Cov ntsiab lus tseem ceeb:
- Qhov sib txawv ntawm cov sij hawm siv los lis cov Parent Visa thiab cov Contributory Parent Visa thiab tej nqe visa.
- Cov Sponsored Parent Temporary Subclass 870 Visa uas tau tsim coj los siv txij April 2019 ntawm tso cai rau tej neeg lawv niam lawv txiv tuaj txawv teb chaws tuaj nrog lawv nyob tau ntawm teb chaws Australia txog 10 xyoo.
- Teev meej tseeb tias ib xyoos twg pub neeg thov tau cov visa tsiv teb tsaws chaw npaum li cas xwb.
Australia tej pej xeem los yog cov neeg nyob ruaj ntawm teb chaws Australia thiab cov pej xeem neeg New Zealand muaj cai thov cov parent visas no kom tos tau lawv niam lawv txiv txawv teb chaws tuaj nrog lawv nyob ib ntus los yog tuaj nrog lawv nyob tau ruaj kiag.
Thiab muaj 2 hom visas uas lawv thov tau xws li cov – ‘Parent Visa’ thiab ‘Contributory Parent Visa’ .
Cov Contributory Parent Visa ces tus nqe yuav kim dua thiab pub tej neeg thov tau cov visa no ntau dua raws cov kev tsiv teb tsaws chaw rau ib lub xyoo twg uas pib thov tau txij tim 1 July-30 June rau financial year ntawd.
Zeke Bentley yog ib tug kws lij choj thiab yog tus neeg pab kis tej neeg tsiv teb tsaws chaw tej ntaub ntawv ntawm lub koom haum The Migration Place ntawm nroog Brisbane hais tias, yeej muaj neeg nyiam mus thov cov Parent Visa uas tus nqe visa pheej yig dua, tab sis ntshe yuav siv sij hawm txog li 30 xyoo mas nom tswv Australia mam los xyuas seb puas pub visa rau yus tos tau yus niam los yog yus txiv tuaj nrog yus nyob.
Hos yog tias, tej cuab yig ho tuaj yeem them nyiaj li ntawm AUD 45,000-AUD 55,000 kom tos tau ib tug leej niam los yog leej txi tuaj nrog yus nyob ces lawv kuj muaj peev xwm thov tau cov parent visa rau lub sij hawm 2 txog rau 5 lub xyoos thiab.
Hos yog cov parent visa uas them pheej yig ces ntshe yuav tau siv sij hawm li ntawm 18-30 xyoo diam.
Smiling multi-generation Asian family Source: Getty Images
Yog tham txog cov balance of family test lawm ces txhais tau tias lawv yuav tsum muaj tej me nyuam uas nyob ruaj ntawm teb chaws Australia no ntau tshaj tej nyob rau ntawm lawv qub teb chaws.
Piv txwv li tias, yog koj muaj 3 tug me nyuam, ces yuav tsum muaj 2 tug nyob ruaj ntawm teb chaws Australia no thiab tsuas tshuav ib tug nyob ntawm koj lub teb chaws xwb.
Txij lub 4 hlis ntuj xyoo 2019 los, tsoom hwv teb chaws Australia kuj tau tsim tau tsab cai tshiab los tsim cov Sponsored Parent (Temporary) (Subclass 870) visa coj los siv lawm thiab.
Sam Jazayeri uas yog ib tug neeg ua hauj lwm ntawm lub tuam txhab Sirus Migration Lawyershais tias tej niam txiv uas thov tau cov visa tshiab no muaj peev xwm nyob tau li 3 xyoos los yog 5 xyoos nyob ntawm seb lawv xav thov cov nyob luv los yog nyob tau ntev xwb, thiab tom qab uas nyob txwm li 2 lub sij hawm hais no lawm ces tseem muaj cai thov txuas visa ib zaug ntxiv (5 lub xyoos ntxiv rau thawj 5 xyoos uas thov tau thawj zaug) kom nyob tau txog 10 xyoo thiab.
Yog li ces thiaj yuav pab kom tej niam los yog txiv uas thov tau cov visa tuaj nrog lawv tej me nyuam thiab tej xeeb leej xeeb ntxwv nyob teb chaws Australia no muaj peev xwm nyob tau txog 10 lub xyoo.
Yog tham txog tus nqe ntawm daim Sponsored Parent (Temporary) (Subclass 870) visa uas thov tuaj nyob 3 xyoos ces raug nyiaj AUD 5,000 xwb, hos yog thov nyob 5 xyoos ces raug tus nqe AUD 10,000.
Thiab yuav siv sij hawm los khiav ntaub ntawv txog li 4 hlis, thiab tsuas pub xaiv seb yuav tos yus niam los yog yus txiv ib tug twg tuaj xwb tsis pub tos 2 leeg tuaj ua ke.
Tsis tas li no cov Sponsored Parent (Temporary) (Subclass 870) visa no yeej tseem txwv tsis pub yus niam los yog yus txiv ua hauj lwm thiab tsis pub thov visa (permanent parent visa) kom muaj cai nyob tau ruaj ntawm teb chaws Australia no thiab.
Txuas ntxiv ntawd, tom qab uas yus niam los yog yus txiv tau nrog yus nyob tawm teb chaws Australia no txwm rau lub sij hawm 10 xyoo lawm ces lawv yuav tsum tau rov qab mus tsev rau lub teb chaws uas lawv ncaim tuaj ntawd.
Yeej muaj tej visa txog li 7 hom rau tej neeg sawv daws tos lawv niam lawv txiv tuaj xyuas lawv tau ntawm teb chaws Australia no thiab, tab sis ib lub xyoos twg nom tswv Australia yeej qhia tias tsuas pub pes tsawg daim visa rau tej neeg thov tau tuaj rau teb chaws no xwb thiab.
Daughter embracing mother after outdoor family dinner party Source: Getty Images
Piv txwv tias ib lub financial year txij li hnub tim 1 July 2019-30 June 2020 ces tsuas pub tej neeg thov tau cov parent visa txog li 7,371 daim siv rau xyoo ntawd xwb.
Tab sis nom tswv yeej tseem pub cov Sponsored Parent (Temporary) visas txog li 15,000 daim rau tej neeg thov tau siv rau ib lub xyoos twg ntxiv thiab.
Thiab yog thaum tej neeg thov tej visa no txwm lawm, ces lub tuam chav lis laj fai tswj cov kev tsiv teb tsaws chaw thiab pov puag ciam teb (Department of Immigration and Border Protection) yuav tsis pub tej visa no rau tej neeg thov ntxiv rau xyoo ntawd lawm, thiab yuav tau tos kom txog financial year xyoo tshiab txij tim 1 July tso mam li rov qab pub tej neeg thov tau cov visa no dua.
Yog koj xav tau xov xwm kom ntxaws ntxiv txog cov Parent visas, ces mus txheeb tau ntawm Department of Home Affairs lub vas sab no (website).
Thiab yog koj xav tau neeg txais lus thiab txhais ntaub ntawv pab koj ces hu rau lub koom haum Translating and Interpreting Service tus xov tooj 13 14 50 tau.
