeg phem muab tua hnub tim 10 lub 6 hli ntuj 1838. Tsis tas li ntawd los kuj yog ib thaj chaw ntawm tej chaw 438 thaj uas tau muaj neeg txum tim raug tua tuag coob heevrau lub caij tsov rog Frotier War txij xyoo 1788 txog 1930. Tej xwm txheej no thiaj yog thawj cov xwm txheej thiab tib lub caij uas tej neeg Europe tuaj nyob Australia no thiaj tau tua neeg txum tim coob xwb.
Friedrich Merz uas yog Germany tus coj hais tias nws zoo siab rau cov kev sib khom pom zoo ua lagluam ntawm teb chaws Meskas thiab Suav tuam tshoj thiab cia siab tias Europe yuav musj peev xwm sib khom li no nrog Meskas thiab.
Askiv tus tub huab tais Wales tau nqua hu kom ntiaj teb kub siab ceev nrooj los pov puag tej hiav txwv vim tsis muaj sij hawm ntau lawm. Nws tau hais cov lus no ua ntej yuav koom UN lub rooj saj laj txog tej hiav txwv ntawm lub nroog Nice rau lub caij ntiaj teb muaj cov kev nqua hu ntau zuj zus tuaj ntxiv kom pov puag tej hiav txwv txog li 30 feem pua txog rau xyoo 2030 uas 190 lub teb chaws pom zoo.
Lub limtiam no ces lub chaw nthuav xov xwm Special Broadcasting Services (SBS) teeb tsa txwm 50 xyoo. Tau teeb tsa xyoo 1975 uas yuav siv sij hawm 3 hlis coj los nthuav tej xov xwm qhia txog cov kev kho mob Medibank (Medicare) ua lwm yam lus rau tej neeg tsis hais lus Askiv. Ces thiaj tau tsim lub xov tooj cua 2EA ntawm Sydney nthuav ua 7 hom lus thiab tsim 3EA ntawm Melbourne nthuav tej xov xwm no ua 8 hom lus. Tam sim no ces SBS nthuav tej xov xwm ua 63 hom lus thoob plaws rau tej xov tooj cua, podcasting, online thiab social media. Txij xyoo 2012 ces tau tsim tshooj NITV (National Indigenous Television) uas nthuav xov xwm txog neeg txum tim Aboriginal and Torres Straigt tej kev xav. James Taylor uas yog SBS tus Managing Director thiaj hais tias muaj ntau yam uas peb ua kev zoo siab. ''Peb yog lub chaw nthuav xov xwm uas muaj ntau yam dab neeg ua ntau hom lus tshaj plaws ntawm peb tej keeb kwm uas tshaj ua 60 hom lus. Tsis tas li ntawd los peb yeej tseem raug lees paub tias yog ib lub chaw nthuav tau xov xwm zoo ntau yam. Thiab yeej muaj tej neeg Australia tau mus siab ntawm SBS On Demand coob, peb tseem tau cov khoom plig 3 xyoos sib law liag tias yog lub chaw nthuav xov xwm ua suab zoo tshaj plaws thiab. Tej no yog tej peb tau ua kev zoo siab. Thiab peb los kuj yog zej tsoom ib lub chaw nthuav xov xwm zoo thiab tau txais nyiaj pab cuam ntawm zej tsoom, thiaj yog tej yam tseem ceeb uas peb yuav tau ua tib zoo los xyuas kom tsim tau tej dab neeg zoo txhua xyoo twg rau neeg Australia.''
Qantas tau qhia tias nws yuav muab cov lagluam yav dav hlau Jetstar Asia kaw thaum xaus lub 7 hli ntuj 2025 no tom qab tau ntau xyoo uas tau ua lagluam poob peev. Lub tuam txhab yav dav hlau no thiaj tau qhia rau lub tuam txhab Australian Stock Exchange (ASX) tias nws yuav siv tej tswv yim kho no kom tso tseg tsis txhob ua cov lagluam no ntxiv thaum xaus lub hli tom ntej no lawm. Thiab tau qhia tias yuav siv 13 lub dav hlau A320 uas Jetstar Asia siv coj los tsim tej fij dav hlau yav thoob Australia thiab New Zealand uas yuav muaj 100 txoj hauj lwm rau tej neeg ua tab sis kwv yees tias yog kaw cov lagluam no lawm ces yuav muaj neeg poob hauj lwm txog 500 txoj.
Nom tswv xeev Bokeo tau qhia tias nws tau npaj tej neeg los tswj thiab tawm tsam nrog tej yaj yeeb txhaum cai nruj tuaj ntxiv lawm. Ua ke no los Nplog lub koom haum Red Cross kuj nqua hu kom neeg Nplog mus tso ntshav kom thiaj tau ntshav txau siv rau lub caij txog ntiaj teb hnub tso ntshav raws li The Laotian Times tau tshaj tawm.
Nplog tus thawj pwm tsav tau hais tias yuav nrog xyuas kom tswj tau tej lagluam li tswj kom nyiaj poob nqe tswg, tswj kom kom nyiaj tus nqe nyob tus thiab tej nqe khoom kim kom thiaj tsis ua rau ib co neeg Nplog txom nyem heev. Ua ke no los yuav los ua tib zoo xyuas kom sau tej tej se thiab kom muaj peev xwm them tau tej nuj nqe txog li ntawm 800 billion Kip uas tseem tsis tau them raws li Vientiane Times qhia.
Thaib tus thawj pwm tsav Paetongtarn Shinawatra kuj tau mus xyuas tej nom tswv ntawm Thaib lub xeev Surin thiab nqua hu kom tej nom tswv siv kev nom tswv thiab pawg rooj saib xyuas ciam teb Thaib-Cambodia siv kev nom tswv los sib kho kom muaj kev haum xeev rau tej ciam teb uas tseem sib cov nyom raws li Bangkok Post qhia.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
