Xov xwm luv tshaj tawm hnub zwj Quag (Tuesday news 29.07.2025):
Australia ob pab nom tseem ceeb muab tej gas muag rau pej kum haiv tej tuam txhab
David Pocock uas yog ib tug nom ywj pheej ntawm Australia Capital Territory (ACT) tau tawm tsam Australia ob pab nom tseem ceeb liam tias lawv tau muab Australia tej gas muag rau tej tuam txhab pej kum haiv ces thiaj ua rau tsis muaj gas txaus siv ntawm Australia, thiab muag tej xwm txheej no teev tias yog ib cov kev ntxias dag.
Nqe tshuaj pheej yig
Hnub zwj Quag (Tuesday) no ces thawj pwm tsav Anthony Albanese tseem tab tom coj ib tsab cai coj los sab laj hauv tsev tsoom fwv kom yuav tau tshuaj pheej yig ntawm $31.60 nqe ua $25, uas nws hais tias yeej kub siab los daws tej nqe siv ua lub neej, thiab cia siab tias lwm pab nom teb chaws yuav pab tsim tsab cai no. (Yog tsim tau ua cai siv ces yuav pib siv txij tim 1 lub 6 hli ntuj xyoo 2026 mus).
Nqe saib paj teeb hluav taws
Tus nom zos North Sydney yuav hais kom tej neeg Sydney uas xav mus saib paj teeb hluav taws xyoo tshiab them nyiaj $50 mas thiaj pub mus saib ntawm Blues Point rau lub caij nws yuav muag cov yuaj (Pib - tickets) 8,000 daim kom tau nyiaj $400,000 coj los pab nws them tej nqe $1 million uas siv coj los tua paj teeb hluav taws ib zaug twg, thiab pab $90,000 rau tej koom txoos no.
Ukraine cov kev zoo siab rau Mr Trump cov kev tsub txim lagluam rau Russia
Volodymyr Zelenskyy uas yog Ukraine tus coj tau zoo siab rau Meskas tus President Donald Trump cov kev txo lub sij hawm ntawm 50 tawm hnub los ua kaum tawm hnub kom Russia yuav tsum sib khom kom tau kev thaj yeeb rau Ukraine, uas Trump hais tias tsis muaj laj thawj pheej yuav ncua ntxiv lawm.
UN lub rooj sab laj teeb tsa teb chaws Palestine
Antonio Guterres uas yog UN (United Nation) tus coj tau nqua hu kom ntiaj teb tsoom theej tswj txhawb nqa lub tswv yim tsim ob lub teb chaws kom Israel tau txaiskev ruaj ntseg thiab kom muaj teb chaws rau neeg Palestinian nyob thaum Saudi Arabia thiab Fabkis ua ob tug tswv cuab tswj lub rooj sab laj tham 3 hnub ntawm New York.
Thiab thiab Cambodia cov kev cheem rog
Tau muaj ib lub rooj sab laj uas Anwar Ibrahim uas yog Malaysia tus thawj pwm tsav tau koom tau hais tias Thaib thiab Cambodia tau kos xyeem mem tes pom zoo xau cov tsov rog muaj los tau 5 hnub uas tau ua rau muaj neeg tas sim neej ntau caum tus thiab yuav tau tshem tej pej xeem tshaj ib puas txheeb tus tawm ntawm ob lub teb chaws nyob raws tej xeev ciam teb rau tej chaw tau txais kev nyab xeeb.
