Xov xwm luv tshaj tawm hnub zwj Feej (Wednesday news 02.07.2025):
Tsoom fwv teb chaws Australia hais tias nws yuav xyuas kom nws muaj fwj chim los txiav nyiaj tsis pab rau tej chaw zov me nyuam uas tsis kub siab xyuas kom tej me nyuam yaus tau txais kev nyab xeeb, tom qab uas tub ceev xwm Victoria tau muaj ib tug neeg ua hauj lwm childcare worker txhom thiab tsub 70 lub txim liam tias nws tau ua cov kev txhaum sex offences. Ces thiaj ua rau tus tsoom fwv xeev Victoria hais tias nws yuav maj ceev nrooj los kho cov childcare tshiab.
Kuj tau coj tsab ntawv cej luam Yoorook Justice report los qhia ntawm tsev tsoom fwv xeev Victoria thawj zaug thiab txheeb tau tias tej neeg txum tim Aboriginal ntawm lub xeev no raug tua npog nroj ntsuab, raug kab mob, raug siv kev yuam deev tsim kev kub ntxhov ua rau lawv tej lus thiab tej kab lis kev cai plam ploj, ua rau tej ib puag ncig puas tsuaj thiab muab lawv tej me nyuam cais tawm. Ces thiaj tau hais kom xyuas kom tsim kom tau cov kev pom zoo thiab los them nyiaj paj tshab pauj rau lawv cov kev raug tej xwm txheej no.
Francesca Albanese uas yog UN tus neeg mus tshuaj ntsuam xyuas neeg Palestinian tej nrim chaw tau teev txog 60 lub tuam txhab ntawm ib tsab ntawv cej luam tias muaj feem txhawb nqa Israel cov kev ua vaj tse thiab pab tej tub rog ua tsov rog ntawm Gaza. Nws thiaj tau nqua hu kom tej tuam txhab no tso tseg thiab ras txog cov kev ua txhaum zejzog pej kum haiv cai. Txawm li cas los kuj tau muaj Israel ib tug kis tau hais ib co lus ntawm Geneva tias 'tej lus no tsis muaj tseeb thiab ua kom lwm tus poob ntsej muag xwb.''
Penny Wong uas yog Australia tus nom tswj dej num txawv teb chaws kuj tau ntsib Meskas tus nom txawv teb chaws rau lub caij sib ntsib ntawm lub rooj sab laj Quad meesting ntawm Washington DC. Ms Wond kuj tau hais seb Meskas puas zam tsis txhob tsub se rau Australia tej khoom xa muag rau nws thiab kuj sib tham txog cov hauj lwm AUKUS agreement coj los tawm tsam tej xwm txheej kub ntxhov uas muaj ntau zuj zus tuaj hauv ntiaj teb.
Emmanuel Macron lub chaw ua hauj lwm tau qhia tias Fabkis tus coj no tau hu xov tooj nrog Vladimir Putin tham ntev txog 2 teev thiab hais kom nws xaus tsov rog thiab nrhiav kev sib khom los daws cov kev tsis sib haum xeeb nrog Ukraine.
Thaib lub tsev hais plaub kuj tau hais kom Thaib tus thawj pwm tsav Paetongtarn Shinawatra so tsis txhob ua hauj lwm ib ntus uas nws hais tias ntshe yuav siv sij hawm li 3 hlis los tshuaj ntsuam tej lus sib tham nrog Hun Sen uas tau paim quav vim liam tias nws tsis ua siab ncaj rau teb chaws Thaib thiab ua tej yam tsis tsim nyog ua.
Thaib lub koom haum tswj tej tsheb ciav hlau qhia tias tau kos xyeem mem tes nrog ib lub tuam txhab yuav los tsim 3 txoj kev tsheb ciav hlau mus rau Thaib 3 lub tshav dav hlau tseem ceeb li Suvananphom, Don Mueuang thiab U-Tapao.
Nom tswv Cob tsib qhia tias yuav ua cov ID rau tej neeg txawv teb chaws uas mus nyob thiab ua hauj lwm ntawm lub teb chaws no kom muaj peev xwm siv tau lwm cov services txij tim 1 lub 7 hli ntuj 2025 mus.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm Facebook, Google podcast, Apple postcast, los yog Spotify. Download SBS Adio App thiab mloog YouTube, caum Pod follow los yog lwm cov podcasts platforms (iHeart, Amazon Music & Podcasts).
