Xov xwm luv tshaj tawm hnub zwj Teeb (Thursday news 26.06.2025):
Jim Chalmers uas yog Australia tus nom tswj nyiaj txiaj rau tsoom fwv tau nug Meskas tus nom tswj nyiaj txiaj kom tshem cov kev tsub se rau Australia tej khoom xa muag rau teb chaws Meskas. Ces thiaj yog cov kev tau ntsib Mekas tus nom no ua zaum 3. Raws li President Trump cov kev tsub se ces Australia tej khoom yuav raug tsub se 10 feem pua thiab 50 feem pua rau tej hlau thiab tej txhuas. Mr Chalmers thiaj hais tias ''Wb yeej sib tham tau zoo heev thiab kuv yeej tau hais nws thaum tham txog lagluam thiab tej se ua rau tsis muaj kev cov nyom rau ntiaj teb tej lagluam.''
Lub koom haum Amnesty International ntawm teb chaws Kenya uas pov puag tib neeg txoj cai hais tias tau muaj 16 tus neeg raug tub ceev xwm tua tuag thiab muaj tej neeg 400 leej raug mob rau lub caij lawv mus tawm tsam ntawm tuam ceeb Nairobi nco txog tej xwm txheej tawm tsam tsaib no uas tsi pom zoo rau cov kev yuav nce se ntxiv thiab ua rau muaj tej neeg rwg npoj tas sim neej yam tsawg li 60 leej.
Iran lub tsev tsoom fwv tau pom zoo raws ib nqag tsis koom tes nrog IAEA (Internatinal Atomic Energy Authority) uas yog UN lub koom haum tswj cov hauj lwm nuclear rau hnub 12 uas raug Israel thiab Meskas tus. Tej hauj lwm no thiaj yuav ua rau tej kws paub tej hauj lwm ntawm lub koom haum no tsis muaj peev xwm yuav mus txheb Iran 3 lub chaw raug tua seb puas li cas lawm, thiab yuav nyuaj heev tsis paub tias xyov cov chaw twg yob tej chaw lim cov uranium.
Ukraine tus president Volodymyr Zelenskyy tau nqua hu kom coj Russia tej coj mus raug txim rau cov kev mus tua Ukraine. Nws tau mus koom NATO lub rooj sab laj ntawm teb chaws Netherlands lub nroog Hague thiab mam li mus rau ntawm Strasbourg mus hais lus ntawm Europe lub tsev tsoom fwv. Ces Mr Zelenskyy thiab tus coj lub koom haum Europe no thiaj tau kos xyeem mem tes rau ib tsab cai Special Tribulanal uas teev txog cov kev hawv ua phem rau Ukraine. Thiab hais tias mam coj tus neeg phem mus hais plaub.
Askiv tus thawj pwm tsav Keir Starmer hasi tias NATO tej coj npaj txij yuav tsub nias Russia tus president Vladimir Putin kom los tsim kev thaj yeeb. Limtiam dhau los uas Mr Starmer tau koom lub rooj sab laj G7 ces nws kuj tau rau txim lagluam rau Russia, thiab hais tias txog caij lawm uas kom president Putin tsis txhob lug hla cov kev sib tham no ntxiv lawm.
Lwm pab nom teb chaws hais tias NATO cov teb chaws tub koom siab cov kev txiav txim siab siv nyiaj ntau tuaj ntxiv rau tej hauj lwm tug rog yog tej yam tsim nyog yuav txhawb nqa tsoom fwv Australia kom siv nyiaj ntau tuaj ntxiv los ua cov hauj lwm no thiab.
Tau muaj ib tug ib tug kws lij choj ntawm Ho Chi Minh City hais tias tej neeg Nyab laj uas mus nyob ntawm Meskas tau 30 xyoo xav retire mus nyob ntawm teb chaws Cob tsib tau yog lawv yog cov neeg raug cai, paub thiab hwm kev cai thiab txhooj cai txwj haiv, paub lus Cob tsib, muaj nyiaj pab tau tus kheej ces muaj peev xwm thov ua tau pej xeem thiab retire tau ntawm teb chaws Nyab laj raws li Touitre News tau qhia.
Tsoom fwv Australia kuj tau pab nyiaj rau Nplog tshaj li AUD 2 million los txhawb nqa kom nplog nqes peev rau tej hauj lwm pov puag huab cua, txhim kho ceev txuag tau tej ib puag ncig thiab muaj kev koom tes lagluam rau cheeb tsam no, thaum uas muaj Australia tej nom tswv, Nplog tej nom tswv thiab UN lub koom haum tswj tej dej num lagluam thiab txhim kho ntawm cheeb tsam Asia Pacific koom. Japan los kuj tau pab nyiaj yuav laug txog li USD 3 million los tsim ib co scholarship los pub rau Nplog tej neeg ua hauj lwm kom tau mus kawm qib siab ntawm teb chaws Japan raws li Vientiane Times tau qhia.
Nom tswv Huaphan tau txwv tsis pub tej neeg thiab tej lagluam khawb kub yog tias tsis muaj ntaub ntawv raug cai ces yog tseem khawb ces yog ib cov kev ua txhaum cai raws li The Laotian Times tshaj tawm.
Thaib lub koom haum NACC tseem sam sim tshuaj ntsuam cov suab lus kaw uas raug ua paim quav ntawm Thaib tus thawj pwm tsav Paetongtarn thiab Mr Hun Sen seb yog li cas tiag. Vim rau qhov nyob rau cov kev sib tham no ces Ms Sinawatra kuj tau hais tias Thaib tus hau tub rog pawg ob tsis mloog hais thiab zoo li Paetongtarm qhau hau yuav ua raws li Cambodia xav tau. Ces tseem yuav tshuaj ntsuam xyuas tej xwm txheej no txuas ntxiv seb yog li cas tiag raws li Bangkok Post tau qhia.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
